1 Tesalonika 2 - Biblia Tetun Dili

Paulo nia serbisu iha Tesalónika

¹ Maun-alin sira, imi hotu hatene, uluk ami hamutuk ho imi iha Tesalónika, ami nia serbisu la saugati.

² Imi mos hatene, bainhira ami seidauk baa iha nebaa, ema iha sidade Filipi halo terus ho hatete aat ami. Maibee Maromak foo brani mai ami para bele foo sai Nia Novidade Diak ba imi, maski ema barak kontra makaas.

³ Ami foo sai Novidade Diak nee, laos lori doutrina nebee sala ka ho hanoin aat, i laos para bosok ema. Lae!

⁴ Nai Maromak konsidera ami serve hodi hatoo Novidade Diak ba imi. Ami laos atu halo kontenti ema nia laran, maibee atu halo kontenti Nai Maromak, tan Nia mak hatene ami nia laran.

⁵ Imi mos hatene katak, ami nunka kos-kose imi, saa tan hakfodak ba osan hanesan ema balu nebee hakarak manaan deit osan. Nai Maromak mak ami nia sasin katak ami nunka halo hanesan nee.

⁶ Ami serbisu laos atu imi ka see-see deit gaba ami.

⁷ Tuir loloos ami, nudar Kristu nia apostolu, iha direitu hodi eziji. Maibee ami hatudu ami nia laran maus iha imi nia leet, hanesan inan ida tau matan ba nia oan nurak.

⁸ Tanba ami hadomi teb-tebes imi, ami prontu hatoo Nai Maromak nia Novidade Diak ba imi. Laos nee deit, maibee ami nia moris mos entrega tomak ba imi.

⁹ Maun-alin sira, imi hatene, bainhira ami foo sai Maromak nia Novidade Diak ba imi, ami serbisu makaas loron-kalan hodi sustenta ami nia aan rasik. Tan ami lakohi foo todan ba imi.

¹⁰ Imi hotu sai sasin, nunee mos Nai Maromak, katak bainhira ami sei hamutuk ho imi nebee fiar ba Jesus, ami moris loos, la halo sala, i la iha ema ida bele foo sala mai ami.

¹¹ Imi hatene katak ami tau matan ba imi ida-idak, hanesan aman ida tau matan ba nia oan rasik.

¹² Ami foo konselhu ba imi hodi hametin imi nia laran, i husu bebeik ho laran tomak ba imi hodi moris tuir Maromak nia hakarak. Tan Nia mak liurai boot, nebee bolu imi sai Nia reinu hodi simu respeitu hamutuk ho Nia.

Maromak serbisu iha imi nia laran

¹³ Iha tan buat ida nebee halo ami sempre agradese ba Nai Maromak. Bainhira ami foo sai Maromak nia liafuan ba imi, imi rona i simu liafuan nee, laos nudar ema nia liafuan, maibee nudar Nai Maromak nia liafuan. Liafuan nee mak halo serbisu iha imi sarani sira nia moris hodi halo imi tuir Maromak nia hakarak.

¹⁴ Maun-alin sira, imi nia maluk iha imi nia rain rasik halo terus imi tanba imi tuir Jesus. Nunee imi sai hanesan sarani sira iha provinsia Judeia nebee fiar ba Kristu Jesus. Sira nia maluk Judeu sira iha nebaa mos halo terus sira tanba sira fiar ba Kristu Jesus.

¹⁵ Ema Judeu balu uluk oho tiha Nai Maromak nia profeta balu nebee foo tutan Nia Lia Tatoli. Sira mos oho Nai Jesus. Agora sira buka dalan atu duni sai tan ami. Sira inimigu ba ema hotu, i Nai Maromak la gosta liu sira.

¹⁶ Sira buka taka dalan, atu ami la bele foo sai tan Maromak nia Novidade Diak ba ema nebee laos Judeu. Ema Judeu sira nee lakohi atu Maromak salva ema seluk. Nunee sira nia sala amenta ba bebeik. Tuir mai, Nai Maromak hirus, i kastigu sira.

Paulo hakarak hasoru tan kristaun sira iha Tesalónika

¹⁷ Maun-alin sira, uluk ami tenki sees aan hosi imi, maibee lalais deit. Maski ita dook malu, ami hanoin imi nafatin. Tanba ami hanoin loos imi, ami buka dalan oi-oin atu baa vizita fali imi.

¹⁸ Ami hakarak fila ba imi, i hau koko ona dala ida, dala rua, maibee Satanás sempre taka dalan.

¹⁹ Ami hakarak baa haree fali imi, tanba bainhira Nai Jesus fila fali mai hosi lalehan, imi mak sei halo ami haksolok ho laran metin iha Nia oin. Tanba imi sai hanesan prémiu nebee hatudu katak ami manaan tiha ona.

²⁰ Loos duni! Ami haksolok liu tanba imi hatudu katak ami nia serbisu iha folin.