2 Korintu 3 - Biblia Tetun Dili

Maromak nia aliansa foun diak liu

¹ Karik imi hanoin dehan ami koalia hanesan nee, ami komesa gaba aan. Karik imi hanoin ami hanesan mestri seluk nebee tenki lori surat rekomendasaun foo ba imi ka? Karik imi hanoin ami presiza lori surat rekomendasaun hosi imi atu foo konhese ami iha fatin seluk ka? Lae!

² Tanba imi sira nee mak ami nia surat rekomendasaun nebee rai iha ami nia laran. Ema hotu nebee lee imi nia moris sei hatene katak ami halao duni ami nia serbisu ho diak.

³ Loos duni, imi nee hanesan surat rekomendasaun nebee Kristu rasik hakerek foo mai ami atu lori. Nia laos hakerek ho tinta, i laos hakerek iha fatuk kabelak. Maibee Nia hakerek ho Maromak nebee Moris nia Espiritu iha ita nia laran.

⁴ Ami brani koalia nunee tanba Kristu halo ami laran metin ba Maromak.

⁵ Maibee laos dehan ami bele halo buat ida ho ami nia kbiit rasik. Ami nia kbiit mai hosi Maromak.

⁶ Nia mak foo kbiit mai ami atu foo sai ba ema kona ba Nia aliansa foun. Aliansa foun nee laos foo liu hosi Moisés nia lei nebee hakerek tiha ona, maibee foo liu hosi Maromak nia Espiritu. Tanba lei nebee hakerek nee, se ita la halo tuir, lori ita ba mate. Maibee Maromak nia Espiritu lori ita ba moris rohan-laek.

⁷ Uluk bainhira Maromak hakerek Nia ukun fuan iha fatuk kabelak foo ba Moisés, nia oin sai naroman nabilan tiha, too ema Israel la brani hateke ba nia oin. Naroman nee makaas teb-tebes, maibee la kleur lakon tiha. Se Maromak nia lei nee mai ho makaas hanesan nee,

⁸ entaun aliansa foun nebee Nia Espiritu lori nee makaas liu tan.

⁹ Se lei nebee lori kastigu mai ho naroman makaas, saa tan aliansa foun nebee halo Maromak deklara ona ita ema moris loos iha Nia futar oin.

¹⁰ Lei ida uluk nee makaas duni, maibee Maromak nia aliansa foun makaas liu tan. Kompara ho ida nee, lei uluk nee hanesan fali buat kiik ida.

¹¹ Se lei ida uluk nian nebee troka tiha ona nee mai ho naroman nabilan nian, saa tan aliansa foun nebee dura tinan ba tinan!

¹² Ami laran metin nunee mak ami brani koalia.

¹³ Ami la halo hanesan Moisés. Bainhira nia oin naroman nabilan tiha, nia taka ho hena atu ema Israel la bele hateke ba nia oin, maski naroman nee neneik-neneik lakon tiha.

¹⁴ Maibee ema Israel sira nia hanoin sai beik tiha. Too agora mos, bainhira ema lee Maromak nia lei ho aliansa antigu nian, sira rona hela, maibee hanesan hena ida taka hela sira nia oin. Maibee, bainhira ita fiar ba Kristu mak foin Maromak hasai hena nee.

¹⁵ Nee mak too ohin loron, bainhira sira rona ema lee Maromak nia liafuan, hanesan fali hena taka sira nia hanoin.

¹⁶ Maibee ema nebee mak fila ba ita nia Nai, ita nia Nai sei loke fali nia hanoin.

¹⁷ Ita nia Nai nebee hau temi nee mak Nai Maromak nia Espiritu. Iha nebee deit mak Maromak nia Espiritu iha, iha nebaa iha liberdade.

¹⁸ Agora ita hotu nia oin la taka ona, ema bele haree Nai nia naroman nabilan iha ita. Tanba Maromak nia Espiritu transforma ita nia aan too ita sai hanesan ita nia Nai. Nunee Nia halo naroman nee nabilan ba bebeik iha ita nia aan.