2 Korintu 6 - Biblia Tetun Dili

¹ Tanba ami serbisu hamutuk ho Maromak, nunee ami husu atu imi la bele fila kotuk ba Maromak nia grasa nebee imi simu ona.

² Tanba iha Livru Sagradu Maromak dehan, “Iha tempu nebee Hau desidi, Hau rona ona o. Hau sei ajuda o, iha loron salvasaun.” Hanoin didiak! Tempu nebee Maromak desidi mak agora nee. Loron atu Nia salva ema mak agora.

Paulo hetan terus tanba tuir Nai Jesus

³ Ami hakaas aan atu ami nia hahalok la bele halo ema seluk monu, atu nunee ema la bele hatete aat ami nia serbisu.

⁴ Nunee, iha buat saida deit, ami sempre hatudu katak ami nee Maromak nia atan duni. Ami hetan susar no terus, i hasoru problema oi-oin, maibee ami aguenta ho pasiensia nafatin.

⁵ Ema baku ami ho xikote, dadur ami iha komarka, i ema ataka ami rame-rame. Ami serbisu too kosar metan suli, ami kalan la toba, i dala barak la haan.

⁶ Ami moris ho laran moos, iha matenek hosi Maromak, iha pasiensia, halo diak ba ema, sadere ba Espiritu Santu, i hadomi ema ho laran.

⁷ Ami sempre koalia lia loos, i Maromak nia kbiit serbisu iha ami. Nunee ami hanesan soldadu nebee kaer ekipamentu funu nian iha ami nia liman loos hodi ataka no liman karuk hodi defende.

⁸ Atu ema respeita ami ka hatuun ami, atu ema gaba ami ka hatete aat ami, ami la hakiduk. Maski ema bolu ami bosok-teen, ami sempre koalia lia loos, no ema fiar.

⁹ Ami ema la konhese, maibee ami naran boot. Ami atu mate sal-sala, maibee moris hela. Ami simu kastigu todan, maibee la mate.

¹⁰ Ami laran tristi, maibee haksolok nafatin. Ami kiak, maibee halo ema barak sai riku. Ami buat ida la iha, maibee ami iha buat hotu-hotu.

¹¹ Maluk Korintu sira, ami koalia momoos ona ba imi, i ami nia laran nakloke hodi hadomi imi.

¹² Ami hatudu ona ami nia domin ba imi, maibee imi la hatudu domin mai ami.

¹³ Nunee agora hau husu ba imi hanesan hau husu ba hau nia oan rasik, atu imi mos bele loke imi nia laran mai ami.

La bele kesi metin ho ema nebee la fiar ba Kristu

¹⁴ La bele kesi metin ho ema nebee la fiar ba Kristu. Hanoin took. Ema nebee moris loos bele par ho ema nebee halo buat aat ka? Naroman bele hamutuk ho nakukun ka? Lae!

¹⁵ Kristu ho diabu hanoin hanesan ka? Ema nebee fiar ba Kristu, sira nia moris hanesan ho ema nebee la fiar ba Kristu ka? Lae!

¹⁶ Buat lulik bele tau fali iha Maromak nia Uma Kreda Boot ka? Lae! Ita nee mak Maromak nebee Moris nia uma kreda. Iha Livru Sagradu Maromak dehan, “Hau sei hela iha sira nia klaran, i moris hamutuk ho sira. Hau sei sai sira nia Maromak, i sira sei sai Hau nia povu.”

¹⁷ Nai Maromak dehan tan, “Nee duni imi tenki sai hosi ema aat sira nia klaran, i haketak aan hosi sira. Hadook aan hosi buat nebee Hau hakribit, nunee mak Hau sei simu imi.”

¹⁸ “Hau sei sai imi nia Aman, i imi sei sai Hau nia oan mane no oan feto. Ida nee mak Nai Maromak Forsa teb-tebes nia liafuan.”