1 Pedro 1 - Biblia Tetun Dili

Pedro hahuu nia surat

^1-2 Surat nee hosi hau, Pedro, nudar Jesus Kristu nia apostolu. Hau hakerek surat nee ba imi hotu nebee mak Nai Maromak hili tiha ona. Imi ema lao rai, namkari iha fatin-fatin iha rai Pontus, Galasia, Kapadósia, Azia kiik ho mos Bitínia. Hori uluk kedas Aman Maromak hili tiha ona imi para sai Nia ema. Maromak nia Espiritu halo imi sai ema nebee moris loos atu imi moris tuir Jesus Kristu nia hakarak i simu raan nebee Jesus fakar ba imi hodi hamoos imi nia sala. Hau harohan para loron ba loron Nai Maromak hatudu Nia laran diak ba imi, i foo paz ho hakmatek ida ke boot teb-tebes ba imi.

Ita laran metin katak Nai Maromak sei salva ita

³ Mai ita hahii Nai Maromak! Nia mak ita nia Nai Jesus Kristu nia Aman. Nai Maromak hadomi teb-tebes ita, too Nia foo moris foun mai ita. Ita bele simu moris foun nee tanba Nia halo moris fali ona Jesus Kristu hosi mate. Nunee agora ita moris nakonu ho esperansa

⁴ hodi hein atu simu rikusoin nebee mak Maromak prepara ona ba ita iha lalehan. Rikusoin nee nunka mohu, nunka aat, i nunka menus.

⁵ Tanba imi nia fiar ba Nai Maromak, Nia sei kuidadu nafatin imi hodi Nia kbiit too imi simu salvasaun nebee Maromak prepara tiha ona atu hatudu sai bainhira mundu nee remata.

⁶ Tanba nee imi nia laran haksolok, maski iha imi nia moris agora imi laran susar tanba tenki hasoru tentasaun oi-oin, maibee tentasaun nee la kleur ida.

⁷ Imi hetan tentasaun nee para bele hatudu katak imi fiar metin ba Nai Maromak. Imi bele kompara ho osan mean. Hodi hatene osan mean loloos ita tenki hatama ba ahi hodi hasae nia foer. Afinal osan mean nee too loron ida sei aat. Tuir Maromak nia haree, imi nia fiar folin aas liu osan mean. Nee mak Nai Maromak husik imi hasoru tentasaun para koko imi nia fiar. Se imi fiar nafatin, entaun aban-bainrua bainhira Jesus Kristu fila fali mai, Maromak sei gaba imi, respeita imi i foti aas imi nia naran.

⁸ Maski imi seidauk haree Jesus, maibee imi hadomi Nia. Maski agora imi la haree Nia mos, imi fiar ba Nia. Imi nia laran haksolok liu too imi la hatene atu koalia oinsaa,

⁹ tanba imi nia fiar nee imi hetan ona salvasaun.

¹⁰ Uluk profeta sira foo sai ona kona ba Nai Maromak nia laran diak ba imi. Sira buka hatene didiak oinsaa mak Nai Maromak atu salva imi.

¹¹ Iha momentu nebaa, Kristu nia Espiritu hela iha sira nia laran i foo hatene katak, aban-bainrua Kristu sei hetan terus mak foin Nai Maromak foti aas Nia. Entaun profeta sira buka hatene bainhira loos mak buat sira nee atu akontese i sei akontese oinsaa.

¹² Espiritu Santu foo hatene ba sira katak, buat nebee sira foo sai nee, laos atu serbii sira nia aan, maibee atu serbii imi. Novidade Diak nebee profeta sira foo sai nee, ikus mai imi mos rona hosi ema seluk. Sira nee simu kbiit hosi Maromak Nia Espiritu hosi lalehan para haklaken Nia Novidade Diak nee ba imi. Afinal anju sira mos hakarak teb-tebes atu hatene buat sira nee.

Ita tenki moris loos

¹³ Tanba nee, matan moris neon nain hodi komprende didiak buat sira nee hotu. I hein ho laran metin nafatin atu Maromak hatudu Nia laran diak ba imi bainhira Jesus Kristu fila fali mai.

¹⁴ Moris hanesan oan nebee sempre halo tuir i la bele halo tuir fali imi nia hakarak aat uluk nian bainhira imi seidauk konhese Nai Maromak.

¹⁵ Nia bolu ona imi atu sai Nia ema, i Nia nee laran moos. Nunee iha imi nia moris tomak, imi mos tenki moris ho laran moos.

¹⁶ Tanba iha Livru Sagradu hakerek nunee: “Imi tenki moris ho laran moos, tanba Hau laran moos.”

¹⁷ Bainhira imi halo orasaun, imi bolu Nai Maromak imi nia Aman. Ida nebee imi bolu Aman nee sei tesi ema hotu-hotu nia lia tuir ida-idak nia hahalok, Nia la fihir ba ema. Tanba nee imi tenki hamtauk ho respeita Nia iha imi nia moris nudar ema lao rai iha mundu nee.

¹⁸ Uluk imi moris tuir dalan nebee mak imi nia bei-ala sira hatudu hela ba imi, i dalan nee la iha folin. Maibee imi hatene katak Kristu selu kotu ona hodi hasai imi hosi imi nia moris ida uluk nee. Nia laos selu imi nia moris nee ho buat ruma nebee too ikus sei mohu, hanesan osan mean ka osan mutin.

¹⁹ Maibee Nia selu ho Nia raan rasik. Nia raan nee folin karun teb-tebes! Kristu mate hanesan bibi malae oan nebee ema oho hodi halo sakrifisiu ba Nai Maromak. Nia sai sakrifisiu ida ke moos loos, sala ida mos la iha.

²⁰ Uluk liu, molok Nai Maromak halo mundu nee, Nia hili tiha ona Kristu atu selu kotu imi. Agora, mundu besik atu remata ona, foin Nai Maromak haruka Kristu mai para tulun imi.

²¹ Liu hosi Kristu mak imi fiar ba Nai Maromak. Tanba Maromak halo moris fali ona Kristu hosi mate hodi foti aas Nia, atu ita fiar ba Nia, i laran metin ba Nia promesa.

²² Imi hamoos ona imi nia aan hodi hatudu imi nia domin loloos ba maluk sarani sira, tanba imi moris tuir buat nebee mak loos. Agora hau husu atu imi hadomi malu nafatin ho fuan ho laran,

²³ tanba imi hetan ona moris foun. I moris foun nee, laos mai hosi fini nebee la kleur tan sei mate, maibee hosi fini nebee moris tinan ba tinan. Nee mak Maromak nia liafuan nebee foo moris.

²⁴ Iha Livru Sagradu dehan nunee: “Ema hotu-hotu hanesan duut. Sira nia furak hanesan ai funan nebee moris iha rai fuik. Duut sei namlaik, nia funan sei monu ba rai.

²⁵ Maibee Nai Maromak nia liafuan iha nafatin.” Nia liafuan nee mak Novidade Diak nebee ema foo sai tiha ona ba imi.