1 Timóteo 5 - Biblia Tetun Dili

Timóteo, o tenki konsidera sarani sira hanesan familia

¹ La bele hirus mane sira nebee idade liu o. Maibee foo hanoin ba sira ho respeitu, hanesan ba o nia aman rasik. I foo hanoin ba mane foin-sae sira hanesan o nia maun-alin rasik.

² Nunee mos ho feto sira. Koalia ho sira nebee idade liu o hanesan o koalia ho o nia inan rasik. I konsidera feto foin-sae sira hanesan o nia feton. O nia laran tenki moos ba sira.

Kona ba feto faluk

^3-5 Sarani sira tenki respeita ho tau matan ba feto faluk sira nebee la iha familia atu haree sira. Maibee se feto faluk ida iha oan ka bei-oan, entaun sira nee iha obrigasaun atu tau matan ba nia, hodi selu nia kolen. Nunee sira hatudu katak sira serbii Nai Maromak. I sira mos halo haksolok Maromak nia laran. Maibee feto faluk nebee mesak, la iha tan ema ida atu tau matan ba nia, nia so laran metin deit ba Nai Maromak. Loron-kalan nia halo orasaun husu tulun ba Maromak. Sarani sira tenki tau matan ba feto faluk sira hanesan nee.

⁶ Maibee feto faluk nebee hakarak goza deit, nia hanesan ema nebee mate tiha ona, maski nia sei moris.

⁷ Haruka sarani sira halo tuir regra sira nee, para ema la bele foo sala ba sira.

⁸ Maibee see mak la tau matan ba nia familia rasik, liu-liu nia familia uma laran, nee hatudu katak nia husik ona nia fiar ba Nai Maromak. Nia aat liu fali ema nebee la fiar ba Kristu.

⁹ Bainhira halo lista feto faluk sira, hili deit ema hanesan tuir mai nee: nia tinan hosi 60 ba leten, i nia foo laran no moris loos deit ho nia laen.

¹⁰ Ema rekonhese nia hanesan ema ida ke sempre halo diak ba ema seluk. Nia tau matan ba nia oan sira ho diak, simu bainaka iha nia uma ho laran tomak, serbii sarani sira ho haraik aan, fasi sira nia ain, ajuda ema nebee iha susar laran, i sempre prontu halo buat didiak deit.

¹¹ La bele hatama feto faluk foin-sae sira ba iha lista faluk sira nian. Tanba keta halo be sira nia hakarak ba relasaun seksual mai, i sira hakarak kaben fali, nunee sira la foo ona laran tomak ba Maromak, tuir sira promete ona ba Jesus Kristu.

¹² Nunee ema bele foo sala ba sira tanba sira la kumpri ona sira nia promesa uluk ba Maromak.

¹³ Feto faluk foin-sae sira bele mos sai baruk-teen, hodi tama uma sai uma. Laos nee deit, sira mos bele konta ema nia vida, mete ema nia problema, i koalia buat nebee la serve atu koalia.

¹⁴ Tanba nee, hau hanoin diak liu feto faluk foin-sae sira kaben fali, iha oan, i tau matan ba sira nia uma kain. Nunee ema nebee la gosta ita, la iha razaun atu hatete aat ita.

¹⁵ Tan iha feto faluk foin-sae balu sees ona hosi dalan loos hodi tuir fali Satanás.

¹⁶ Se feto sarani ida nia familia ruma faluk, feto nee mak tenki tau matan ba sira. La bele husik sarani sira seluk mak ajuda feto faluk sira nee. Nunee, sarani sira bele ajuda faluk sira nebee la iha ema ida atu tau matan.

Kona ba lideransa sarani sira

¹⁷ Hatudu respeitu didiak ba presbiteru sira nebee halo serbisu ho diak. I selu sira nia kolen ho diak, liu-liu sira nebee badinas foo sai Maromak nia liafuan no hanorin sarani sira hodi foo hanoin ba sira para moris tuir.

¹⁸ Tanba iha Livru Sagradu hakerek dehan, “Se uza karau hodi sama hare, la bele kesi nia ibun, para nia bele haan.” Nunee mos, “See mak serbisu, nia merese atu simu osan.”

¹⁹ Se ema nain ida foo sala ba lideransa sarani ruma, la bele rona lai. Tenki iha sasin rua ka tolu koalia hanesan, foin o rona hodi tetu.

²⁰ Se nia halo sala duni, entaun koriji nia iha sarani sira nia oin, atu ema seluk la brani halo sala hanesan nia.

²¹ Bainhira koriji ema, la bele fihir ba ema nee see. Hau tau knaar nee ba o nia kabaas iha Nai Maromak ho iha Kristu Jesus nia oin. I anju sira nebee Maromak hili mos sai sasin.

²² La bele ansi foti ema ruma hodi tau liman para sai lideransa ba sarani sira. Maibee haree didiak lai. Tanba se imi foti ema, i ema nee halo sala, imi mos sei lori todan. Kuidadu o nia aan para la bele sala.

²³ Tanba o nia kabun moras bebeik, diak liu la bele hemu bee deit, hemu mos tua ituan hanesan aimoruk.

²⁴ Haree didiak! Iha ema balu halo sala, seidauk lori ba justisa mos, ema hotu-hotu hatene tiha ona. Maibee iha ema balu halo sala, kleur mak foin ema hatene.

²⁵ Nunee mos, bainhira ita halo buat diak, dala ruma ema hatene kedas. Se karik ema la haree mos, ikus mai ema sei hatene, tanba hahalok diak, atu subar mos la diak.