2 Pedro 2 - Biblia Tetun Dili

Profeta ho Mestri falsu sira

¹ Uluk profeta falsu mosu iha povu Israel nia leet. Nunee mos agora, iha mestri falsu iha hela imi nia leet. Sira sei hanorin doutrina falsu nebee lori ba mate, no mos nega ita nia Nai Jesus. Afinal Nia mak sosa kotu tiha ona ita. La kleur mestri sira nee sei rahun hotu.

² Maski nunee, ema barak sei tuir mestri falsu sira nee hodi halo arbiru too la hatene moe. Bainhira ema seluk haree sira nia hahalok aat nee, sira sei hatete aat Maromak nia dalan loos.

³ Mestri falsu sira nee karakteen liu. Sira inventa istoria tuun-sae para haan-matak imi. Maibee hori uluk kedas Maromak desidi ona atu kastigu sira, i la kleur tan sira sei rahun.

⁴ Hanoin took! Uluk bainhira anju balu halo sala, Maromak kastigu sira i soe sira ba infernu. Iha nebaa sira sai dadur iha rai kuak klean nakukun hodi hein too Maromak julga sira.

⁵ Nunee mos Maromak kastigu ema sira nebee moris iha Noé nia tempu uluk. Iha tempu nebaa Maromak halo rai nabeen hodi halo mate ema hotu nebee la interese Nia. Maromak salva deit Noé ho nia familia ema nain hitu. Noé nee ema ida nebee foo sai lia loos.

⁶ Nunee mos povu sidade Sodoma ho Gomora. Nai Maromak kastigu sidade rua nee ho ahi too sai tiha akudesan hotu. Nee hanesan ezemplu ida hodi hatudu katak, Maromak sei foo kastigu todan ba ema nebee mak la interese Nia.

⁷ Iha tempu nebaa Maromak salva deit Ló. Ló nee ema ida ke moris loos, i nia laran tristi teb-tebes tanba povu kontra buat nebee mak loos hodi moris iha sala foer nia laran.

⁸ Maski Ló moris loos, maibee nia moris iha ema aat sira nia leet. Loro-loron nia haree i rona bebeik sira nia hahalok aat sira nee, halo nia laran susar teb-tebes.

⁹ Ezemplu hirak nee hatudu katak, Nai Maromak salva ema nebee mak halo tuir Nia hakarak, bainhira sira hasoru tentasaun. Nia mos foo kastigu ba ema nebee mak moris la loos, hodi hein too tempu atu Nia tesi ema hotu-hotu nia lia.

¹⁰ Kastigu nebee todan liu sei monu ba ema nebee toman halo buat foer tuir sira nia hakarak aat i hatete aat ema hotu nebee kaer ukun.

¹¹ 10b Mestri falsu sira nee la tauk ema ida. Sira foti aan liu, too sira mos brani atu koalia aat Maromak nia anju sira. 11. Afinal anju sira nee boot liu i forsa liu mestri falsu sira. Maski nunee anju sira la hatete aat mestri falsu sira nee iha Nai Maromak nia oin.

¹² Maibee mestri falsu sira nee gosta hatete aat buat nebee mak sira rasik la komprende. Sira hanesan animal nebee la iha neon nebee tuir deit sira nia hakarak rasik. Sira hanesan animal nebee hahoris deit too ikus tama ba lasu i rahun.

¹³ Maromak sei foo terus ba sira tuir terus nebee mak sira foo ona ba ema seluk. Mestri falsu sira nee, buka halo sira nia aan kontente liu hosi haan-hemu no iha relasaun ho feto sira, maski iha loron. I bainhira sira haan hamutuk ho imi mos, sira halo tuir deit sira nia hakarak aat. Sira nia hahalok nee halo moe deit ita.

¹⁴ Sira nia matan halai tuun-sae hodi buka feto para hodi halo sala foer ho sira. Sira sempre kaan atu halo sala. Sira buka ema nebee mak fiar seidauk metin hodi lohi ema nee para lao sala dalan. Sira ema karak-teen. Nee mak Nai Maromak foo ona malisan ba sira!

^15-16 15 Sira sees ona hosi dalan loos hodi tuir fali Balaão, Beor nia oan. Balaão nee gosta buka osan liu hosi nia hahalok aat. 16 Maibee iha loron ida, Maromak halo Balaão nia kuda buru derepenti deit koalia makaas para nia la bele halo tan nia hahalok aat. Afinal kuda buru nee la bele koalia, maibee nia koalia hanesan fali ema hodi impede profeta nee nia laran toos.

¹⁷ Mestri falsu sira nee hanesan bee matan nebee maran. Sira hanesan abu-abu nebee anin huu lakon tiha. Maromak prepara tiha ona ba sira fatin ida nebee klean i nakukun liu.

¹⁸ Tanba sira tebe rai loos, maibee koalia liafuan mamuk deit. Sira gosta buka ema nebee mak foin komesa husik nia sala, hodi dada ema sira nee para moris tuir fali sala seksual saida deit mak ema nee kaan atu halo.

¹⁹ Mestri falsu sira nee promete katak ema nebee tuir sira sei moris livre. Afinal sira rasik sai tiha ona atan ba sira nia hahalok aat. Tanba buat nebee mak ukun ema, ema nee sai atan ba buat nee.

²⁰ Ema nebee konhese ona Nai Jesus Kristu ita nia Salvador, nia husik tiha ona buat aat iha mundu nee. Maibee se nia monu fali ba hahalok aat too hahalok nee ukun fali nia, entaun too ikus nia moris aat liu fali uluk nian.

²¹ Diak liu ema nee la hatene lia loos, duke nia hatene tiha maibee too ikus fila kotuk fali ba Maromak nia ukun fuan nebee hatoo tiha ona ba nia.

²² Iha ema soe lia nunee: “Bainhira asu muta, nia rasik sei lambe fila fali.” Iha mos seluk dehan, “Fahi nebee foo hariis moos tiha ona sei duir aan fali iha tahu laran.”