1 Timóteo 1 - Biblia Tetun Dili

Paulo hahuu nia surat

¹ Timóteo nebee diak. Kumprimentus hosi hau, Paulo, Kristu Jesus nia apostolu. Nai Maromak ho Kristu Jesus mak foti hau. I Kristu Jesus halo ita laran metin katak Nai Maromak salva ona ita.

² Timóteo, o hanesan hau nia oan rasik, tanba hau hatudu dalan para o fiar ba Kristu Jesus. Hau harohan atu ita nia Aman Maromak ho Kristu Jesus ita nia Nai, hatudu Sira nia grasa ba o, hadomi o, i foo paz ba o.

Kuidadu ho hanorin falsu

³ Bainhira hau atu sai hosi sidade Efezu baa iha provinsia Masedónia, hau husu o hela nafatin iha Efezu, hodi bandu ema sira nebee hanorin la loos, atu la bele hanorin tan hanorin nebee la loos.

⁴ Ema sira nee lakon tempu konta ai-knanoik nebee la iha folin, i dada lia kona ba bei-ala sira ka ita nia huun. Buat sira nee so halo ema istori malu deit, i la ajuda ema fiar ba Maromak para sira bele halo tuir Nia hakarak.

⁵ Hau foo hanoin ba o hanesan nee, atu sarani sira bele moris hadomi malu, laran moos, hatene saida mak diak ho saida mak aat, i fiar teb-tebes ba Nai Maromak.

⁶ Maibee iha mestri balu husik tiha ona buat sira nee, hodi koalia fali buat nebee la loos no la iha folin.

⁷ Sira hatudu aan dehan sira matenek nain kona ba lei nebee Nai Maromak foo ba avoo Moisés, maibee sira la komprende buat nebee sira hanorin.

⁸ Ita hatene katak lei nee diak, naran katak ita uza tuir Maromak nia hakarak.

⁹ Lei nee laos hakerek foo ba ema nebee moris loos. Maibee foo ba ema sira nebee kontra lei, moris kontra Maromak, fila kotuk ba Maromak, moris iha sala laran, la tuir Maromak nia hakarak, la respeita Maromak, i oho-door ema too oho sira nia inan-aman rasik.

¹⁰ Lei nee foo ba ema nebee la iha moral seksual, ba ema nebee halo hahalok homo-seksual, ba sira nebee naok ema ba faan, ba bosok-teen sira, ba ema nebee jura falsu, ho sira nebee halo saida deit mak kontra hanorin nebee loos.

¹¹ Hanorin loos nee mai hosi Nai Maromak nia Novidade Diak, nebee Nia entrega mai hau. Nai Maromak nee diak no boot teb-tebes.

Agradese ba Nai Maromak nia grasa

¹² Hau agradese ba Kristu Jesus ita nia Nai, tanba Nia foo fiar ho forsa mai hau i foti hau hodi halao Nia serbisu.

¹³ Nia foti hau, maski uluk hau hatete aat Nia i halo terus ema nebee tuir Nia. Jesus la kastigu hau, tanba tempu nebaa hau seidauk fiar ba Nia i la hatene saida mak hau halo.

¹⁴ Maibee ita nia Kristu Jesus hatudu Nia grasa res-resin mai hau. Nia enxe hau ho fiar metin ba Nia, no hadomi Nia i hadomi mos ema seluk.

¹⁵ Ita rona ona dehan, “Kristu Jesus mai iha mundu nee hodi salva ema sala nain.” Liafuan nee loos duni; ita tenki simu ho laran tomak. Hosi ema sala nain hotu-hotu, hau mak aat liu.

¹⁶ Maski nunee Nai Maromak hatudu Nia domin boot mai hau. Tan Nia hakarak uza hau hodi hatudu Jesus Kristu nia pasiensia boot liu mai hau. Bainhira sira haree nunee, ema sala nain sira seluk mos bele fiar ba Nia hodi moris ho Nia tinan ba tinan nafatin.

¹⁷ Mai ita hotu-hotu hahii Nai Maromak! Nia mak Liurai nebee ukun tinan ba tinan nafatin. Nia moris rohan laek; Nia nunka mate. Ema la bele haree Nia ho matan. So Nia deit mak Maromak; la iha tan seluk! Mai ita hahii i foti aas Nia naran tinan ba tinan nafatin. Amen.

¹⁸ Hau nia oan Timóteo. Buat nebee hau haruka o halo nee, tuir loloos lia tatoli nebee uluk Nai Maromak hatoo ba Nia ema kona ba o nia serbisu. Se o tuir Nia lia tatoli nee, entaun o sei luta nafatin hanesan funu nain diak ida.

¹⁹ Fiar metin ba Kristu, i kuidadu o nia aan para sempre halo buat nebee loos. Tanba iha ema balu hatene saida mak loos, maibee lakohi halo tuir. Too ikus, sira fila kotuk ba Maromak.

²⁰ Hosi sira nee, ema nain rua mak Himeneu ho Alexandre. Nee mak hau entrega ona sira ba Satanás, para sira bele aprende atu la bele hatete aat tan Nai Maromak.