1 Tesalonika 4 - Biblia Tetun Dili

Moris santu nebee halo haksolok Nai Maromak

¹ Maun-alin sira, ami husu ba imi atu moris halo haksolok Nai Maromak, tuir ami hanorin ona ba imi. Loos, imi moris tuir ona nunee, maibee tanba ita Nai Jesus nia ema, ami husu atu imi hakaas aan liu tan.

² Imi hatene ona regra saida mak ami hanorin ona ba imi hodi Nai Jesus nia naran.

³ Nai Maromak nia hakarak mak nee: Moris ho laran moos. La bele iha relasaun seksual nebee la loos ho see-see deit.

⁴ Ida-idak tenki domina nia aan rasik hodi kontrola nia hakarak seksual, i moris loos, para ema bele respeita imi.

⁵ La bele kaan hahalok seksual nebee domina fali imi, hanesan ema nebee la konhese Nai Maromak.

⁶ La bele book maluk kristaun nia kaben. Nai Maromak sei foo kastigu ba ema nebee halo sala sira nee. Buat sira nee ami foo atensaun fila-fila ba imi hori uluk kedas.

⁷ Tan Nai Maromak bolu ona ita, laos atu moris tuir hahalok foer sira nee, maibee atu moris ho laran moos.

⁸ Nee duni, see mak lakohi tuir hanorin nee, nia laos deit fila kotuk mai ami, maibee nia fila kotuk ba Nai Maromak, nebee foo Nia Espiritu Santu mai ita.

⁹ Ami la presiza hakerek tan ba imi kona ba oinsaa hadomi maluk sarani sira, tan Nai Maromak rasik hanorin ona imi atu hadomi malu.

¹⁰ Imi hadomi ona kristaun sira hotu iha provinsia Masedónia. Nee diak. Maibee agora, maun-alin sira, ami husu para imi hadomi liu tan.

¹¹ Hakaas aan atu imi moris hakmatek. La bele baa mete ema nia moris. Serbisu ho imi nia liman rasik hodi sustenta imi nia familia. Buat sira nee, ami hanorin ba imi hori uluk kedas.

¹² Se imi moris nunee, imi sei la tane liman ba ema seluk, i ema nebee la fiar ba Kristu sei respeita imi.

Nai Jesus sei fila mai hosi lalehan

¹³ Maun-alin sira, ami hakarak imi hatene didiak kona ba kristaun sira nebee mate tiha ona. Nunee, bainhira kristaun ruma mate, imi la bele laran susar demais hanesan ema nebee hanoin dehan ema mate sei la moris fali.

¹⁴ Ita hatene katak Jesus mate tiha ona, depois Nai Maromak halo Nia moris fali. Nunee, ita mos fiar katak Nai Maromak sei halo moris fali Nai Jesus nia ema hotu-hotu nebee mate tiha ona, hodi halibur sira hamutuk ho Jesus.

¹⁵ Iha nee ami hatoo Nai Maromak nia Liafuan. Bainhira Nai Jesus fila fali mai, ita nebee sei moris hela sei la baa hasoru Nia molok sira nebee mate tiha ona.

¹⁶ Nai Jesus sei fila fali mai hosi lalehan hodi foo orden ho lian makaas. Ema sei rona anju sira nia boot ida nia lian, ho Maromak nia korneta nia lian. Depois Kristu nia ema sira nebee mate tiha ona sei moris fila fali.

¹⁷ Liu tiha nee, ita nebee sei moris hela, Maromak foti sae hamutuk ho sira, hodi hasoru Nai Jesus iha kalohan. I ita sei moris hamutuk ho Nai Jesus tinan ba tinan nafatin.

¹⁸ Nee duni, foo hanoin ba malu kona ba Nai Jesus nia Liafuan sira nee, hodi hametin imi ida-idak nia laran.