2 Korintu 2 - Biblia Tetun Dili

¹ Hau desidi ona atu la baa vizita fali imi para hau la bele halo imi laran tristi hanesan uluk.

² Se hau baa duni, hau sei halo imi nia laran susar tan. Nunee la iha ema ida mak atu foo ksolok mai hau, tanba imi hotu laran susar ona.

³ Ho razaun ida nee mak hau haruka uluk surat ida hodi foo hanoin ba imi, atu hau baa karik imi la halo hau nia laran susar. Tuir loloos imi halo hau nia laran haksolok. I hau fiar katak, bainhira hau haksolok, imi mos haksolok hamutuk ho hau.

⁴ Iha tempu nebaa hau hakerek ho laran susar no tristi too matan been suli barak. Hau hakerek laos atu halo imi laran susar, maibee atu imi hatene katak hau hadomi imi teb-tebes.

Foo perdaun ba ema nebee hakribit ona nia sala

⁵ Imi nia maluk sarani ida nia hahalok halo hau nia laran susar. Laos hau deit, maibee ba imi hotu, maski imi balu senti laduun todan. Maibee hau lakohi koalia makaas liu kona ba ida nee.

⁶ Imi maioria foti ona desizaun hodi foo disiplina ba nia, i kastigu nee natoon ona ba nia.

⁷ Agora imi tenki foo perdaun ba nia i hametin fali nia laran, atu nia la bele tristi demais too lakon esperansa.

⁸ Nunee hau husu ho laran ba imi para hadomi fila fali ema nee.

⁹ Ho objetivu ida nee mak hau hakerek hau nia surat ida uluk nee hodi koko imi, se imi sei halo tuir buat hotu-hotu nebee hau haruka ka lae.

¹⁰ Se imi foo perdaun ba ema nee, hau mos foo perdaun ba nia. Sala saida deit mak nia halo ita presiza foo perdaun, hau mos foo perdaun iha Kristu nia oin para ajuda imi.

¹¹ Hau foo perdaun atu la bele foo fatin ba Satanás atu hamonu fali ita. Tanba ita hatene hela nia planu aat.

Apostolu sira nia serbisu

¹² Uluk bainhira hau baa iha sidade Troas atu foo sai Novidade Diak kona ba Kristu, Nai Maromak loke dalan ba hau hodi serbisu iha nebaa.

¹³ Maibee hau nia laran la hakmatek tanba hau la hasoru hau nia maluk sarani Tito iha nebaa. Entaun hau sai hosi Troas hodi baa iha provinsia Masedónia.

Kristu mak halo ita manaan

¹⁴ Maibee agradese ba Maromak! Ami nebee uluk Nia inimigu, agora Nia halo ami sai laran ida ho Kristu hodi lori ami tutuir Nia. Ho nunee ema hotu-hotu haree katak Kristu mak manaan. Agora Nia uza fali ami hodi foo sai kona ba Kristu iha nebee-nebee deit, nunee ita sai hanesan mina morin nebee foo morin duni.

¹⁵ Ami hanesan Kristu nia mina morin nebee halo haksolok Maromak nia laran. Ema nebee lao dadauk tuir dalan mate nian ho ema nebee lao tuir dalan salvasaun, sira senti hotu.

¹⁶ Ba ema nebee lao dadaun tuir dalan mate nian, sira senti ami nee hanesan buat dois ida nebee lori sira ba mate. Maibee ba ema nebee lao tuir dalan salvasaun, ami nee hanesan buat morin ida nebee lori sira ba moris rohan-laek. See mak serve atu halo serbisu nee?!

¹⁷ Iha mestri barak mak hanorin Maromak nia liafuan ho objetivu atu manaan osan deit. Maibee ami la hanesan sira. Ami nee hanorin ho laran moos hodi Kristu nia naran, tanba Maromak mak haruka ami, i Nia haree hela ami.