1 Pedro 3 - Biblia Tetun Dili

Lia menon ba kaben nain sira

^1-2 Hanesan ita hotu tenki hakruuk ba ita nia ukun nain sira, nunee mos imi feen sira tenki hakruuk ba imi nia laen. Nunee se imi nia laen sira la fiar ba Maromak nia liafuan karik, sira bele haree imi nia moris nebee hatudu laran diak ho respeitu. Too ikus sira mos bele fiar, laos hosi imi nia liafuan, maibee hosi imi nia hahalok nee.

³ Imi feto sira nia furak laos hosi buat nebee mak imi tau ba imi nia isin lolon, hanesan hadia fuuk tuir modelu oi-oin, tara osan mean ka mutin, ka hatais ropa nebee furak.

⁴ Maibee buat nebee mak halo imi feto sira sai furak mak imi nia laran. Feto nebee laran maus ho kalma, sira nee mak furak ba nafatin, i Maromak mos foo folin boot ba sira nia hahalok nee.

⁵ Feto sira nebee uluk moris ho laran moos hodi laran metin ba Maromak, sira nia furak mos nunee. Sira hakruuk ba sira nia laen,

⁶ hanesan Sara. Nia halo tuir nia kaben Abraão hodi respeita nia too bolu nia “nai”. Imi mos sai hanesan Sara nia oan, se imi halo buat nebee mak loos i la tauk buat ida.

⁷ Nunee mos imi laen sira. Imi tenki uza matenek oinsaa mak atu moris hamutuk ho imi nia feen. Hatudu imi nia respeitu ba sira tanba imi komprende katak sira nia forsa la hanesan imi nian, i imi hamutuk sei simu moris rohan-laek tanba Maromak nia laran diak ba imi. Halo nunee para bainhira imi halo orasaun Maromak rona.

Hadomi malu, i prontu simu terus tanba halo buat diak

⁸ Agora hau husu para imi hotu neon ida laran ida, hadomi imi nia maluk sira nebee fiar ba Kristu, hatudu laran maus ba malu i haraik aan.

⁹ Se ema ruma halo aat ba imi, la bele halo aat fali ba sira. Se ema ruma hatete aat imi, la bele hatete aat fali sira, maibee foo bensaun ba sira, tanba Nai Maromak bolu imi atu halo nunee para imi mos hetan bensaun.

¹⁰ Iha Livru Sagradu hakerek dehan, “Ema nebee hadomi nia moris, i hakarak haree loron nebee diak, nia tenki kuidadu nia ibun para la bele koalia aat, i la bele bosok.

¹¹ Nia tenki fila kotuk ba buat aat hodi halo buat nebee diak. Nia tenki hakaas aan hodi buka dame ho ema hotu-hotu,

¹² Tanba Nai Maromak nia matan hateke ba ema nebee moris loos, Nia tilun see ba ema sira nebee husu tulun. Maibee Nai Maromak kontra ema nebee mak halo buat aat.”

¹³ Se imi sempre halo buat nebee diak, see mak atu halo aat ba imi?

¹⁴ Maibee se imi tenki terus ba lia loos, imi sorti boot. Tanba nee, imi la bele tauk i laran taridu ba buat nebee ema sira nebee la fiar ba Kristu tauk.

¹⁵ Respeita ho hamtauk Kristu nudar Nai iha imi nia laran. Se ema ruma husu imi, tanba saa mak imi laran metin ba Nai Maromak, imi tenki prontu hataan ho razaun ba ita nia esperansa ho liafuan mamar no haraik aan.

¹⁶ Imi nia laran tenki moos. Karik ema balu koalia aat imi hodi kritika buat diak nebee mak imi halo tanba imi tuir Kristu. Maibee se imi halo diak nafatin, too ikus sira rasik moe ba sira nia liafuan nee.

¹⁷ Se Nai Maromak hakarak para ita hetan terus tanba halo buat diak, ida nee diak liu duke hetan terus tanba halo buat aat.

¹⁸ Kristu mate dala ida deit ba ita nia sala hotu. Nia nebee moris loos mate ba sala nain sira para lori ita ba Nai Maromak. Nudar ema nebee iha isin ho raan, ema oho tiha Nia, maibee Maromak nia Espiritu halo moris fali Nia.

¹⁹ Espiritu nee mos lori Kristu baa foo sai Nai Maromak nia liafuan ba espiritu sira nebee sei dadur hela.

²⁰ Espiritu sira nee mak uluk lakohi halo tuir Nai Maromak nia liafuan iha Noé nia tempu. Bainhira Noé halo roo boot, Nai Maromak hein ho pasiensia para ema sira nee hakribit sira nia sala, maibee sira lakohi arepende. Too ikus bee sae, i ema nain walu deit mak moris tanba tama ba roo laran.

²¹ Bee boot nee hanesan figura kona ba batizmu, nebee salva imi. Bainhira imi simu batizmu, laos atu hasai foer iha imi nia isin, maibee signifika katak, imi husu para Nai Maromak foo laran diak iha imi nia fuan. Tanba Jesus Kristu moris fali ona hosi mate.

²² Agora Nia sae tiha ona ba lalehan tuur iha Nai Maromak nia sorin loos. I anju sira ho autoridade sira nebee kaer ukun, hotu-hotu hakruuk ba Nia.