1 Timóteo 4 - Biblia Tetun Dili

Kuidadu ho mestri falsu

¹ Maromak nia Espiritu foo hatene momoos mai ita katak, iha loron ikus, sarani balu sei husik tiha sira nia fiar ba Kristu, hodi tuir fali espiritu aat sira no espiritu bosok-teen sira nia hanorin.

² Iha mos mestri balu hanorin sala. Sira bosok-teen, koalia oin ida, hahalok oin seluk. Tanba sira halo sala bebeik, sira la hatene ona saida mak diak, saida mak aat nunee.

³ Sira hanorin dehan ema la bele kaben, i dehan hahaan balu lulik, la bele haan. Maski Nai Maromak halo hahaan sira nee hotu ba ema nebee fiar ba Kristu i hatene lia loos bele haan. Naran katak ita haan, foo agradese ba Nai Maromak.

⁴ Buat hotu-hotu nebee Nai Maromak halo, diak. Nunee la iha hahaan ida mak ita bele dehan lulik. Hahaan hotu-hotu ita bele haan ho laran haksolok, hodi agradese ba Nai Maromak.

⁵ Tanba liu hosi Nai Maromak nia Liafuan ho mos ita nia orasaun, buat sira nee hotu la lulik ona.

Nai Jesus nia atan diak

⁶ Timóteo, hanorin buat sira nee hotu ba sarani sira. Se o halo nunee mak o serbii Kristu Jesus nudar Nia atan ida nebee diak. Durante nee o halo tuir hanorin nebee loos, i simu Nai Maromak nia Liafuan nebee halo ita fiar ba Nia, hanesan ema haan hahaan nebee diak hodi halo isin sai forti.

⁷ Hadook aan hosi ai-knanoik falso sira nebee la ajuda ema atu moris tuir Maromak nia dalan. Diak liu treinu o nia aan didiak para moris tuir Maromak nia hakarak iha o nia moris tomak.

⁸ Ema dehan, treinu halo isin forti iha valór, maski laduun. Maibee treinu aan para moris tuir Maromak nia hakarak iha valór boot liu, tanba ajuda ema moris agora iha mundu nee, ho mos iha moris nebee sei mai.

⁹ Liafuan nee loos duni, ita tenki simu ho laran tomak.

¹⁰ Ita serbisu makaas i hakaas aan liu tan, tanba ita laran metin ba Nai Maromak nebee moris. Nia mak salvador ba ema hotu-hotu, liu-liu ba ita nebee fiar ba Jesus.

¹¹ Foo sai no hanorin buat sira nee hotu, i haruka ema halo tuir.

¹² Keta husik ema ida la konsidera o tan deit o foin-sae. O tenki hatudu ezemplu diak ba ema sarani sira, liu hosi o nia koalia, o nia hahalok, o nia domin, o nia fiar ba Jesus Kristu, ho o nia moris loos.

¹³ Durante hau seidauk too baa, o tenki foo aan hodi lee Maromak nia Liafuan ba sarani sira, hanorin didiak sira, i foo hanoin ba sira para halo tuir.

¹⁴ Uluk lideransa sira harohan hodi tau liman ba o nia ulun. Momentu nee, sira foo tutan Maromak nia lia menon kona ba o nia knaar, i Maromak mos foo kbiit ba o para o bele halo knaar nee ho diak. Agora, uza loloos kbiit nee.

¹⁵ Halo serbisu sira nee hotu ho badinas, ho laran tomak, para ema bele haree katak o lao ba oin.

¹⁶ Kuidadu ho o nia aan para o sempre moris loos, i sempre hanorin buat nebee loos. Kontinua hanesan nee nafatin, maka Maromak sei hasai o hosi buat aat, i nunee mos ema nebee rona o.