2 Korintu 4 - Biblia Tetun Dili

Murak mean nebee tau iha sana rai

¹ Maromak hatudu ona Nia domin mai ami hodi haruka ami halao Nia serbisu nee. Tanba nee ami la hakiduk.

² Ami la simu hahalok nebee ema halo sub-subar nebee halo moe. Ami la bosok, i la inventa Maromak nia liafuan. Maibee foo sai lia loos. Ho nunee ami hatudu ba ema hotu katak ami halao ami nia serbisu ho loloos iha Maromak nia futar oin.

³ Maski nunee, ba ema nebee lao dadauk tuir dalan ba mate, Novidade Diak nebee ami foo sai nee sei taka hela ba sira.

⁴ Sira nia maromak mak diabu. I nia mak taka hela ema nebee la fiar nia hanoin, halo sira la bele haree naroman hosi Novidade Diak kona ba Kristu i Nia naroman nabilan makaas teb-tebes. Kristu nee hanesan loloos Maromak.

⁵ Ami haklaken katak Jesus Kristu mak Nai. Ami laos haklaken kona ba ami nia aan rasik, ami so dehan deit katak ami nee imi nia atan tanba ami serbii Jesus.

⁶ Tanba Maromak rasik dehan, “Tenki iha naroman hodi leno iha nakukun laran.” Agora mos Maromak foo Nia naroman hodi leno ita nia laran. Nunee ita bele hatene katak Maromak nee makaas teb-tebes, tanba ita haree naroman nabilan nian iha Kristu nia oin.

⁷ Novidade Diak nee murak mean ida, i ami nee hanesan sana rai deit. Maibee Maromak rai fali murak mean nee iha ami, atu hatudu ba ema hotu katak kbiit boot nee mai hosi Maromak, laos mai hosi ami.

⁸ Ema habit ami hosi sor-sorin, maibee ami la dezanima. Ami hanoin la hetan, maibee la lakon esperansa.

⁹ Ema halo terus ami, maibee Maromak la husik ami mesak. Ema baku ami, maibee la konsege harahun ami.

¹⁰ Ami baa nebee-nebee, sempre lori Jesus nia mate iha ami nia isin lolon, atu nunee ema bele haree Jesus nia moris iha ami nia isin lolon.

¹¹ Iha ami nia moris nee, ami dala barak atu mate sal-sala tanba tuir Jesus. Nunee ema mos haree Jesus nia moris iha ami nia isin lolon nebee sei mate nee.

¹² Nunee ami moris iha mate nia laran, atu nunee imi hela iha moris nia laran.

¹³ Iha Livru Sagradu hakerek dehan, “Hau fiar ba Maromak, nee mak hau koalia.” Ami mos nunee. Ami fiar, nee mak ami koalia.

¹⁴ Tanba ami hatene katak Maromak halo moris fali ona Nai Jesus hosi mate, i Nia mos sei halo ami moris fila fali hosi mate hodi baa hamutuk ho Jesus. I Maromak sei lori ami ho imi hamutuk baa hamriik iha Nia oin.

¹⁵ Buat hotu nebee akontese ba ami nee lori diak ba imi, atu nunee ema nebee senti Maromak nia grasa bele aumenta ba bebeik. Liu hosi nee ema barak liu tan sei foo agradese ba Maromak hodi foti aas Nia naran.

Lalikan preokupa bainhira hasoru mate

¹⁶ Tanba nee ami la dezanima. Maski ami nia isin fraku ba bebeik, maibee loron ba loron Maromak hafoun ami nia laran.

¹⁷ Terus nebee ami hetan agora dadauk nee hanesan buat kamaan ida nebee la kleur sei hotu. Liu hosi terus nee, ami sei moris iha naroman nabilan nian too tinan ba tinan. Kompara ho ida nee, ami nia terus agora nee buat kiik ida.

¹⁸ Nunee ami la hateke ba buat nebee mak ami haree ho matan, tanba buat sira nee sei nabeen hotu. Ami so hateke ba buat nebee ami nia matan la haree, tanba buat sira nee mak la iha rohan.