1 Tesalonika 1 - Biblia Tetun Dili

Paulo hahuu nia surat

¹ Surat nee hosi hau, Paulo, ho hau nia kolega Silas ho Timóteo. Ami hatoo kumprimentus ba sarani sira iha sidade Tesalónika. Imi laran ida ho Aman Maromak ho Nai Jesus Kristu. Grasa no paz hosi Aman Maromak hamutuk ho imi hotu.

Sarani Tesalónika sira fiar nafatin ba Jesus

² Ami sempre halo orasaun ba imi hotu, hodi agradese ba Nai Maromak dehan, “Nai, obrigadu ba sarani sira iha Tesalónika!”

³ Ami sempre hatoo ba ita nia Aman Maromak katak, imi serbisu makaas tanba imi fiar ba Nai Jesus, i badinas ajuda ema seluk tanba hadomi sira. I bainhira ema halo terus imi, imi aguenta nafatin ho pasiensia tanba imi laran metin ba Nai Jesus.

⁴ Maun-alin sira, ami hatene Nai Maromak hadomi imi, i Nia hili ona imi sai Nia povu.

⁵ Tanba uluk, ami baa foo sai Nai Maromak nia Novidade Diak ba imi, laos ho liafuan deit, maibee ho poder hosi Espiritu Santu, i ami fiar metin katak Novidade Diak nee loos duni. Imi mos hatene katak ami moris iha imi nia leet so hodi halo diak ba imi.

⁶ Nunee imi moris tuir ami nia ezemplu, i tuir ezemplu Nai Jesus nian. Maski ema halo terus imi, maibee imi simu Novidade Diak ho laran haksolok, tanba Espiritu Santu foo ksolok ba imi.

⁷ Nunee imi sai ezemplu ba sarani sira hotu iha provinsia Masedónia ho Akaia.

⁸ Tan Maromak nia Novidade Diak namkari ona hosi imi iha Tesalónika too iha Masedónia ho Akaia. Laos nee deit. Maibee ema iha fatin-fatin mos hatene ona kona ba imi nia fiar ba Nai Maromak. Nunee ami la presiza konta tan.

⁹ Tanba ema sira nee rasik konta dehan, uluk imi simu ami ho laran tomak. Imi husik tiha hotu imi nia lulik sira hodi serbii ho adora Maromak nebee loos i moris.

¹⁰ Sira mos konta dehan, imi hein hela Nai Maromak nia Oan Jesus fila mai hosi lalehan. Uluk, ema oho tiha Nia, maibee Nai Maromak halo Nia moris fali. I Nai Jesus mak sei salva ita hosi Maromak nia kastigu iha loron ikus.