2 Korintu 12 - Biblia Tetun Dili

Maromak hatudu buat didiak ba Paulo

¹ Hau tenki gaba aan nafatin, maski buat gaba aan nee la iha folin. Maibee hau hakarak konta kona ba vizaun sira nebee Nai Jesus hatudu sai mai hau.

² Hau konhese ema kristaun ida, iha tinan sanulu resin haat liu baa, Maromak foti nia sae ba iha lalehan, iha fatin nebee aas liu. Ema nee sae ba ho nia isin ka nia isin la baa, hau la hatene, Maromak mak hatene.

³ Hau repete tan, ema nee sae ho nia isin ka nia isin la sae, hau la hatene, Maromak mak hatene.

⁴ Maibee hau hatene nia sae too iha Maromak nia fatin, nebee ema bolu paraizu. Iha nebaa nia rona liafuan nebee halo nia admira teb-tebes, ita ema nia liafuan la too atu bele esplika, la iha ema ida atu bele koalia.

⁵ Ema hanesan nee, hau gaba duni. Maibee hau lakohi gaba hau nia aan. Hau so gaba kona ba hau nia frakeza.

⁶ Afinal ema nebee sae ba lalehan nee mak hau nia aan rasik. Entaun se hau atu gaba aan, hau laos koalia nar-naran deit, tanba buat nebee hau koalia nee lia loos. Maibee hau lakohi konta tan. Diak liu ema respeita hau tuir buat nebee hau halo ho buat nebee hau koalia, la bele liu fali ida nee.

⁷ Maromak lakohi atu hau foti aan kona ba buat furak teb-tebes nebee Nia hatudu ona mai hau. Tanba nee Nia husik hau hetan terus todan ida hosi Satanás nia ema. Nunee hau senti hanesan ai tarak ida sona hela hau nia isin.

⁸ Dala tolu ona hau husu ho laran atu Nai Jesus hasai terus nee hosi hau.

⁹ Maibee Nai Jesus hataan mai hau dehan, “Hau nia grasa natoon ona ba o. Tanba bainhira o fraku mak Hau hatudu Hau nia kbiit ba o.” Nee mak hau sempre haksolok koalia kona ba hau nia frakeza, para Kristu nia kbiit bele hamahon nafatin hau.

¹⁰ Nunee hau haksolok bainhira hau la iha kbiit, bainhira ema hatete aat hau, bainhira hau iha susar laran, bainhira ema halo terus hau, bainhira hau hetan difikuldade oi-oin, tanba tuir Kristu. Tanba bainhira hau fraku maka hau hetan kbiit.

Paulo preokupa ho sarani sira iha Korintu

¹¹ Tuir loloos imi mak gaba hau. Maibee imi tau fali hau iha kotuk, nunee imi obriga fali hau atu gaba hau nia aan, hanesan ema beik ida. Hau la iha folin, maibee se kompara hau nia aan ho ema sira nebee foti aan dehan apostolu boot, sira la liu hau.

¹² Uluk ho pasiensia boot hau halo milagre ho sinal oi-oin iha imi nia leet, halo ema admira. Ho nunee hau hatudu katak hau nee apostolu duni.

¹³ Entaun nusaa mak imi hanoin dehan hau konsidera sarani sira iha fatin seluk liu fali imi? Tanba deit hau simu sira nia oferta, maibee hau la husu imi atu suporta hau ka? Se imi hanoin dehan nee sala, entaun foo perdaun mai hau.

¹⁴ Agora hau prontu ona atu baa vizita tan imi, vizita ida nee ba dala tolu ona. Hau lakohi foo todan ba imi. Hau hakarak imi nia aan rasik, laos imi nia rikusoin. Tanba baibain inan-aman mak rai rikusoin ba nia oan sira, laos oan sira mak rai fali rikusoin ba nia inan-aman.

¹⁵ Nunee hau kontenti loos foo buat hotu-hotu nebee hau iha ba imi, too hau foo tan hau nia aan tomak. Hau nia domin ba imi boot ba bebeik. Maibee nusaa mak imi nia domin mai hau menus ba bebeik?

¹⁶ Imi hatene ona, hau la tau todan ba imi. Maibee sei iha ema balu duun dehan hau ema lohidor ida, nebee halo manobra hodi halo lakon imi.

¹⁷ Entaun ema nebee uluk hau haruka ba imi nee han-matak imi nia osan ka?

¹⁸ Uluk hau husu ba Tito atu baa vizita imi, i haruka mos ita nia maluk sarani ida tan hodi akompanha nia. Durante Tito iha nebaa, nia manobra tiha imi nia osan balu ka? Lae! Ami nain rua nia hanoin ho ami nia hahalok hanesan.

¹⁹ Maluk doben sira, dala ruma bainhira imi lee surat nee, imi hanoin dehan ami defende ami nia aan bebeik. Maibee laos hanesan nee. Ami koalia tuir Kristu nia haruka, i buat hotu-hotu nebee ami hakerek iha surat nee, Maromak mos haree. Buat hotu-hotu nebee ami halo nee, ami halo atu hametin imi nia fiar.

²⁰ Hau tauk, bainhira hau baa iha nebaa, imi nia hahalok la monu ba hau nia laran, i hau nia hahalok mos la monu ba imi nia laran. Hau tauk imi istori malu hela, laran moras malu, hirusdor, hanoin imi nia aan deit, hatete aat ema, konta aat ema nia vida, foti aan i halo rungu-ranga.

²¹ Hau tauk, bainhira hau too iha nebaa, Maromak halo moe hau iha imi nia oin. Keta halo be hau mos laran tristi tanba imi barak nebee uluk moris iha sala nia laran seidauk hakribit imi nia sala. Imi sei nafatin la iha moral seksual, halo relasaun seksual ho ema nebee laos imi nia feen ka imi nia laen ho sala seksual oi-oin too la hatene moe.