2 Tesalonika 3 - Biblia Tetun Dili

Paulo sira husu kristaun iha Tesalónika halo orasaun

¹ Maun-alin sira, halo orasaun mai ami, para Nai Maromak nia liafuan bele namkari lalais too iha fatin-fatin, i ema iha nebee-nebee bele respeita Novidade Diak nee, hanesan mos uluk imi simu.

² Halo orasaun mos mai ami para ami bele sai hosi ema aat sira nia liman laran. Tanba laos ema hotu fiar ba Novidade Diak nee.

³ Maibee Maromak sempre kumpri buat nebee mak Nia hatete tiha ona. Nia sei foo forsa ba imi, i kuidadu imi hosi aat nain.

⁴ Ami laran metin katak Nai Jesus ajuda hela imi para halo tuir buat nebee ami hatoo ona ba imi, i imi mos sei halo tuir nafatin.

⁵ Ami halo orasaun para Nai Jesus halo imi komprende liu tan katak Nai Maromak hadomi imi, i ajuda imi aguenta ho pasiensia iha terus laran, hanesan mos Kristu.

Ema hotu tenki halo serbisu

⁶ Maun-alin sira, hau foo orden ba imi hodi Nai Jesus Kristu nia naran, imi hadook hosi maluk kristaun sira nebee baruk-teen. Sira la halo tuir buat nebee ami hanorin ona ba imi kona ba serbisu.

⁷ Imi hatene katak imi tenki tuir ami nia ezemplu. Bainhira ami sei hela hamutuk ho imi, ami laos baruk-teen.

⁸ Ami serbisu makaas loron-kalan, para la bele foo todan ba imi. I bainhira ema ruma foo hahaan mai ami, ami sempre selu.

⁹ Tuir loos ami iha direitu atu husu imi nia ajuda. Maibee ami lakohi, tanba ami hakarak hatudu ezemplu diak para imi mos bele halo tuir.

¹⁰ Iha tempu nebaa, ami rai hela regra ida ba imi nunee, “See mak lakohi halo serbisu, la bele haan.”

¹¹ Maibee agora ami rona dehan, imi balu baruk-teen, la halo serbisu, i so mete deit ho buat nebee la iha folin.

¹² Ami husu makaas i foo orden hodi Nai Jesus Kristu nia naran dehan, sira nee tenki halo serbisu hodi foo haan sira nia aan rasik.

¹³ Maun-alin sira, imi la bele baruk halo buat nebee loos.

¹⁴ Se iha ema ruma mak lakohi halo tuir buat nebee ami hakerek iha surat nee, la bele ransu ho nia, para halo nia moe.

¹⁵ Mas la bele konsidera nia hanesan inimigu, maibee foo hanoin ba nia hanesan imi nia maun-alin rasik.

Paulo taka nia surat

¹⁶ Hau harohan atu Nai Jesus foo paz ba imi iha situasaun saida deit. Tan Nia mak paz nia huun. I hau husu atu Nai Jesus sempre hamutuk ho imi.

¹⁷ Liafuan tuir mai nee, hau, Paulo, mak hakerek ho hau nia liman rasik: Kumprimentus. Hau halo hanesan nee iha hau nia surat hotu-hotu, para ema bele hatene katak surat nee hosi hau duni.

¹⁸ Grasa hosi Nai Jesus Kristu, ita nia Nai, hamutuk ho imi hotu. Hosi hau, Paulo