2 Korintu 7 - Biblia Tetun Dili

¹ Maluk doben sira, Maromak promete tiha ona buat sira nee ba ita. Tanba nee, mai ita hamoos ita nia aan hosi buat nebee hafoer ita nia isin no klamar. Ita tenki hamoos tutuir nafatin halo ita nia laran moos liu, tanba ita hamtauk Maromak.

Paulo nia haksolok

² Hau husu atu imi simu ami ho laran. Tanba ami nunka halo sala hasoru ema ida, ami nunka lori ema ida ba buat aat, ami nunka han-matak ema ida nia sasaan.

³ Hau hatete nunee laos atu foo sala ba imi. Ohin hau dehan tiha ona katak ami hadomi imi. Atu ami mate ka moris, imi nafatin iha ami nia laran.

⁴ Hau fiar imi, i imi halo hau orgulhu teb-tebes. Imi hametin hau nia laran. Maski ami hetan susar oi-oin, maibee hau nia laran haksolok liu tanba imi.

⁵ Uluk bainhira ami too mai iha provinsia Masedónia, ami kolen atu mate. Ami hasoru susar hosi fatin-fatin, susar nee hosi ami nia laran ho mos hosi liur. Hosi laran ami tauk, hosi liur ema kontra ami.

⁶ Maibee Maromak sempre foo ksolok ba ema nebee laran susar. Nia mos foo ksolok mai ami bainhira Nia haruka Tito mai iha ami.

⁷ Ami nia laran haksolok nee laos deit tanba Tito mai ona, maibee tanba nia konta katak imi hametin nia laran bainhira nia hamutuk ho imi. Nia mos dehan, imi hakarak teb-tebes atu hasoru malu fali ho hau, imi tristi loos ho problema nebee mak akontese iha imi nia leet, i imi hakarak loos atu suporta hau. Rona nunee, hau nia laran haksolok liu tan.

⁸ Hau nia liafuan iha surat ida uluk makaas kontra imi, too halo imi nia laran tristi. Iha momentu nebaa hau mos preokupa, tanba hau hatene katak hau nia liafuan nee xoke imi nia fuan, maibee la kleur ida. Nunee agora hau la preokupa tan.

⁹ Hau kontenti, maibee laos kontenti tanba hau uluk halo imi laran tristi. Hau kontenti tanba imi nia laran tristi nee halo imi hakribit ona imi nia sala. Nee dehan katak imi nia tristi nee tuir Maromak nia hakarak. Entaun ami nia surat ida uluk nee la halo imi tristi saugati deit.

¹⁰ Tristi tuir Maromak nia hakarak halo ita hakribit ita nia sala, nebee lori ita ba salvasaun, i la preokupa tan ona ita nia sala nee. Maibee tristi tuir mundu nian la halo ita hakribit ita nia sala, nunee lori ita ba mate.

¹¹ Haree baa! Imi nia laran tristi tuir Maromak nia hakarak nee lori imi ba buat nebee diak. Agora imi foo aan atu moris loos, imi hakaas aan halo morin imi nia naran, imi hakribit hahalok aat, i tauk atu halo sala. Imi hakarak teb-tebes atu haree hau, i imi mos hakarak teb-tebes atu ema nebee halo sala tenki hetan kastigu. Iha buat sira nee hotu imi hatudu katak imi halo buat nebee loos.

¹² Entaun hau hakerek surat ida uluk nee laos atu dehan see mak halo sala hasoru see. Maibee hau hakerek atu imi rasik bele haree katak imi foo laran ba ami. Maromak mos haree nunee.

¹³ Buat sira nee hotu hametin ami nia laran. Laos nee deit, maibee ami mos haksolok teb-tebes bainhira ami haree Tito fila mai ho kontenti tanba imi haree nia diak hodi halo kamaan nia laran.

¹⁴ Molok Tito baa vizita imi, hau konta tiha ona ba nia kona ba imi nia diak. Nia too iha nebaa, nia rasik haree katak buat nebee hau konta ba nia nee loos duni, hanesan mos hau nia liafuan ba imi durante nee sempre loos. Nunee imi la halo moe hau.

¹⁵ Agora Tito nia domin ba imi boot liu, tanba nia hanoin nafatin oinsaa imi rona nia i simu nia ho respeitu ho tauk.

¹⁶ Hau nia laran haksolok tanba hau bele foo fiar ba imi iha buat hotu.