2 Tesalonika 1 - Biblia Tetun Dili

Paulo hahuu nia surat

¹ Surat nee hosi hau, Paulo, ho hau nia kolega Silas ho Timóteo. Ami hatoo kumprimentus ba kristaun sira iha sidade Tesalónika. Imi laran ida ho ita nia Aman Maromak ho Nai Jesus Kristu.

² Grasa no paz hosi ita nia Aman Maromak, no hosi Nai Jesus Kristu hamutuk ho imi.

Paulo agrade ba Nai Maromak

³ Maun-alin sira, ami sempre agradese ba Nai Maromak tanba imi kristaun sira iha Tesalónika. Ami tenki halo nunee duni, tanba imi nia fiar ba Kristu aumenta ba bebeik, i imi mos hadomi malu liu tan.

⁴ Nee mak ami konta ba kristaun sira iha nebee-nebee kona ba imi. Ami konta ho haksolok dehan, maski ema hanehan i halo terus imi, maibee imi pasiensia i fiar metin nafatin ba Nai Jesus.

⁵ Nee hotu hatudu prova katak, Nai Maromak sei tesi lia ho loos. Nunee, Maromak nudar Liurai Boot sei konsidera imi serve duni atu sai membru iha reinu Maromak nian. Tanba imi serbii Liurai nee mak imi terus nunee.

⁶ La bele tauk, Maromak sempre tesi lia ho loos. Loron ida Nia sei halo terus fali ema nebee halo terus imi.

⁷ Nia sei foo kamaan ba imi nebee terus, ho mos ba ami. Buat sira nee sei sai duni bainhira Nai Jesus mosu mai hosi lalehan ho Nia anju sira nebee forsa teb-tebes.

⁸ Sira sei tuun mai ho ahi lakan boot. I Jesus sei fakar Nia hirus ba ema sira nebee lakohi hatene Nai Maromak i lakohi halo tuir Nai Jesus Kristu nia Novidade Diak.

⁹ Nia sei foo kastigu todan ba sira hotu too rahun tinan ba tinan. Nia duni sai sira hosi Nia oin. Nunee sira sei la haree tan ona Maromak nia naroman nabilan.

¹⁰ Buat sira nee sei akontese bainhira Jesus fila fali mai. Nia povu sei foti aas Nia naran, i ema hotu-hotu nebee fiar ba Nia sei adora Nia. Imi mos sei halo parte, tanba imi simu ona Nai Maromak nia Novidade Diak, nebee uluk ami foo sai ona ba imi.

¹¹ Nee mak ami halo orasaun ba imi loron-kalan, atu Nai Maromak, nebee bolu imi sai Nia ema, bele konsidera imi serve duni atu tuir Nia. Imi nia fiar ba Jesus halo imi hakarak halo buat nebee diak. Ami husu ba Nai Maromak foo kbiit ba imi atu bele halo duni buat diak sira nee hotu.

¹² Nunee, ema sei foti aas Nai Jesus nia naran tanba imi. I Nia mos sei foti aas imi nia naran. Buat sira nee hotu sei sai nunee, tanba ita nia Maromak ho ita nia Nai Jesus Kristu sira nia grasa.