1 Korintu 6 - Biblia Tetun Dili

Sarani sira la bele lori malu ba tribunal

¹ Bainhira imi iha problema ruma, nusaa mak imi lori malu ba iha juiz nebee la konhese Maromak? Nusaa mak la lori ba ema sira nebee fiar ba Maromak mak rezolve?

² Imi la hatene katak Maromak nia povu mak sei tesi ema iha mundu nee nia lia? Entaun nusaa mak imi la bele rezolve problema kiik sira nee?

³ Nunee imi la hatene katak aban-bainrua ita sei tesi anju sira nia lia? Entaun tuir loos imi bele rezolve problema nebee mosu iha imi nia moris loro-loron.

⁴ Nusaa mak problema hanesan nee, imi entrega fali ba juiz nebee naran la diak iha sarani sira nia leet?

⁵ Hau koalia nunee atu halo imi moe. Keta halo be imi la iha ema ida nebee matenek atu tesi imi sarani sira nia lia.

⁶ Too imi lori fali imi nia maluk sarani baa kesar iha tribunal, ba iha ema sira nebee la fiar Maromak.

⁷ Bainhira imi lori malu ba iha tribunal, bele dehan imi lakon ona. Se imi nia maluk sarani halo problema ho imi, diak liu simu tiha deit. Se sira han-matak imi nia sasaan ruma, diak liu husik deit baa.

⁸ Maibee imi rasik mos han-matak ema nia sasaan i halo ema seluk lakon. Aat liu tan, imi halo ba imi nia maluk sarani rasik.

⁹ Keta bosok imi nia aan. Imi hatene ona katak, ema halo buat aat sei la tama iha Maromak nia reinu. Hanesan ema nebee halo relasaun seksual la loos, adora lulik, halo relasaun seksual ho ema nebee laos nia feen ka laen, mane ho mane hola fali malu,

¹⁰ naok-teen, matan naklosu ba osan, lanu-teen, hatete aat ema, ka han-matak ema nia sasaan. See mak moris hanesan nee sei la tama iha Maromak nia reinu.

¹¹ Afinal uluk imi balu mos hahalok hanesan nee. Maibee agora Maromak hamoos tiha ona imi nia sala, Nia halo imi moris ho laran moos, i Nia simu ona imi. Ita nia Maromak halo buat sira nee hotu liu hosi Nai Jesus Kristu hodi Maromak nia Espiritu nia kbiit.

Matan moris neon nain ba relasaun seksual nebee la loos

¹² Ema bele dehan, “Ita bele halo saida deit.” Maibee nee laos dehan katak buat hotu nee lori diak ba ita. Hau rasik mos lakohi atu buat ruma domina fali hau.

¹³ Ema balu mos dehan, “Ita haan para ita nia kabun bosu, ita nia kabun bosu ba hahaan.” Maibee too loron ida Maromak sei halo buat rua nee la iha tiha. Ita nia isin laos para halo relasaun seksual la loos, maibee para serbii Nai Jesus, i Nia mak Nain ba ita nia isin.

¹⁴ Maromak halo moris fali Jesus hosi mate, nunee mos Nia sei halo moris fali ita hosi mate ho Nia kbiit.

¹⁵ Keta haluha katak, imi nia isin lolon halo parte iha Kristu. Entaun hau nia isin lolon nebee sai tiha ona Kristu nian nee, hau atu entrega fali hodi halo relasaun seksual ho feto luroon ka? Mak lae duni!

¹⁶ Imi hatene ona katak, ema nebee foo nia aan ba feto luroon, nia sai ona ida ho feto nee. Tanba iha Livru Sagradu hakerek dehan, “Sira nain rua sai ona ida.”

¹⁷ Maibee ema nebee mak foo nia aan ba ita nia Nai, sai laran ida ho Nia.

¹⁸ Imi tenki halai dook hosi relasaun seksual nebee la loos. Tanba see mak halo relasaun seksual la loos, nia halo sala hasoru nia isin rasik, sala sel-seluk lae.

¹⁹ Keta haluha katak imi nia isin lolon sai hanesan uma kreda para Espiritu Santu hodi hela. Maromak rasik mak foo Nia Espiritu nee ba imi, i Nia Espiritu hela iha imi nia laran. Nee duni imi nia isin nee laos imi nian, maibee Maromak nian.

²⁰ Maromak sosa kotu ona imi ho folin nebee karun. Nee duni imi tenki uza imi nia isin lolon hodi foti aas Maromak.