2 Timóteo 1 - Biblia Tetun Dili

Paulo hahuu nia surat

¹ Timóteo nebee diak. Kumprimentus hosi hau, Paulo. Nai Maromak hili ona hau sai Kristu Jesus nia apostolu, i haruka hau baa foo sai kona ba moris rohan laek. Nia promete atu foo moris nee ba ema nebee fiar ba Kristu Jesus.

² Timóteo, o hanesan hau nia oan rasik, nebee hau hadomi. Grasa no domin hosi Aman Maromak no Kristu Jesus ita nia Nai, foo paz ba o.

Paulo agradese ba Nai Maromak

³ Loron-kalan hau halo orasaun ba o, hodi agradese ba Nai Maromak. Hau serbii Nia ho laran moos, hanesan mos hau nia bei-ala sira.

⁴ Hau hanoin fali uluk, bainhira ita fahe malu, o nia matan been turu. Agora hau hakarak loos hasoru o, tanba bainhira hau haree fali o, hau sei haksolok teb-tebes.

⁵ Hau hanoin fila fali o nia fiar ho laran tomak ba Nai Jesus. Fiar nee hosi kedas o nia avoo feto Lóide ho o nia inan Eunice. I hau laran metin katak agora o mos fiar hanesan sira.

Timóteo tenki uza kbiit nebee Maromak foo

⁶ Uluk, bainhira hau tau liman ba o nia ulun hodi halo orasaun, Maromak foo kbiit ba o hodi halo Nia serbisu. Tanba o fiar teb-tebes ba Jesus, agora hau foo hanoin fali ba o para uza kbiit nee ho didiak.

⁷ Tanba Nai Maromak nia Espiritu nebee Nia foo mai ita, la halo ita tauk-teen. Maibee Nia foo poder mai ita, halo ita hadomi ema, i ajuda ita atu domina aan.

⁸ Tanba nee, la bele moe konta kona ba ita nia Nai Jesus. I la bele moe kona ba hau, maski hau dadur hela iha kadeia tanba hau serbii Nai Jesus. Maibee o tenki prontu simu terus hanesan hau, para bele foo sai Novidade Diak. I Maromak sei foo forsa ba o hodi aguenta iha terus nee nia laran.

⁹ Nai Maromak mak salva ona ita, i bolu ona ita sai Nia ema para ita moris ho laran moos. Nia halo hanesan nee, laos tanba ita hatudu hahalok diak ruma. Maibee, Nia salva i bolu ita tuir Nia planu rasik, tanba Nia hakarak hatudu Nia grasa mai ita. Molok Nai Maromak halo mundu nee, Nia desidi ona atu haruka Kristu Jesus mai, para hatudu Nia grasa mai ita.

¹⁰ Agora, Kristu Jesus nebee salva ita, mai tiha ona, i ita haree ona Nia laran diak mai ita. Mate nia poder, Nia halo rahun tiha ona! I Nia foo sai liu hosi Nia Novidade Diak katak Nia loke dalan ba ita atu moris nafatin tinan ba tinan ho Nai Maromak.

¹¹ Nee mak Novidade Diak. I Nai Maromak foti hau sai Jesus Kristu nia apostolu, para foo sai i hanorin Novidade Diak nee.

¹² Tanba nee mak hau terus iha kadeia. Maibee hau la moe, tanba hau konhese Kristu i fiar ba Nia. I hau hatene loloos katak Nia sei kuidadu Nia Novidade Diak nebee Nia tau ona iha hau nia kabaas, too Nia fila fali mai hosi lalehan.

¹³ Kaer metin hanorin loos nebee o simu ona hosi hau. Fiar ba Jesus nafatin i hadomi ema seluk, tanba o laran ida ona ho Kristu Jesus.

¹⁴ Defende didiak hanorin nebee loos. Lia loos nee hanesan rikusoin nebee Nai Maromak foo ona ba o para o kuidadu. I Espiritu Santu, nebee hela iha ita nia laran, sei ajuda o.

Onesiforu ajuda Paulo dala barak

¹⁵ O hatene katak Fígelu ho Hermójenes ho sira seluk nebee hela iha provinsia Ázia fila kotuk husik hela hau.

¹⁶ Maibee Onesiforu lae. Nunee hau harohan ba Nai Maromak para hatudu Nia laran diak ba Onesiforu ho nia familia tomak. Tanba nia mai vizita hau bebeik iha kadeia, hodi hametin hau nia laran. Nia la moe maski hau ema dadur.

¹⁷ Uluk, bainhira nia foin too iha sidade Roma nee, nia buka hau tuun-sae too hetan.

¹⁸ O rasik hatene, uluk hau sei iha sidade Efezu mos, nia ajuda hau barak iha nebaa. Husu boot, bainhira Jesus Kristu fila mai atu foo justisa ba ita ema, Nia sei hatudu Nia laran diak ba Onesiforu.