2 Korintu 13 - Biblia Tetun Dili

Paulo nia lia menon ikus

¹ Ida nee ba dala tolu ona hau atu baa vizita imi. Hau sei tesi imi nia lia tuir liafuan nebee hakerek iha Livru Sagradu dehan, “Bainhira tesi lia, tenki iha ema nain rua ka tolu nebee foo sasin hanesan foin bele hakotu lia.”

² Iha hau nia vizita segundu ba imi nee, hau foo hanoin kedas ona kona ba ema nebee halo sala. Agora liu hosi surat nee, hau repete fali ba sira ho mos ba imi hotu katak, bainhira hau fila fali ba nebaa, hau sei foo disiplina ba see-see deit mak halo sala.

³ Durante nee imi hakarak haree sinal ida katak Kristu koalia liu hosi hau. I Kristu laos fraku hasoru imi, maibee Nia hatudu Nia kbiit boot iha imi.

⁴ Loos duni, bainhira ema prega mate Kristu iha krus, Nia nudar ema, Nia fraku duni. Maibee Nia moris tanba Maromak nia kbiit. Nudar Kristu nia ema, ami mos fraku. Maibee Maromak foo kbiit mai ami atu moris laran ida ho Nia hodi serbii imi.

⁵ Imi rasik tenki tetu didiak imi nia aan. Se imi kaer metin duni imi nia fiar, entaun imi sei hatene katak Kristu Jesus hela iha imi nia laran. Se lae, imi fiar ba Kristu ibun tutun deit.

⁶ Bainhira imi koko tiha imi nia aan, hau hein katak imi sei hatene ami nee apostolu duni.

⁷ Ami harohan ba Maromak atu imi la bele halo sala saida deit. Ami harohan nunee laos para ema bele dehan ami nee apostolu duni, maibee tanba ami hakarak atu imi halo buat nebee diak. Se ema balu konsidera ami nee laos apostolu mos, la buat ida.

⁸ Tanba ami la bele halo buat ida hodi kontra fali lia loos.

⁹ Ami haksolok bainhira ami fraku no imi forte. Ami harohan para imi sai ema nebee moris loos.

¹⁰ Ho razaun ida nee mak hau haruka surat nee ba imi molok hau baa, atu bainhira hau too iha nebaa, hau lalika uza hau nia kbiit nudar apostolu hodi siak imi. Tanba kbiit nee Nai foo mai hau hodi bele hametin imi nia fiar, laos atu halo rahun fali imi.

Paulo taka nia surat

¹¹ Maun-alin sira, hau nia liafuan ikus mak nee: Haksolok baa! Hakaas aan hodi moris loos. Rona didiak hau nia konselhu, moris neon ida laran ida, i buka atu moris dame ho ema hotu-hotu. Nunee Maromak Domin Nain ho Dame Nain sei hamutuk ho imi nafatin.

¹² Rei malu hanesan maun alin iha Kristu. Maromak nia povu iha nee haruka kumprimentus ba imi.

¹³ Grasa hosi Nai Jesus Kristu, domin hosi Aman Maromak no hamutuk ho Espiritu Santu akompanha imi hotu.