2 Korintu 8 - Biblia Tetun Dili

Foo ho laran

¹ Maun-alin sira, ami hakarak atu imi hatene Maromak nia grasa ba sarani sira iha provinsia Masedónia.

² Maski sira hetan provasaun liu hosi terus oin-oin, sira haksolok nafatin. Maski sira kiak rabat rai, sira foo oferta ho laran haksolok.

³ Hau rasik bele foo sasin dehan, sira foo tuir sira nia kbiit, too foo liu tan sira nia kbiit. Ida nee tuir sira nia desizaun rasik, laos ema obriga.

⁴ Sira nee husu bebeik atu sira mos bele foo kontribuisaun ba sarani sira iha Jerusalém nebee hetan susar.

⁵ Sira mos foo liu fali buat nebee ami hanoin. Tanba primeiru sira foo sira nia aan ba Nai Maromak, depois sira mos foo aan ba ami, tuir Maromak nia hakarak.

⁶ Tanba nee ami husu atu Tito baa fali iha Korintu hodi ajuda imi atu imi prepara hotu osan nebee imi atu foo nee. Tanba uluk nia mak foo dalan ba imi atu halao karidade ida nee.

⁷ Durante nee imi halo buat hotu-hotu ho diak teb-tebes. Imi fiar metin, imi matenek koalia, imi hatene klean, imi badinas tuir Maromak, i imi hadomi teb-tebes ami. Nunee agora hau husu ba imi atu foo mos kontribuisaun nee ho laran luak.

⁸ Hau laos manda imi atu halo ida nee. Maibee hau hakarak kompara imi ho sarani sira seluk nebee badinas ajuda, atu nunee hau bele hatene imi nia domin ba ema seluk too iha nebee.

⁹ Tanba imi hatene ita nia Nai Jesus Kristu nia grasa nebee Nia hatudu ba imi. Maski Nia riku iha lalehan, Nia halo Nia Aan sai ema kiak tanba hadomi imi. Nia sai kiak atu imi bele sai riku iha buat barak.

¹⁰ Hau nia sujestaun mak nee: tinan liu baa, imi mak hahuu tau osan hamutuk hodi foo ba sarani sira iha Jerusalém. Laos nee deit, maibee imi mos sarani primeiru nebee hakarak foo. Entaun hau foo hanoin ba imi nunee: Diak liu

¹¹ imi prepara hotu osan nebee mak imi atu foo. Uluk imi hakarak ho laran atu foo, agora halo tuir imi nia hakarak nee. Foo tuir buat nebee imi iha.

¹² Tanba se imi foo ho laran tuir buat nebee imi iha, Maromak simu. Buat nebee mak imi la iha, lalikan foo.

¹³ Hau nia hanoin laos atu halo todan imi hodi halo ema seluk kamaan fali. Maibee hau hakarak atu ema hotu bele moris hanesan.

¹⁴ Agora dadauk imi iha barak, i imi bele ajuda maluk sarani sira nebee iha ituan. Se aban-bainrua imi presiza buat ruma, sira mos bele foo ba imi. Ho nunee ema hotu bele moris hanesan.

¹⁵ Nee tuir buat nebee hakerek ona iha Livru Sagradu dehan, “Ema nebee hetan barak, sei la resin. Ema nebee hetan ituan, sei la falta.”

Paulo haruka Tito baa iha Korintu

¹⁶ Hau agradese ba Maromak, tanba Nia mak halo Tito hakarak ajuda imi hanesan mos hau hakarak ajuda.

¹⁷ Ami husu ona Tito atu baa vizita imi, i nia simu ho fuan laran tomak. Afinal nia mos hakarak atu baa.

¹⁸ Ami mos haruka maluk sarani ida tan atu akompanha Tito. Sarani sira hotu gaba nia, tanba nia badinas foo sai Novidade Diak.

¹⁹ Laos ida deit, sira mos hili nia atu akompanha ami bainhira ami lori osan oferta ba iha Jerusalém. Ami halao serbisu nee atu foti aas ita nia Nai nia naran i hatudu katak ami mos hakarak ajuda sira.

²⁰ Ami kuidadu teb-tebes ho osan barak nebee imi atu foo nee, para ema la bele duun ami dehan ami kaer osan la loos.

²¹ Ami hakaas aan atu halo buat nebee loos iha Nai Maromak nia oin ho mos iha ema nia oin.

²² Ami mos haruka maluk sarani ida tan hamutuk ho Tito no nia kolega nee. Dala barak ona ami haree nia nee badinas halao Maromak nia serbisu. Agora nia hakarak liu tan atu ajuda imi, tanba nia fiar loos ba imi.

²³ Se iha ema ruma husu kona ba Tito, foo hatene katak Tito nee hau nia kolega nebee serbisu hamutuk ho hau hodi ajuda imi. Kona ba maluk nain rua nee, sarani sira iha nee mak haruka, i sira nain rua nia hahalok foti aas Kristu nia naran.

²⁴ Nee duni imi tenki hatudu domin ba ema sira nee, atu sarani sira iha fatin-fatin mos bele haree imi nia domin. Nunee sira hatene katak ami laos gaba imi saugati deit.