2 Korintu 1 - Biblia Tetun Dili

Paulo hahuu nia surat

¹ Surat nee hosi hau, Paulo, hamutuk ho ita nia maluk sarani Timóteo. Maromak foti hau sai Kristu Jesus nia apostolu. Ami haruka surat nee ba imi, Maromak nia povu santu iha sidade Korintu ho mos sarani sira hotu iha provinsia Akaia.

² Grasa no paz hosi ita nia Aman Maromak no hosi Nai Jesus Kristu hamutuk ho imi.

Maromak sempre hametin ita nia laran

³ Mai ita hahii Maromak! Nia mak ita nia Nai Jesus Kristu nia Aman. Nia nee Aman ida nebee laran luak teb-tebes, i Nia sempre hametin ita nia laran.

⁴ Iha susar saida deit, Nia sempre foo ksolok mai ita, atu nunee, ksolok nebee ita simu hosi Nia, ita mos bele foo tutan ba ema seluk nebee hetan susar saida deit.

⁵ Ita hetan terus oi-oin, hanesan mos Kristu uluk hetan terus. Maibee ita hetan terus too iha nebee mos, Maromak hametin nafatin ita nia laran liu hosi Kristu.

⁶ Bainhira ami hetan susar, ida nee hodi hametin imi nia laran i hasai imi hosi buat aat. I bainhira Maromak hametin ami nia laran, ida nee atu ami bele hametin fali imi nia laran. Nunee bainhira imi hetan terus hanesan ami, imi mos sei aguenta ho pasiensia.

⁷ Ami laran metin ba imi, tanba ami hatene katak imi terus hanesan mos ami, i Maromak sei foo ksolok ba imi hanesan mos Nia foo mai ami.

⁸ Maun-alin sira, hau hakarak atu imi hatene kona ba terus nebee ami hetan iha provinsia Ázia. Terus nee todan teb-tebes, liu fali ami nia kbiit, too ami hanoin la iha ona esperansa.

⁹ Iha tempu nebaa ami senti katak ami hetan ona kastigu mate. Buat sira nee akontese atu ami la bele laran metin ba ami nia aan, maibee ami laran metin ba Maromak. Tanba Nia mak halo moris fali ema mate.

¹⁰ Nia salva ona ami hosi ameasa boot, i ami laran metin katak Nia sei salva ami nafatin.

¹¹ Imi mos tenki ajuda ami liu hosi imi nia orasaun. I Maromak sei hataan ema barak nia orasaun hodi foo bensaun mai ami. Too ikus ema barak mos sei foo agradese ba Nia.

Paulo muda nia planu atu baa Korintu

¹² Ami orgulhu, tanba ami hatene katak buat nebee ami halo iha mundu nee, liu-liu iha imi nia leet, ami halo ho loloos ho laran moos, tanba Maromak tulun ami halo nunee. Ami la uza ema nia matenek, maibee Maromak nia grasa mak serbisu iha ami.

¹³ Bainhira ami haruka surat ba imi, ami sempre hakerek deit buat nebee mak imi bele lee ho komprende.

¹⁴ Agora imi komprende balu deit kona ba ami nia hanorin, maibee hau hein katak too loron ida imi bele komprende hotu. Nunee, bainhira Nai Jesus fila fali mai hosi lalehan hodi tesi ema hotu-hotu nia lia, imi sei konta ami nia diak hanesan mos ami konta imi nia diak.

¹⁵ Hau laran metin nunee mak foin dadauk hau halo planu atu baa vizita imi dala rua, atu imi bele simu bensaun ba dala rua.

¹⁶ Tuir planu nee, hau atu baa uluk iha imi, depois liu ba provinsia Masedónia. Fila hosi nebaa, hau sei baa tan vizita imi, depois mak imi ajuda hau hodi liu ba provinsia Judeia.

¹⁷ Maibee planu nee la sai realidade. Karik imi hanoin hau halo planu arbiru deit, ka hau nia ibun dehan “Loos”, maibee iha laran dehan “La loos”, hanesan fali ema mundu nian.

¹⁸ Maibee Maromak sempre halo tuir buat nebee Nia koalia. Ami mos nunee. Bainhira ami nia ibun dehan “Loos”, ami nia laran nunka dehan “La loos.”

¹⁹ Tanba bainhira Maromak nia Oan Jesus Kristu dehan “Loos”, Nia sempre halo tuir, laos ibun dehan “Loos”, laran dehan “La loos.” Kristu nee mak durante nee hau, Silas ho Timóteo foo sai tiha ona ba imi.

²⁰ Liu hosi Kristu, Maromak dehan “Loos”, nee dehan katak Nia halo tuir buat hotu-hotu nebee Nia promete ona. Liu hosi Kristu mos ita hataan “Amen". Nee dehan katak "loos duni.” Nunee ita foti aas Maromak nia naran.

²¹ Maromak mak halo ami ho imi hamriik metin hodi tuir Kristu. Nia foo unsaun mai ita i foti ita sai Nia ema.

²² Nia mos foo tiha ona Nia Espiritu hodi hela iha ita nia laran, hanesan garantia ida katak ita nee Maromak nian. Hosi nee ita hatene katak Nia sei foo tan buat hotu-hotu nebee Nia promete ona.

²³ Hau husu Maromak sai sasin katak hau nia liafuan tuir mai nee loos. Foin dadauk hau la fila ba Korintu tanba hau lakohi atu hirus tan imi.

²⁴ Ami laos atu obriga imi kona ba saida mak imi atu fiar, tanba imi fiar metin ona. Maibee ami serbisu hamutuk ho imi atu imi nia laran bele haksolok.