2 Korintu 9 - Biblia Tetun Dili

Osan oferta ba sarani sira iha Jerusalém

¹ Kona ba foo ajuda ba sarani sira iha Jerusalém, tuir loloos hau la presiza hakerek ba imi.

² Tanba hau hatene imi hakarak teb-tebes atu ajuda. Hau mos konta bebeik imi nia diak ba ema Masedónia sira. Hau konta ba sira katak, tinan liu ba, imi iha provinsia Akaia prontu ona atu foo ajuda. Rona nunee, sira barak mos hakarak foo sira nia kontribuisaun.

³ Hau hein katak imi nia osan oferta prontu duni, tuir hau konta ona ba sira. Tanba nee mak hau haruka maluk sarani sira nee baa iha imi atu haree kona ba ida nee. Hau lakohi atu buat nebee hau konta ba sira nee saugati deit.

⁴ Keta halo be ema Masedónia lao hamutuk ho hau baa vizita imi, i sira haree imi nia osan seidauk tau hamutuk. Se nunee ami moe tanba ami fiar ba imi saugati deit. I imi sei moe liu tan!

⁵ Tanba nee hau desidi katak, diak liu hau haruka ita nia maluk sarani sira nee baa uluk iha imi, atu ajuda imi prepara osan oferta nee tuir buat nebee imi uluk promete tiha ona. Nunee oferta nebee imi foo nee, imi bele foo ho laran, laos tanba obriga.

⁶ Keta haluha, ema nebee kuda fini ituan, nia sei hetan ituan. Ema nebee kuda fini barak, nia sei hetan barak.

⁷ Ema ida-idak tenki desidi rasik, nia atu foo hira. La bele foo ho laran todan ka ema mak obriga, tanba Maromak hadomi ema nebee foo ho haksolok.

⁸ Maromak iha kbiit hodi foo bensaun oi-oin ba imi. Nunee buat nebee imi presiza imi sei hetan hotu, i liu fali imi nia presiza, para imi mos bele ajuda ema seluk.

⁹ Nee hanesan hakerek ona iha Livru Sagradu dehan, “Nia fahe buat bar-barak ba ema kiak sira, Nia lia loos nee iha nafatin too tinan ba tinan.”

¹⁰ Maromak mak foo fini ba toos nain kuda, i Nia mak foo ai haan ba ita haan. Nunee mos Nia sei foo bensaun ba imi, i aumenta bensaun nee loron ba loron, atu nunee lia loos iha imi nee aumenta ba bebeik.

¹¹ Maromak sei halo imi riku iha buat oi-oin, atu nunee imi mos bele fahe ho laran luak. I osan oferta nebee imi foo liu hosi ami, sei halo ema barak foo agradese ba Maromak.

¹² Imi nia ajuda nee laos deit hataan Maromak nia povu santu nia presiza, maibee ema barak sei foo obrigadu ba Maromak tanba imi nia hahalok nee.

¹³ Imi foo sai tiha ona katak imi fiar ba Novidade Diak kona ba Kristu. Liu hosi ajuda nebee imi foo nee, imi hatudu katak imi moris tuir duni Novidade Diak. Ema barak sei haree imi nia laran luak nee, i sira sei hahii Maromak tanba ajuda nebee imi foo ba sira ho mos ba ema seluk.

¹⁴ Bainhira sira halo orasaun ba Maromak hodi tulun imi, sira hanoin teb-tebes imi, tanba Maromak nia grasa nebee nakonu iha imi.

¹⁵ Agradese ba Maromak tanba Nia foo ona Nia grasa mai ita, ita la bele esplika ho ita ema nia liafuan.