1 Timóteo 6 - Biblia Tetun Dili

Kona ba atan

¹ Atan nebee fiar Jesus tenki respeita nia patraun, para ema seluk la bele hatete aat Nai Maromak ka koalia aat ita nia hanorin.

^2a Se nia patraun mos fiar ba Kristu, patraun ho atan hanesan maun-alin. Maski nunee, atan nee tenki respeita nafatin nia patraun, i serbii nia diak liu tan, tanba nia serbii ema sarani ida nebee nia hadomi.

Hanorin falsu no hadomi osan

^2b Timóteo, hanorin buat sira nee ba sarani sira, i hametin sira nia laran para halo tuir.

³ Ema balu hanorin buat nebee sala, la haan malu ho Nai Jesus Kristu nia Liafuan nebee loos. Sira nia hanorin la ajuda ema moris tuir Maromak nia hakarak.

⁴ Ema hanesan nee dehan hatene buat hotu, maibee tuir loloos la komprende buat ida. Sira nia moras aat ida mak gosta diskuti malu ho istori malu kona ba liafuan. Hahalok nee halo ema laran moras malu, tarata malu, hatete aat malu, no deskonfia ema nar-naran deit.

⁵ Sira so hatene mak istori malu deit. Sira nia hanoin la loos ona, i sira la hatene ona saida mak loos. Sira hanoin dehan, hanorin kona ba Maromak bele halo sira sai riku.

⁶ Loos duni, se ita moris halo haksolok Maromak nia laran, i ita kontenti ho buat nebee mak ita iha, nee mak ita nia rikusoin.

⁷ Tanba ita moris mai iha mundu nee, ita la lori buat ida. Ita mate mos, la lori buat ida.

⁸ Nunee, naran katak ita iha ai haan ho hena para hatais, nee natoon ona.

⁹ Maibee ema nebee loron-kalan hanoin deit atu sai riku, monu ba tentasaun i monu ba lasu. Sira hakarak buat oi-oin nebee sala ho buat barak nebee bele estraga sira. Nee sei halo susar sira.

¹⁰ Tanba buat aat hotu-hotu nia huun mak hadomi osan. Iha ema balu buka demais osan, too sira husik tiha sira nia fiar. Nunee sira halo terus sira nia aan, hanesan sira rasik sona sira nia aan ho tudik.

Kaer metin o nia fiar

¹¹ Timóteo, o Nai Maromak nia ema. Nunee, hadook aan hosi buat aat sira nee hotu, i hakaas aan atu moris iha lia loos, tuir Maromak nia hakarak. Hakaas aan hodi fiar nafatin ba Jesus Kristu, hadomi ema seluk, aguenta iha terus laran, i laran maus.

¹² Luta para fiar metin ba Maromak i sempre halo tuir Nia Liafuan. Agora kaer metin o nia fiar no simu moris rohan laek, nebee Maromak hili o no o deklara iha ema barak nia oin ona.

¹³ Iha Maromak nia futar oin, nebee foo moris ba buat hotu-hotu no iha Kristu Jesus nebee foo sasin loloos kona ba Nia Aan iha governador Pontius Pilatus nia oin,

¹⁴ hau haruka para o halo tuir Nai Maromak nia orden nee hotu. Nunee ema la foo sala ba o too ita nia Nai Kristu Jesus fila fali mai hosi lalehan.

¹⁵ Nai Jesus sei fila fali mai iha loron nebee Nai Maromak desidi. Nai Maromak nee boot no diak teb-tebes. Nia mak kaer ukun. Nia mak liurai hotu-hotu nia Liurai, ho nai hotu-hotu nia Nai.

¹⁶ So Nia deit mak nunka mate. Nia moris iha naroman ida ke makaas liu, halo ema nia matan la aguenta atu haree. Ema ida nunka haree Nia, i la iha ema ida mak bele haree Nia. Ema hotu-hotu respeita Nia. Poder hotu-hotu iha Nia liman too tinan ba tinan nafatin! Amen.

Kona ba ema riku

¹⁷ Hatete ba ema riku sira iha mundu nee para sira la bele foti aan, i la bele laran metin ba sira nia rikusoin. Tan rikusoin sira nee hotu loron ida sei mohu. Hatete ba sira para laran metin ba Nai Maromak. Tan Nia mak foo buat hotu-hotu mai ita too res-resin, atu ita bele moris haksolok.

¹⁸ Hatete ba sira para halo buat nebee diak hodi tulun ema seluk. Sira la bele karak, maibee tenki prontu fahe buat nebee sira iha.

¹⁹ Nunee sira nia hahalok diak nee sai hanesan rikusoin iha loron ikus, para sira bele hetan moris loloos, nebee rohan laek.

Paulo taka nia surat

²⁰ Timóteo, kuidadu didiak knaar nebee Nai Maromak tau ona iha o nia kabaas. Hadook aan hosi ema sira nebee koalia la huun la dikin, i kontra Nai Maromak nia Liafuan. Sira gaba aan dehan matenek, maibee tuir loloos lae. Lalika diskuti malu ho sira.

²¹ Iha ema balu fiar ba sira nia liafuan bosok nee, too husik tiha sira nia fiar ba Nai Maromak. Nai Maromak nia grasa hamutuk ho imi hotu. Mak nee deit. Hosi hau, Paulo