1 Korintu 8 - Biblia Tetun Dili

Kona ba naan nebee ema hamulak tiha ba lulik

¹ Agora hau hakarak koalia kona ba naan nebee ema hamulak tiha ona ba lulik. Ita sarani sira senti aan dehan ita hotu hatene ona kona ba buat nee. Ema nebee hatene buat ruma, nia foti aan, maibee ema nebee iha domin, hametin ema nia fiar.

² Ema nebee konsidera nia aan matenek ona, afinal nia seidauk matenek loloos.

³ Maibee ema nebee hadomi Maromak, ema nee mak Maromak konhese.

⁴ Agora, kona ba naan nebee ema hamulak ona ba lulik: Ita hotu hatene katak, lulik nebee ema adora iha mundu nee la vale buat ida. Tanba Maromak nee ida deit, la iha tan Maromak seluk.

⁵ Ema dehan iha maromak oi-oin iha lalehan ho iha rai, sira adora maromak bar-barak nudar sira nia nai.

⁶ Maibee ba ita sarani sira, Maromak ida deit, Nia mak ita hotu nia Aman. Nia mak huun ba buat hotu-hotu, i ita moris atu serbii Nia. Ita nia Nai mos ida deit, Nia mak Jesus Kristu. Liu hosi Nia, buat hotu-hotu iha, ita hetan moris loos liu hosi Nia.

⁷ Maibee sarani balu la hatene buat nee. Uluk sira seidauk fiar, sira toman ona adora lulik. Nunee se sira haan naan nebee ema hamulak ona ba lulik, sira hanoin dehan sira mos adora hotu lulik nee. Nunee sira senti sira halo sala, tanba sira nia laran rurua.

⁸ Hahaan la lori ita besik ba Maromak. Ita haan ka la haan la halo ita sai diak ka sai aat.

⁹ Maski nunee, kuidadu. O livre atu haan naan saida deit, maibee keta halo be o uza o nia liberdade nee hodi sai fatuk sidi ba o nia maluk sarani nebee sei laran rurua.

¹⁰ Hau nia hanoin nunee, se ita nebee fiar makaas tuur haan hela iha fatin lulik, depois ema ida haree ema nee tuur hela iha nebaa, nia sei hanoin saida? Entaun ema nebee fiar la metin sei hanoin haan naan iha fatin lulik nee la iha tan problema ba nia, maski sira haan iha fatin lulik.

¹¹ Nunee ho buat nebee o hatene nee, o estraga fali o nia maluk sarani nebee fiar seidauk metin. Afinal Kristu mos mate ba nia.

¹² Bainhira o halo sala hasoru o nia maluk sarani i o halo kanek sira nia laran nebee fiar sei fraku, nunee mos o halo sala hasoru Kristu.

¹³ Entaun, se naan nebee hau haan nee halo hau sai fali fatuk sidi ba hau nia maluk, hau prontu atu la haan naan tan. Tanba hau lakohi halo hau nia maluk monu.