2 Korintu 10 - Biblia Tetun Dili

Paulo defende nia serbisu nudar apostolu

¹ Hau, Paulo, mak hakerek iha nee. Imi balu hanoin dehan, iha imi nia oin, hau la brani koriji imi, hosi dook mak foin hau brani. Agora ho Kristu nia laran maus ho haraik aan, hau, Paulo husu

² bainhira hau too iha nebaa, imi la bele provoka tan hau. Tanba hau iha hanoin atu hatudu hau nia brani hodi kontra makaas ema sira nebee duun ami dehan ami moris tuir mundu nian.

³ Loos duni, ami sei moris iha mundu nee, maibee ami la luta tuir dalan mundu nian.

⁴ Tanba ami nia kilat funu nian laos hanesan ema mundu nian. Maibee ami uza Maromak nia kbiit hodi sobu rahun tiha muru nebee haleu inimigu nia fatin.

⁵ Ema nebee foti aan hasoru Maromak, ami sobu rahun tiha sira nia hanorin falsu nebee halo ema la konhese Maromak. Ami halakon tiha hanoin hotu-hotu nebee la loos, para halo tuir deit Kristu nia hakarak.

⁶ I bainhira imi halo tuir loloos ona Kristu nia hakarak, ami mos prontu atu foo kastigu ba see-see deit mak la halo tuir.

⁷ Hanoin didiak buat nebee imi rasik haree ho matan. Se iha ema ruma fiar aan dehan sira Kristu nian, entaun nia tenki hatene katak, ami mos Kristu ninian, hanesan mos nia.

⁸ Karik hau gaba aan kona ba kbiit nebee mak ita nia Nai foo mai ami, hau la moe ida. Tanba kbiit nee ami simu atu bele hametin imi nia fiar, laos atu halo rahun imi.

⁹ Keta halo be imi hanoin hau hakerek surat sira nee atu halo tauk imi.

¹⁰ Iha ema balu dehan, “Paulo nia liafuan iha nia surat nee makaas loos, maibee bainhira nia hamutuk ho ita, nia ema nebee fraku i nia koalia la duun iha folin.”

¹¹ Ema nebee koalia hanesan nee tenki hatene aan katak, ami nia hahalok iha imi nia oin hanesan ho buat nebee ami hakerek tiha ona iha surat laran.

¹² Iha ema balu hatudu aan dehan sira mak diak. Sira sukat sira nia aan tuir sasukat nebee sira rasik halo, i kompara sira nia aan ho ema nebee hanesan ho sira. Sira beik liu! Ami la brani gaba ami nia aan hodi kompara ami nia aan hanesan ho sira.

¹³ Ami nee so gaba deit kona ba ami nia serbisu iha area nebee Maromak foo ona mai ami. Ami lakohi gaba aan liu fali ida nee. Imi iha Korintu mos tama hotu iha ami nia area serbisu nee.

¹⁴ Ami mak ema primeiru nebee foo sai ba imi Novidade Diak kona ba Kristu. Se karik Maromak la haruka ami baa imi, maibee ami gaba aan kona ba ida nee, entaun nee la loos.

¹⁵ Ami mos la gaba aan kona ba serbisu nebee ema seluk mak halo. Ami hakarak atu imi nia fiar buras ba bebeik. Ho nunee ami nia area serbisu bele luan liu tan,

¹⁶ nunee ami mos bele hakat liu ba rai seluk hodi haklaken Novidade Diak iha fatin nebee ema seidauk rona. Tanba ami lakohi gaba aan kona ba serbisu nebee Maromak foo tiha ona ba ema seluk halo.

¹⁷ Iha Livru Sagradu dehan, “Diak liu gaba buat nebee mak Nai halo duke gaba ita nia aan rasik.”

¹⁸ Ita gaba ita nia aan, la iha folin. Folin liu Maromak mak gaba ita.