1 Korintu 5 - Biblia Tetun Dili

Iha ema ida halo relasaun seksual la loos iha sarani sira nia leet

¹ Hau rona katak, iha ema ida hosi imi mak iha relasaun seksual la loos, nia hola fali nia aman nia feen kiik. Saida mak nia halo nee aat liu fali ema nebee mak la konhese Maromak.

² Maibee imi foti aan nafatin hanesan fali buat ida la kona imi. Tuir loos imi tenki moe i laran susar. I ema nee, imi tenki bandu atu la bele hamutuk tan ho imi sarani sira.

³ Maski hau dook hosi imi, maibee hau nia laran hamutuk ho imi nafatin. Nunee hau desidi tiha ona ema nee nia kastigu, hanesan mos hau iha nebaa.

⁴ Entaun imi tenki halibur malu hamutuk hodi Nai Jesus nia naran. Hau nia laran mos sei hamutuk ho imi iha nebaa. Hodi Nai Jesus nia kbiit

⁵ imi tenki entrega nia baa iha Satanás nia liman. Nunee nia sei hetan susar ho terus iha mundu nee, atu nia bele husik nia hahalok aat nee i bele hetan salvasaun bainhira Nai Jesus fila fali mai.

⁶ La bele foti aan tan! Keta haluha katak, ita kahur fermentu ituan deit ba trigu, bele halo masa trigu tomak nee sae. Nunee mos se imi husik ema halo buat aat iha imi nia klaran, sarani sira seluk mos bele halo tuir.

⁷ Nee duni, soe tiha fermentu tuan nee, para imi bele sai hanesan trigu foun nebee la iha fermentu. Tanba Kristu mate tiha ona hanesan bibi malae oan nebee ema Judeu oho nudar sakrifisiu iha tempu Paskua.

⁸ Tanba nee, mai ita moris hanesan ema nebee selebra festa Páskua. Nunee ita la haan ona paun nebee mak tau fermentu tuan, nee dehan katak ita la bele halo ona sala ho buat aat oi-oin. Maibee ita haan fali paun nebee mak la tau fermentu, nee dehan katak, ita moris ho laran moos i koalia lia loos.

⁹ Uluk hau hakerek ba imi dehan, imi la bele ransu ho ema nebee moris iha relasaun seksual la loos.

¹⁰ Maibee hau laos bandu imi atu ransu ho ema hotu nebee halo sala seksual ka sala selu-seluk, hanesan matan naklosu ba osan, han-matak ema nia sasaan, ka adora fali lulik. Se ita lakohi ransu ema sira hanesan nee, diak liu ita husik tiha mundu nee.

¹¹ Hau hakarak hatete mak nee: La bele ransu ema nebee dehan nia fiar ba Kristu, maibee nia iha relasaun seksual la loos, nia matan naklosu ba osan, adora fali lulik, hatete aat ema, lanu-teen ka han-matak ema nia sasaan. La bele ransu ema hanesan nee, atu tuur haan hamutuk mos la bele.

^12-13 Kona ba ema nebee la fiar ba Kristu, hau la iha direitu atu julga sira. Maromak mak hatene sira sala ka lae. Maibee kona ba imi nia maluk sarani, imi rasik tenki tesi sira nia lia. Hanesan hakerek tiha ona iha Livru Sagradu dehan, “Duni sai tiha ema aat hosi imi nia klaran.”