2 João 1 - Biblia Tetun Dili

João hahuu nia surat

¹ Hau, João, nudar presbiteru igreja nian, hakerek surat nee ba Senhora nebee Maromak hili ona, no senhora nia oan sira. Hau hadomi teb-tebes imi. Laos hau deit maibee ema hotu-hotu nebee hatene lia loos mos hadomi imi.

² Hau hadomi imi tanba lia loos nee moris ona iha ita hotu nia laran, i lia loos nee sei metin nafatin iha ita too tinan ba tinan.

³ Hau harohan atu ita nia Aman Maromak ho Nia Oan Jesus Kristu hatudu Sira nia grasa, laran diak, i foo paz ho hakmatek ba ita hotu, para ita kaer metin lia loos i hadomi malu.

Hadomi malu i kaer metin Kristu nia hanorin

⁴ Hau haksolok teb-tebes, tanba hau rona katak senhora nia oan balu moris tuir lia loos, tuir duni ukun fuan nebee Aman Maromak foo mai ita.

⁵ Entaun senhora, agora hau husu ba ita para ita hadomi malu. Ukun fuan nee laos buat foun ida, imi simu tiha ona hori uluk kedas.

⁶ Ida nee mak domin loloos: Ita tenki moris tuir Nai Maromak nia ukun fuan. I ukun fuan nebee mak imi rona hori uluk kedas mak nee: Imi tenki moris iha domin nia laran.

⁷ Ohin loron bosok-teen barak lao lemo-lemo lori lia falsu dehan, Jesus Kristu moris iha mundu nee la hanesan ema. See mak koalia nunee, nia bosok-teen, i nia kontra Kristu.

⁸ Kuidadu didiak, keta rona ema sira nee, maibee kaer metin lia loos, para aban-bainrua Maromak bele foo premiu ba imi. Se lae, ami nia serbisu ba imi mos saugati deit.

⁹ Ema nebee sees ona hosi Kristu nia hanorin, nia la laran ida ona ho Nai Maromak. Maibee ema nebee kaer metin ba Kristu nia hanorin, nia laran ida ho Nai Maromak no ho nia Oan Jesus Kristu.

¹⁰ Se ema ruma mai hanorin imi buat nebee la loos kona ba Kristu, imi la bele simu nia iha imi nia uma, no la bele kumprimenta sira.

¹¹ Tanba se ita simu ema nunee, ita mos lori todan hosi nia hahalok aat.

João taka nia surat

¹² Tuir loloos, iha buat barak mak hau hakarak hatete ba imi, maibee hau lakoi hakerek liu hosi surat. Hau rasik hakarak baa vizita imi, i koalia rasik ho imi atu ita hotu-hotu bele haksolok liu tan.

¹³ Nai Maromak mos hili ona senhora nia alin feto nia oan sira iha nee, sira mos hatoo kumprimentus.