1 Pedro 5 - Biblia Tetun Dili

Tau matan ba Maromak nia bibi sira

¹ Agora hau hakerek ba presbiteru sira. Hau mos presbiteru hanesan imi. Hau rasik akompanha Kristu nia terus. Aban-bainrua bainhira ema hotu-hotu haree Kristu fila fali mai ho naroman nabilan, hau mos sei simu naroman nabilan nee. Hau husu ba imi presbiteru sira,

² tau matan didiak ba ema nebee mak Nai Maromak entrega ona ba imi. Haree didiak sira, laos tanba ema obriga, maibee hosi imi nia laran rasik, tuir Nai Maromak nia hakarak. Imi la bele serbisu hanesan ema nebee mak hakarak manaan osan deit, maibee tenki serbisu ho badinas hodi serbii Maromak nia povu.

³ La bele foti aan hodi manda tuun-sae sarani sira nebee mak Nai Maromak foo ba imi atu tau matan. Maibee imi tenki sai ezemplu nebee diak para sira bele halo tuir.

⁴ Se imi halo nunee, aban-bainrua bainhira bibi atan sira nia Boot fila fali mai, imi sei simu koroa naroman nabilan, i koroa nee nunka namlaik.

Lia menon ba sarani sira

⁵ Nunee mos imi foin-sae sira, imi tenki hakruuk ba ema nebee idade liu. Imi hotu la bele foti aan, maibee tenki haraik aan ba malu, tanba iha Livru Sagradu hakerek nunee: “Nai Maromak kontra ema nebee foti aan, maibee Nia hatudu Nia laran diak ba ema nebee haraik aan.”

⁶ Tanba nee haraik aan ba Nai Maromak Kbiit Nain, para bainhira too iha nia tempu, Nia foti aas imi.

⁷ Entrega imi nia preokupasaun hotu ba Nai Maromak, tanba Nia mak tau matan ba imi.

⁸ Matan moris neon nain, tanba imi nia inimigu diabu hakarak estraga imi, hanesan leaun nebee mak lao baa-mai ho lian makaas hodi buka ema atu haan.

⁹ Imi tenki hamriik metin, hasoru nia ho fiar nebee metin, tanba imi hatene katak imi nia maun-alin sira iha Kristu iha mundu tomak mos hetan terus hanesan imi.

¹⁰ Bainhira imi nia terus hotu ona, Nai Maromak rasik sei halo imi diak fila fali. Nia sei foo forsa ba imi, i halo imi hamriik metin hodi aguenta nafatin. Tanba Nia sempre hatudu Nia laran diak ba ita ema i Nia rasik mak bolu imi atu simu Nia kbiit ho naroman nabilan too tinan ba tinan, hamutuk ho Kristu.

¹¹ Maromak deit mak iha kbiit hodi ukun buat hotu-hotu too tinan ba tinan. Amen.

Pedro taka nia surat

¹² Silas mak ajuda hau hakerek surat badak nee. Nia nee ita nia maluk iha Kristu nebee hau konfia. Hau hakerek surat nee ba imi para imi bele hamriik metin, i foo sasin loloos kona ba Maromak nia laran diak.

¹³ Kristaun sira iha Babilónia foo kumprimentus ba imi. Nai Maromak hili sira hanesan mos Nia hili imi. Marcos mos foo kumprimentus. Hau haree nia hanesan hau nia oan rasik.

¹⁴ Kumprimenta malu ho domin. Hau harohan para imi hotu nebee fiar ba Kristu bele moris iha paz ho hakmatek. Amen.