2 Pedro 1 - Biblia Tetun Dili

Pedro hahuu nia surat

¹ Surat nee hosi hau, Simão Pedro, nudar Jesus Kristu nia atan ho mos Nia apostolu. Hau hakerek surat nee ba imi nebee simu tiha ona fiar ida ke folin boot, hanesan mos ami. Imi simu fiar nee tanba Jesus Kristu sempre halo buat nebee mak loos. Nia mak ita nia Maromak ho ita nia Salvador.

² Loron ba loron Nai hatudu Nia laran diak ba imi i foo paz ho hakmatek ba imi. Imi sei simu buat sira nee tanba imi konhese ona Nai Maromak i konhese mos ita nia Nai Jesus.

Hakaas aan hodi moris loos

³ Ita konhese ona Nai Maromak. Tanba nee, hosi Nia kbiit rasik Nia foo mai ita saida deit mak ita presiza atu ita bele moris loos tuir Nia hakarak. Nia mos bolu ona ita sai Nia ema, tanba Nia mak Maromak forsa teb-tebes i diak duni.

⁴ Hosi Nia forsa ho Nia diak nee mak Nia foo mai ita promesa nebee boot ho folin teb-tebes. Hodi Nia promesa nee mak ita bele livre tiha hosi hakarak aat hotu-hotu nebee estraga ema iha mundu nee nia moris, i ita nia laran bele sai santu.

⁵ Tanba nee imi tenki hakaas aan para moris loos para halo kompletu imi nia fiar. Moris loos ho hatene deit seidauk too.

⁶ Imi mos tenki domina aan i hatene aguenta nafatin, i moris halo tuir Maromak nia hakarak.

⁷ Laos nee deit, imi mos tenki laran diak ba imi nia maluk sira nebee fiar ba Jesus, i hatudu mos domin ba ema hotu-hotu.

⁸ Se hahalok diak sira nee hotu buras ba bebeik iha imi nia moris, entaun imi sei konhese diak liu tan ita nia Nai Jesus Kristu, i imi nia moris iha folin i la saugati.

⁹ Maibee se ema ruma la moris tuir buat diak sira nee, entaun nia la haree saida mak iha nia oin, nia hanesan fali ema matan delek. Nia haluha katak Maromak hamoos tiha ona nia sala uluk nian.

¹⁰ Nee duni maun-alin sira, sai badinas liu tan para hahalok diak sira nee buras iha imi nia moris. Hahalok nee hatudu katak Maromak hili tiha ona imi i bolu tiha ona imi para sai Nia ema. Se imi moris nunee, imi sei la husik imi nia fiar,

¹¹ i aban-bainrua Nai Maromak sei simu imi ho laran tomak hodi tama iha Jesus Kristu nia reinu. Jesus Kristu mak ita nia Nai no ita nia Salvador, i Nia ukun la hotu la remata.

Razaun ba Pedro hakerek surat nee

¹² Imi hatene buat sira nee ona, imi mos hamriik metin ona tanba imi fiar ba buat nebee mak loos. Maski nunee maibee hau hakarak foo hanoin fila-fila ba imi.

¹³ Hau hanoin hau iha obrigasaun para foo hanoin buat sira nee ba imi durante hau sei moris iha mundu.

¹⁴ Tanba hau hatene katak la kleur tan hau sei mate, tuir saida mak ita nia Nai Jesus Kristu foo sai tiha ona ba hau.

¹⁵ Nunee hau hakaas aan para foo hatene buat sira nee ba imi para aban-bainrua hau mate, imi la bele haluha.

Pedro rasik haree Nai Jesus nia naroman nabilan

¹⁶ Uluk ami foo sai ba imi katak ita nia Nai Jesus Kristu sei fila fali mai hosi lalehan ho kbiit boot. Momentu nebaa ami laos konta tuir ai-knanoik nebee mak ema inventa. Maibee ami rasik haree Nia kbiit nee ho matan,

^17-18 bainhira ami hamutuk ho Nia iha Maromak nia foho santu. Iha nebaa Aman Maromak rasik foo respeitu i foti aas Jesus nia naran iha ami nia oin. Ami rona Maromak Aas Liu nia lian tuun mai hosi lalehan dehan, “Nee Hau nia Oan doben. Nia halo haksolok Hau nia laran.”

¹⁹ Nee hatudu mai ita katak buat nebee Maromak nia profeta sira uluk koalia kona ba Jesus Kristu loos duni. Nunee imi tenki see tilun hodi rona didiak liafuan sira nebee profeta sira foo sai. Tanba sira nia liafuan nee hanesan ahi oan nebee foo naroman iha fatin nakukun, too fitun dadeer san mosu hodi foo naroman ba imi.

²⁰ Liu-liu imi tenki hatene katak, profeta sira nia lia menon nebee hakerek iha Livru Sagradu, laos mai hosi ema nia matenek rasik.

²¹ Tanba profeta sira nia lia menon nunka mai hosi ema mundu nee nia hakarak. Maibee sira hatoo liafuan hosi Maromak tuir saida mak Espiritu Santu hatudu ba sira.