1 Korintu 7 - Biblia Tetun Dili

Kona ba kazamentu

¹ Agora hau hakarak hataan buat nebee imi hakerek mai hau dehan, “Diak liu mane la bele hola feto.”

² Maibee, tanba tentasaun seksual makaas teb-tebes, diak liu mane ida-idak iha nia feen rasik i feto ida-idak mos iha nia laen rasik.

³ Imi kaben nain sira tenki halo tuir imi nia obrigasaun nudar feen-laen. Laen nia obrigasaun mak tenki toba hamutuk ho nia feen, nunee mos feen nia obrigasaun mak tenki toba hamutuk ho nia laen.

⁴ Feen la bele dehan nia isin nee ninian rasik, tanba nia foo tiha ona ba nia laen. Nunee mos laen la bele dehan nia isin nee ninian rasik, tanba nia foo tiha ona ba nia feen.

⁵ Imi feen-laen sira la bele hadook aan ba malu. Maibee se karik imi desidi hamutuk atu hadook aan iha tempu badak para bele foo fokus ba orasaun, nee bele. Maibee bainhira tempu nee hotu ona, imi tenki hamutuk fali nudar feen-laen. Keta halo be Satanás tenta imi tanba imi la aguenta.

⁶ Hau hatete ida nee laos hanesan regra ida, maibee atu foo dalan deit.

⁷ Tuir loos hau hakarak para ema hotu-hotu moris la kaben, hanesan hau. Maibee hau hatene katak Maromak foo kbiit ba ema balu atu la kaben, i foo kbiit ba ema seluk atu kaben.

⁸ Hau hakarak hatete ba klosan sira ho mos feto faluk sira katak, diak liu imi la kaben, hanesan hau.

⁹ Maibee se imi senti la domina aan tan, diak liu imi kaben duke moris ho hakarak duni atu halo relasaun seksual.

¹⁰ Agora hau foo orden ba kaben nain sira. Orden nee laos hosi hau rasik, maibee hosi Nai Jesus. Feen la bele soe nia laen.

¹¹ Maibee se nia soe nia laen, nia la bele kaben tan ho mane seluk. Nia bele mesak nafatin, se lae dame malu fali ho nia laen. Laen mos la bele soe nia feen.

¹² Agora hau koalia ba sira seluk. Ida nee hosi hau, laos hosi Nai Jesus. Se mane ida fiar ba Kristu i nia feen la fiar, maibee feto nee hakarak moris hamutuk nafatin, la bele soe nia.

¹³ Nunee mos, se feto ida fiar ba Kristu i nia laen la fiar, maibee mane nee hakarak moris hamutuk nafatin, la bele soe nia.

¹⁴ Tanba feen nebee fiar lori moris santu ba laen nebee la fiar. Nunee mos, laen nebee fiar lori moris santu ba feen nebee la fiar. Se laos nunee, sira nia oan sira la moris santu. Maibee agora sira nia oan sira moris santu ona.

¹⁵ Maibee se ema nebee la fiar ba Kristu hakarak husik nia kaben nebee fiar, entaun husik baa. Nia kaben nebee fiar nee livre ona. Tanba Maromak bolu imi atu moris iha paz ho hakmatek nia laran.

¹⁶ Feen sira nebee fiar, dala ruma imi nia laen sira bele hetan salvasaun liu hosi imi. Nunee mos laen sira nebee fiar, dala ruma imi nia feen sira bele hetan salvasaun liu hosi imi.

Ita tenki moris tuir dalan nebee Maromak foo mai ita

¹⁷ Maromak foo mai ita ida-idak tuir saida mak Nia desidi ona. Nunee, bainhira Maromak bolu ita atu sai Nia ema, diak liu ita ida-idak tuir nafatin ita nia dalan nee. Regra nee hau hanorin ba sarani sira iha fatin-fatin.

¹⁸ Ezemplu, se ema ida sunat ona bainhira Maromak bolu nia, keta buka dalan atu halakon fali sunat nee. Nunee mos ho ema nebee seidauk sunat bainhira Maromak bolu nia, lalika husu atu sunat.

¹⁹ Tanba sunat ka la sunat, nee la importante. Importante mak ita halo tuir Maromak nia ukun fuan.

²⁰ Diak liu imi ida-idak moris nafatin hanesan uluk bainhira Maromak bolu imi sai Nia ema.

²¹ Karik uluk imi nudar ema nia atan Maromak bolu imi atu tuir Nia. Nee la buat ida. Maibee se imi bele sai livre, diak liu tan.

²² Keta haluha, bainhira Maromak bolu atan ida atu tuir Nai Jesus, atan nee sai livre iha Nai Jesus nia oin. Nunee mos ema nebee livre, Maromak bolu ema nee sai Kristu nia atan.

²³ Maromak sosa kotu tiha ona imi ho folin nebee karun. Nee duni imi la bele sai tan atan ba ema seluk.

²⁴ Entaun maun-alin sira, iha imi nia moris hamutuk ho Maromak, diak liu imi ida-idak moris nafatin hanesan uluk bainhira Maromak bolu imi sai Nia povu.

Lia menon ba ema nebee la kaben

²⁵ Imi husu hau kona ba feto raan sira. Ita nia Nai la foo hatene mai hau kona ba buat sira nee. Maibee imi bele fiar hau nia liafuan tanba Nai Maromak hatudu nia laran diak mai hau.

²⁶ Tuir hau nia hanoin, diak liu klosan sira sai klosan nafatin tanba agora dadaun mundu nakonu ho terus oi-oin.

²⁷ Imi nebee iha feen, la bele fahe malu ho nia. Imi nebee la iha feen, lalika buka atu kaben.

²⁸ Maibee se imi kaben, nee la sala ida. Nunee mos se feto klosan kaben, la sala ida. Maibee ema nebee kaben sei hetan susar oi-oin iha mundu nee, i hau hakarak atu imi la bele hetan susar nunee.

²⁹ Maun-alin sira, hau nia hanoin nunee: tempu besik hotu ona. Nunee komesa agora, ema nebee iha feen la bele hanoin deit nia feen.

³⁰ Ema nebee tanis la bele hanoin deit nia laran tristi nee. Ema nebee haksolok la bele hanoin deit nia haksolok nee. Ema nebee sosa sasaan la bele hanoin deit nia sasaan nee.

³¹ Ema nebee uza sasaan saida deit iha mundu nee la bele laran metin ba sasaan sira nee. Tanba la kleur tan mundu nebee ita haree dadaun nee la iha ona.

³² Hau lakohi atu imi preokupa kona ba buat oi-oin. Mane nebee la kaben, nia preokupa deit ba ita nia Nai, nia hakarak halo haksolok Nai nia laran.

³³ Maibee mane nebee iha feen, nia preokupa ba moris iha mundu nee, nia hakarak halo haksolok nia feen nia laran.

³⁴ Nee halo nia hanoin fahe ba rua. Nunee mos feto nebee la iha ona laen ka feto nebee sei feto raan, nia preokupa ba ita nia Nai, nia hakarak foo nia isin ho klamar tomak ba Nai. Maibee feto nebee iha laen, nia preokupa ba moris iha mundu nee, nia hakarak halo haksolok nia laen nia laran.

³⁵ Hau foo hanoin buat sira nee ba imi atu ajuda imi, laos atu bandu imi kaben ka la kaben. Hau hakarak atu imi moris tuir dalan nebee loos hodi serbii ita nia Nai ho laran tomak.

³⁶ Ba mane nebee idade boot ona, se nia hakarak atu kaben ona tanba nia la domina aan ona i feto nebee nia atu kaben mos tinan boot ba dadaun, entaun kaben deit baa. Nee la sala ida.

³⁷ Maibee se nia desidi atu la kaben, nee mos buat diak ida. Naran katak nia bele domina aan, i nia rasik mak foti desizaun nee, laos ema seluk mak obriga.

³⁸ Nunee, se nia kaben ho nia namorada nee, nia halo buat diak. Maibee se nia desidi atu la kaben, nee diak liu tan.

³⁹ Feto nebee kaben ona, nia sai ida deit ho nia laen durante nia laen sei moris. Maibee se nia laen mate ona, nia bele kaben fali, naran katak nia laen ida foun nee mos fiar ba Nai Jesus.

⁴⁰ Tuir hau nia hanoin, se feto faluk nee la kaben fali, nee diak liu tan. Hau hanoin liafuan nee mai hosi Maromak nia Espiritu.