1 Tesalonika 3 - Biblia Tetun Dili

Paulo haruka Timóteo lori Novidade Diak ba Tesalónika

^1-2 Uluk ami la konsege baa vizita imi. Too ikus, ami la aguenta hein tan ona, i desidi haruka Timóteo baa. Maibee hau ho Silas desidi hela deit iha sidade Atena. Timóteo nee ami nia maluk iha Kristu, nebee serbisu hamutuk ho ami ba Nai Maromak hodi foo sai Jesus Kristu nia Novidade Diak. Ami haruka nia baa hametin imi nia laran, atu imi fiar metin liu tan ba Nai Maromak,

³ i la bele nakdoko bainhira ema halo terus imi. Imi hatene katak terus nebee ema halo mai ita, nee Maromak nia planu.

⁴ Tan uluk, bainhira ita sei hamutuk, ami foo hanoin fila-fila ba imi dehan, ema sei halo terus ita. I agora sai nunee duni.

⁵ Iha tempu nebaa, hau hakarak duni atu hatene, imi sei fiar nafatin ba Jesus ka lae. Nunee bainhira hau la aguenta tan ona, hau haruka Timóteo ba imi hodi buka hatene loloos. Tan hau preokupa, keta halo be Satanás intenta ona imi atu fila kotuk ba Nai Jesus. Se nunee, serbisu boot nebee uluk ami halo nee saugati deit.

Timóteo lori notisia diak hosi kristaun sira iha Tesalónika

⁶ Agora Timóteo fila fali ona hosi Tesalónika. Nia konta mai ami dehan, imi fiar nafatin ba Kristu i hadomi malu nafatin, halo ami mos haksolok. Nia mos dehan, bainhira imi konta tuir kona ba ami, imi sempre kontenti, i imi hakarak atu hasoru ami, hanesan mos ami hakarak hasoru imi.

⁷ Maun-alin sira, maski ami iha nee senti todan tanba hetan terus oi-oin, maibee buat nebee Timóteo konta nee halo ami haksolok teb-tebes. Tanba agora ami hatene ona katak imi fiar metin nafatin ba Nai Jesus.

⁸ Ami agora moris fali ona, tanba imi hamriik metin nafatin iha Jesus.

Paulo halo orasaun ba kristaun sira iha Tesalónika

⁹ Ami agradese barak ba Nai Maromak ho laran haksolok, tanba imi fiar nafatin ba Nia.

¹⁰ Loron-kalan ami halo orasaun ba Nai Maromak ho fuan-laran tomak, para ami bele hasoru fali imi, hodi hanorin buat nebee mak imi sei presiza para bele fiar metin liu tan.

¹¹ Ami harohan ba ita nia Aman Maromak ho Jesus Kristu ita nia Nai, atu loke dalan para ami baa hasoru tan imi.

¹² Ami mos husu ba Nai Jesus para halo imi hadomi malu liu tan i hadomi liu tan ema hotu-hotu, hanesan mos ami hadomi imi.

¹³ Ami husu para Nai Maromak hametin imi nia laran. Nunee bainhira Nai Jesus fila fali mai ho povu nebee santu, imi bele hamriik iha ita nia Aman Maromak nia oin ho laran moos, i la iha ema ida foo sala ba imi.