2 Korintu 11 - Biblia Tetun Dili

Paulo la hanesan ho apostolu falsu sira

¹ Agora hau gaba aan ituan. Maski gaba aan nee hanesan beik ida, maibee hau husu imi pasiensia tan ho hau.

² Tanba imi nee hanesan feto raan ida nebee hau promete tiha ona atu foo kaben ho mane ida, mane nee mak Kristu. Hau hakarak aprezenta imi ba Nia hanesan feto raan ida nebee sei virjen hela. Se imi husik fali Kristu, hau nia laran moras liu, hanesan mos Maromak laran moras.

³ Agora dadaun imi tuir hela Kristu ho laran tomak. Maibee hau tauk, keta halo be ema ruma mai lohi imi para sees tiha hosi Kristu, hanesan iha tempu uluk samea lohidor mai lohi Eva.

⁴ Bainhira ema ruma baa hanorin kona ba Jesus seluk ida nebee la hanesan ho Jesus ida nebee ami hanorin nee, imi simu deit. Bainhira ema ruma baa foo sai espiritu seluk ida ka Novidade Diak nebee la hanesan ho ida nebee uluk imi simu hosi ami nee, imi simu deit.

⁵ Mestri sira nee hanoin dehan sira nee apostolu boot, maibee hau hanoin sira la liu hau.

⁶ Karik hau la matenek koalia, maibee kona ba konhesimentu hau laos ema beik no hau hatene tuir saida mak hau koalia. Nee ami hatudu ona ba imi iha buat hotu-hotu.

⁷ Uluk hau foo sai Maromak nia Novidade Diak ba imi, hau la husu atu imi selu hau. Maibee hau halo hau nia aan hanesan ema kiik, atu bele foti aas imi. Hahalok nee sala ka?

⁸ Iha tempu nebaa, hau serbii imi, maibee sarani sira iha fatin seluk mak suporta hau. Bele dehan hau halo sarani sira nee lakon para bele serbii imi.

⁹ Uluk hau hela hamutuk ho imi, bainhira hau presiza buat ruma, hau la tau todan ba imi. Ita nia maluk sarani sira nebee mai hosi provinsia Masedónia mak foo buat nebee hau presiza. Hau kuidadu hau nia aan para la foo todan ba imi, ituan mos lae. I hau sei halo nunee nafatin.

¹⁰ Kristu nia lia loos iha hau. Nee duni, la iha ema ida iha provinsia Akaia bele kontra fali hau nia liafuan nee.

¹¹ Nusaa mak hau lakohi husu ba imi? Tanba hau la hadomi imi ka? Lae! Maromak hatene hau hadomi imi.

¹² Maibee hau nafatin lakohi husu suporta hosi imi, nee para ema nebee foti aan hanesan apostolu seluk la bele dehan sira halao sira nia serbisu hanesan ami.

¹³ Tanba ema sira nee apostolu falsu, sira bosok dehan Maromak mak haruka, sira finji halao Maromak nia serbisu, i sira halo aan hanesan fali Kristu nia apostolu.

¹⁴ Lalika hakfodak ho sira nia hahalok nee, tanba Satanás mos hatudu aan hanesan anju naroman nian.

¹⁵ Nee duni, imi lalika hakfodak se diabu nia atan sira nee finji hanesan atan nebee halao Maromak nia hakarak. Too ikus ema sira nee sei hetan kastigu tuir sira nia hahalok.

Paulo nia terus hatudu katak nia apostolu duni

¹⁶ Hau repete tan: Keta hanoin dehan hau nee ema beik. Maibee se imi balu hanoin hau nee beik duni, entaun simu hau hanesan mos imi baibain simu ema beik, atu hau bele gaba aan ituan.

¹⁷ Hau hakarak gaba aan, maski hahalok nee laos hosi ita nia Nai, maibee hahalok ema beik nian.

¹⁸ Tanba iha ema barak mak gosta gaba aan tuir ema mundu baibain halo. Nee duni, hau mos hakarak gaba aan hotu.

¹⁹ Imi konsidera aan hanesan ema matenek, maibee imi gosta tuur ho ema beik.

²⁰ Laos nee deit. Bainhira ema manda imi tuun-sae hanesan atan, imi simu deit. Bainhira sira haan matak imi nia osan, foti sira nia aan sai boot, ka basa imi nia hasan, imi pasiensia ho sira.

²¹ Hau moe teb-tebes hodi rekonhese katak buat sira hanesan nee, ami fraku liu. Maibee sira brani gaba aan kona ba saida deit, hau mos brani gaba aan hanesan nee, maski hau nia liafuan nee hanesan ema beik nia liafuan.

²² Sira nee ema Ebreu isin ka? Hau mos Ebreu isin. Sira ema Israel ka? Hau mos ema Israel. Sira Abraão nia jerasaun ka? Hau mos Abraão nia jerasaun.

²³ Sira nee serbii Kristu ka? Hau koalia hanesan fali ema bulak, hau serbii Kristu liu fali sira. Hau serbisu makaas liu. Ema hatama hau ba komarka dala barak liu, ema baku hau ho xikote dala barak liu, i dala barak hau atu mate sal-sala.

²⁴ Ema Judeu baku hau ho xikote dala lima. Kada ves ke sira baku hau ho xikote, baku too dala tolu-nulu resin sia.

²⁵ Dala tolu ema baku hau ho ai, dala ida ema tuda ho fatuk atu oho hau, dala tolu hau hetan dezastre iha tasi laran too roo nebee lori hau mout, i dala ida hau hanesan namlele hela iha tasi klaran loron ida kalan ida.

²⁶ Hau sempre lao hosi fatin ida ba fatin seluk. Iha perigu oi-oin mak ameasa hau: Mota boot atu lori hau. Ema hadau hau nia sasaan. Hau nia maluk Judeu sira rasik halo aat hau, nunee mos ema nebee laos Judeu. Hau atu mate sal-sala iha sidade laran, iha rai fuik, no mos iha tasi laran. Too ema nebee finji sai hau nia maluk sarani mos ameasa hau.

²⁷ Hau serbisu makaas. Dala barak hau kalan la toba, hau hamlaha i hamrook. Hau malirin tanba la iha hena.

²⁸ Laos nee deit, maibee loro-loron hau mos senti todan tanba preokupa ho sarani sira nia kondisaun.

²⁹ Se hau rona sarani ida senti fraku, hau mos senti fraku. Se hau rona dehan ema ruma lori sarani ida monu ba sala, hau hirus.

³⁰ Se hau tenki gaba aan, entaun hau sei gaba aan kona ba hau nia frakeza.

³¹ Maromak hatene katak hau la bosok. Maromak nee Nai Jesus Kristu nia Aman, i ema hahii Nia too tinan ba tinan.

³² Uluk hau iha sidade Damasku, liurai Aretas nia reprezentante haruka soldadu sira hein iha portaun sidade nian atu kaer hau.

³³ Maibee hau nia maluk sira hatama hau iha bote boot ida, depois sira hatuun hau liu hosi janela ida iha muru nebee haleu sidade nee. Nunee hau konsege halai hosi sira nee.