1 Pedro 2 - Biblia Tetun Dili

Jesus Kristu hanesan fatuk prinsipal

¹ Tanba nee, soe tiha hahalok aat hotu-hotu! La bele bosok, la bele koalia oin ida hahalok oin seluk, la bele laran moras ema, i la bele hatete aat ema seluk.

² Hanesan bebee ida nebee foin moris hamrook hakarak hemu susu been hosi sira nia inan, nunee mos imi tenki hamrook ba Nai Maromak nia liafuan. Tanba Nia liafuan hanesan susu been diak ba imi nia klamar, halo imi loron ba loron buras ba bebeik, iha imi nia salvasaun.

³ Tanba imi senti ona ita nia Nai nia laran diak.

⁴ Imi hakbesik ona ba Jesus Kristu. Nia hanesan fatuk isin nebee moris. Ema soe tiha fatuk nee, maibee Maromak hili Nia i konsidera Nia folin karun teb-tebes

⁵ Nunee imi ida-idak mos hanesan fatuk isin nebee moris, i Maromak hada dadauk imi hotu too imi hamutuk sai uma ida para Nia Espiritu hela. Maromak mos halo imi sai hanesan nai-lulik nebee moris ho laran moos hodi foo sakrifisiu espiritual ba Nia. I sakrifisiu nee Nia simu ho haksolok, liu hosi Jesus Kristu.

⁶ Tanba iha Livru Sagradu Nai Maromak dehan, “Haree baa! Hau tau hela fatuk ida iha sidade Siaun. Fatuk nee folin boot teb-tebes, i Hau hili fatuk nee para sai fatuk ida nebee importante liu iha sidade nee. See mak fiar ba Nia sei la moe.”

⁷ Fatuk nee mak Jesus Kristu. Nia folin karun teb-tebes ba imi nebee fiar Nia. Maibee ba ema nebee la fiar, Livru Sagradu hakerek dehan, “Fatuk ida nebee badaen sira soe tiha ona, agora sai fali fatuk nebee importante.”

⁸ I hakerek mos nunee: “Fatuk nee halo ema sidi, i halo sira monu.” Sira sidi iha fatuk nee tanba sira lakohi rona Nai Maromak nia liafuan. I Nai Maromak mos desidi nanis ona atu sira sai nunee.

⁹ Maibee imi laos nunee. Imi Nai Maromak hili tiha ona hodi sai Nia povu. Imi hanesan nai-lulik nebee mak serbii liurai. Imi hanesan nasaun ida nebee moris loos. Imi Maromak nia povu. Maromak hili imi nunee para imi bele konta sai buat diak nebee mak Maromak halo tiha ona ba imi. Tanba Nia mak bolu imi sai hosi nakukun hodi tama ba iha Nia naroman ida nebee furak teb-tebes.

¹⁰ Uluk imi laos Nai Maromak nia povu, maibee agora imi sai ona Nia povu. Uluk imi seidauk simu Maromak nia domin, maibee agora imi simu ona.

Hakaas aan para moris loos

¹¹ Maluk doben sira, imi nee ema lao rai deit, imi hela iha mundu nee la kleur ida. Tanba nee hau husu atu imi hadook aan hosi imi nia hakarak nebee aat, tanba imi nia hakarak aat sempre halo funu hasoru imi nia aan.

¹² Imi tenki hakaas aan para moris loos iha ema nebee laos judeu sira nia leet. Nunee, se sira duun matak imi, sira bele haree deit imi nia hahalok diak, i bainhira Jesus fila fali mai hosi lalehan, ema sira nebee laos judeu sira sei foti aas Nai Maromak nia naran.

Hakruuk ba ukun nain sira

¹³ Ita nia Nai hakarak imi tenki hakruuk ba ukun nain sira. Imi tenki hakruuk ba liurai, tanba nia mak ukun nain nebee boot liu.

¹⁴ Hakruuk mos ba ukun nain sira seluk, tanba liurai foti sira para kastigu ema nebee mak halo aat i gaba ema nebee mak hahalok diak.

¹⁵ Tanba Nai Maromak hakarak para imi halo buat nebee diak, atu ema beik-teen sira nebee mak la hatene buat ida, la iha liafuan ida atu koalia hasoru imi.

¹⁶ Imi simu ona liberdade hosi Maromak. Nunee imi tenki moris hanesan ema nebee livre ona. La bele uza imi nia liberdade nee hodi halo fali buat aat, maibee moris hanesan Maromak nia atan.

¹⁷ Hatudu respeitu ba ema hotu-hotu, hadomi imi nia maluk sarani sira, hamtauk Nai Maromak, i respeita liurai.

Aguenta iha terus laran hanesan Jesus Kristu

¹⁸ Atan sira, hakruuk ba imi nia patraun, i respeita sira. La bele hakruuk deit ba patraun nebee mak laran diak i ibun midar. Maibee hakruuk mos ba patraun nebee mak laran aat.

¹⁹ Se ema kastigu imi maski imi la sala, i imi aguenta ho pasiensia nafatin, tanba imi hatene Maromak nia hakarak, maka Nia sei hatudu nia laran diak ba imi.

²⁰ Se karik imi halo sala mak ema baku, imi manaan saida se aguenta ho pasiensia? Maibee se imi hetan terus tanba halo buat diak, i imi aguenta, ida nee mak Maromak simu ho laran haksolok.

²¹ Maromak bolu imi para moris nunee, tanba Kristu mos terus ba imi. Nunee Nia sai ezemplu atu imi lao tuir nia ain fatin.

²² Iha Livru Sagradu hakerek nunee: “Nia nunka halo sala. Liafuan bosok nunka sai hosi Nia ibun.”

²³ Bainhira ema tolok Nia, Nia la kontra hasoru. Bainhira ema halo Nia terus, Nia la ameasa atu halo aat fali sira. Maibee Nia entrega Nia Aan ba Nai Maromak nia liman, tanba Maromak mak tesi lia ho loloos.

²⁴ Kristu rasik mak lori ita nia sala iha ai krus leten para ita nebee mate ba sala bele moris iha lia loos. Nia kanek sira nee mak kura ona imi.

²⁵ Uluk imi hanesan bibi malae nebee mak lao sala dalan. Maibee agora imi fila fali ona ba imi nia Bibi Atan, i Nia mak tau matan ba imi.