2 Korintu 5 - Biblia Tetun Dili

Ita nia hela fatin iha lalehan

¹ Ita hatene katak, ita nia isin lolon agora nee hanesan tenda ida nebee loron ida sei naksobu. Maibee Maromak prepara tiha ona fatin diak ida iha lalehan ba ita, i fatin nee rohan laek. Fatin nee laos ema mak halo, maibee Maromak mak halo.

² Bainhira ita sei moris iha mundu nee, ita halerik, tanba ita hakarak teb-tebes atu hetan isin lolon foun iha lalehan.

³ Bainhira ita too ona iha lalehan, nee hanesan ita la molik ona, maibee ita hatais ropa foun. Tanba ita laos espiritu deit, maibee ita mos hetan isin lolon foun iha nebaa.

⁴ Durante ita sei moris iha tenda mundu nian, ita halerik tanba moris iha mundu nee todan. Maski nunee, ita lakohi atu husik isin lolon mundu nian. Afinal, ita mos hakarak hetan fali isin lolon lalehan nian, atu nunee ita nia isin nebee sei mate nee, troka ho isin nebee moris tinan ba tinan.

⁵ Maromak rasik mak prepara ita atu hetan isin lolon foun nee. Nia mos foo ona Nia Espiritu mai ita atu ita laran metin katak, Nia sei foo tan buat hotu-hotu nebee Nia promete ona.

⁶ Tanba nee ita brani nafatin. Ita hatene katak, durante ita sei iha ita nia isin lolon mundu nian, ita seidauk hela hamutuk ho ita nia Nai iha lalehan.

⁷ Ita moris laos liu hosi buat nebee mak ita bele haree ho matan, maibee liu hosi ita nia fiar ba Maromak.

⁸ Nunee ita fiar nafatin. Tuir loos ita hakarak atu husik tiha ita nia isin lolon mundu nian hodi baa hela hamutuk ho ita nia Nai iha lalehan.

⁹ Tanba nee, atu ita sei moris iha mundu nee ka ita husik ona mundu, ita nia hakarak mak nee: atu halo haksolok ita nia Nai nia laran.

¹⁰ Tanba aban-bainrua ita hotu sei hamriik iha Kristu nia futar oin para Nia tesi ita nia lia. I ita ida-idak sei simu tuir saida mak ita halo ona iha mundu nee, tuir saida mak ita halo diak ka aat.

Maromak nia atan nebee lori dame

¹¹ Ami hamtauk ba ita nia Nai. Tanba nee, ami hakaas aan dada ema seluk atu fiar ba Maromak. Nia hatene loloos ami nia laran, hau hein katak imi mos hatene.

¹² Ami laos atu gaba aan iha imi nia oin. Maibee ami hakarak foo oportunidade ba imi, para imi bele orgulhu ho ami. Nunee bainhira ema seluk orgulhu ba buat nebee sira haree hosi liur, laos haree ba laran, imi bele koalia hataan sira.

¹³ Karik imi hanoin ami nee hanesan ema bulak, husik baa. Afinal ida nee hodi foo gloria ba Maromak. Dala ruma imi konsidera ami ema nebee domina aan. Ami halo hanesan nee hodi serbii imi.

¹⁴ Bele halo nusaa mos Kristu nia domin ukun nafatin ami nia moris. Tanba ami fiar katak Kristu mate tiha ona iha ema hotu nia fatin. Nunee bele dehan ita hotu mos mate hotu ona ho nia.

¹⁵ Kristu mate ba ita hotu, atu ita hotu nebee moris iha mundu nee la bele tuir ona ita nia hakarak rasik. Maibee ita tenki moris tuir Kristu nia hakarak, tanba Kristu mate i moris fila fali ba ita.

¹⁶ Tanba nee, komesa agora ami la julga tan ema nia moris tuir sasukat mundu nian. Uluk ami julga duni Kristu nunee, maibee agora lae ona.

¹⁷ Ema nebee laran ida ho Kristu sai ona ema foun. Nia moris ida uluk nee la iha ona, troka tiha ona ho moris foun.

¹⁸ Maromak mak halo ida nee. Nia halo ona ita dame malu ho Nia liu hosi Kristu. Depois Nia foo knaar mai ami hodi lori ema seluk mos dame malu ho Nia.

¹⁹ Nunee ami foo sai katak liu hosi Kristu, Maromak halo ema iha mundu nee dame malu fali ho Nia, Nia la sura ona ita nia sala. Nia mos foo fiar mai ami atu haklaken kona ba dame nee.

²⁰ Ami nee Kristu mak haruka. Nunee bainhira ami foo sai Maromak nia hakarak, nee hanesan Maromak rasik mak koalia liu hosi ami. Hodi Kristu nia naran, ami husu ho laran atu imi foo imi nia aan ba dame ho Maromak.

²¹ Kristu rasik nunka iha sala. Maibee Maromak halo Nia lori ita nia sala hotu, atu ita nebee laran ida ho Kristu, Maromak deklara katak ita moris loos ona.