1 Korintu 9 - Biblia Tetun Dili

Paulo lakohi uza nia direitu nudar apostolu

¹ Hau ema ida nebee livre. Hau haree ona ita nia Nai Jesus ho matan rasik, i Nia foti hau sai Nia apostolu. Liu hosi hau nia knaar nudar apostolu mak imi sira nee fiar ba Nai Jesus.

² Maski iha ema balu la simu hau nudar apostolu, maibee imi simu duni hau nudar apostolu. Hau nia rezultadu serbisu mos hatudu katak hau nee apostolu, tanba liu hosi hau nia serbisu mak imi fiar ba Nai Jesus.

³ Ba ema sira nebee kritika hau, hau hakarak defende aan dehan:

⁴ Imi hanoin hau ho Barnabé la iha direitu atu imi foo haan no foo hemu ami ka?

⁵ Imi hanoin ami la iha direitu atu kaben ho feto kristaun hodi akompanha ami ka? Afinal Pedro ho apostolu sira seluk ho mos Nai Jesus nia alin sira kaben.

⁶ Imi hanoin hau ho Barnabé deit mak tenki serbisu hodi sustenta ami nia aan ka?

⁷ Hanoin took. Soldadu nebee halo funu, nia la buka nia hahaan rasik. Ema nebee kuda uvas, nia bele haan uvas nia fuan. Ema nebee hakiak bibi malae, nia bele hemu bibi malae nia susu been.

⁸ Hau koalia nunee laos tuir ita ema nia hanoin. Moisés nia lei mos foo hatene hanesan nee.

⁹ Iha lei nee hakerek dehan, “Se ema uza karau hodi sama hare, la bele kesi nia ibun, para nia bele haan.” Maromak hanoin deit karau nee ka

¹⁰ Nia mos hanoin ita ema? Loos duni, liafuan nee hakerek ba ita. Tanba ema nebee halai natar ho ema nebee sama hare, sira hotu laran metin katak too ikus sira sei simu sira ninian.

¹¹ Nunee mos ami nebee hatoo Maromak nia liafuan ba imi. Ami iha direitu atu imi foo haan no foo hemu ami.

¹² Ema seluk nebee hanorin imi, sira iha direitu atu imi foo haan-hemu. Saa tan ami. Ami nia direitu liu fali sira! Maibee ami nunka uza ami nia direitu nee. Ami prontu simu terus saida deit atu nunee Novidade Diak kona ba Kristu bele lao ba oin nafatin.

¹³ Imi hatene katak, nai lulik sira nebee serbii iha uma kreda boot, sira moris hosi oferta nebee ema lori ba. I sira nebee serbii iha meza sakrifisiu, sira bele haan naan hosi animal nebee ema lori ba.

¹⁴ Nunee mos ita nia Nai foo orden dehan, ema nebee iha knaar hodi foo sai Novidade Diak, sira bele moris hosi sira nia serbisu nee.

¹⁵ Maski hau iha direitu, maibee hau nunka husu atu ema selu hau nia kolen. Hau mos la haruka surat nee ba imi atu husu imi foo buat ruma. Mai hau, diak liu hau mate duke hau husu! Tanba se hau husu, oinsaa mak hau bele gaba aan dehan hau foo sai Novidade Diak ho gratis?

¹⁶ Maibee se hau foo sai Novidade Diak, hau la bele foti aan, tanba nee hau nia obrigasaun. Hau sei hetan susar ka terus se hau la foo sai Novidade Diak!

¹⁷ Se hau rasik mak hakarak foo sai Novidade Diak nee, entaun hau bele hein atu simu hau nia direitu. Maibee Maromak mak foo fiar mai hau atu halao serbisu nee. Nunee hau la hein atu simu buat ida, tanba hau halo tuir deit buat nebee mak Nia foo mai hau.

¹⁸ Entaun hau sei hetan saida hodi selu hau nia kolen? Buat nebee hau simu mak nee: Hau bele haksolok foo sai Novidade Diak ho gratis. Nee mak bainhira hau foo sai Novidade Diak, hau nunka husu hau nia direitu.

¹⁹ Tuir loloos, hau laos ema ida nia atan. Maski nunee, hau halo hau nia aan sai atan ba ema hotu, atu nunee hau bele manaan ema barak hodi tuir Kristu.

²⁰ Ba ema Judeu, bainhira hau hamutuk ho sira, hau halo hau nia aan hanesan ema Judeu, atu nunee hau bele manaan sira. Ba ema nebee kaer metin Moisés nia lei, bainhira hau hamutuk ho sira, hau halo hau nia aan hanesan ema nebee kaer metin lei sira nee. Maski hau rasik la moris iha lei nia okos, maibee hau halo nunee atu hau bele manaan sira.

²¹ Ba ema nebee la moris iha Moisés nia lei, hau halo hau nia aan hanesan ema nebee la hatene lei sira nee. Maski hau rasik la haluha Maromak nia lei, maibee hau hakruuk ba Kristu nia lei, hau halo hanesan nee hodi manaan sira.

²² Ba ema nebee fraku, hau mos sai fraku, atu nunee bele manaan sira. Nunee, ba see-see deit hau halo hau nia aan hanesan sira, hau prontu halo saida deit atu bele lori sira balu ba salvasaun.

²³ Hau halo buat sira nee hotu atu ema barak bele moris tuir Novidade Diak. Liu hosi nee hau bele halo parte hamutuk ho sira.

²⁴ Bainhira ema barak halai taru, maibee ida deit mak manaan premiu. Tanba nee imi tenki halai makaas atu imi bele hetan premiu nee.

²⁵ Ema hotu nebee tama iha kompetisaun, sira tenki treinu sira nia aan ho disiplina. Sira halo nunee atu bele manaan premiu ida nebee la dura. Maibee ita sira nee treinu ita nia aan atu hetan premiu ida nebee dura tinan ba tinan.

²⁶ Nunee hau la halai arbiru. Se kompara ho kompetisaun tuku malu, hau la tuku arbiru deit.

²⁷ Hau treinu makaas hau nia aan, too hau domina hau nia aan tomak. Tanba hau preokupa, keta halo be, bainhira hau foo sai Novidade Diak ba ema, iha ikus hau rasik la simu premiu.