1 Korintu 4 - Biblia Tetun Dili

Kristu nia apostulu sira

¹ Nee duni, imi tenki konsidera ami nee Kristu nia atan deit. Maromak foo fiar mai ami atu foo sai Nia planu segredu.

² Baibain patraun foo fiar ba nia atan ida, atan nee tenki foo laran ba nia patraun.

³ Mai hau, imi atu dehan hau atan diak ka la diak, hau la preokupa. Atu tribunal mak desidi mos, hau la interese. Hau rasik mos la julga hau nia aan hodi desidi, hau atan ida nebee diak ka lae.

⁴ Hau hanoin hau nia laran moos, maibee nee laos dehan katak hau la iha sala. Nai Jesus mak sei julga hau nia moris loos ka lae.

⁵ Nee duni la bele julga ema seluk, tanba tempu atu tesi lia seidauk too. Hein too Nai Jesus fila fali mai hosi lalehan. Nia sei tesi ema hotu-hotu nia lia. Saida deit mak ema halo iha nakukun laran, Nia sei foo sai iha ema hotu nia oin. Too ema nia hanoin nebee segredu mos, Nia sei hatudu sai. Depois Maromak mak sei gaba ema ida-idak tuir sira nia serbisu nebee sira halo ba Nia.

⁶ Maun-alin sira, iha hau nia liafuan ohin nee, hau temi hau nia aan ho Apolo hanesan ezemplu, para imi bele komprende liafuan nebee dehan, “Halo tuir saida mak hakerek iha Livru Sagradu, la bele halo liu ida nee.” Se imi halo tuir liafuan nee, imi sei la foti aas responsavel ida i hatuun fali ida seluk.

⁷ Imi hanoin dehan imi importante liu ema seluk ka? Buat hotu-hotu nebee imi iha, Maromak mak foo. Entaun nusaa mak imi foti aan hanesan fali imi hetan buat sira nee hosi imi nia kbiit rasik?

⁸ Imi hanoin katak imi iha ona buat hotu-hotu, imi riku ona, imi ukun ona hanesan liurai. Maibee ami lae. Se imi sai liurai duni, entaun ami mos kontenti, tanba ami bele ukun hamutuk ho imi.

⁹ Tuir hau nia hanoin, Maromak foo mai ami, apostolu sira, fatin nebee ikus liu. Ami hanesan ema dadur nebee atu simu kastigu mate iha ema hotu-hotu nia oin. Ema iha mundu tomak hateke ba ami, anju sira mos hateke hela.

¹⁰ Ema dehan ami nee beik tanba ami tuir Kristu, maibee imi senti aan dehan imi matenek tanba imi Kristu nian. Ema konsidera ami fraku, maibee imi senti imi nia aan iha kbiit. Ema hatuun ami, maibee sira respeita imi.

¹¹ Too agora ami hamlaha-hamrook, i ami nia ropa aat loos ona. Dala barak ema baku ami. Ami nia uma rasik la iha.

¹² Ami serbisu makaas ho ami nia liman rasik hodi sustenta ami nia aan. Bainhira ema foo malisan mai ami, ami husu Maromak foo bensaun ba sira. Bainhira ema halo terus ami, ami aguenta deit.

¹³ Bainhira ema hatete aat ami, ami hataan ho diak. Too agora ema iha mundu nee konsidera ami hanesan buat foer ida, hanesan buat dodok ida nebee ema soe deit, la iha folin.

¹⁴ Hau hakerek buat sira nee laos atu halo moe imi. Maibee hau hakarak foo hanoin ba imi hotu nudar hau nia oan doben.

¹⁵ Iha ema rihun ba rihun mak hatudu dalan ba imi kona ba Kristu Jesus, maibee hau mesak deit mak sai imi nia aman. Tanba hau mak ema primeiru nebee foo sai ba imi Novidade Diak kona ba Kristu Jesus.

¹⁶ Nunee hau husu ba imi atu moris tuir hau nia ezemplu.

¹⁷ Tanba nee hau haruka Timóteo baa ajuda imi. Hau hadomi nia hanesan hau nia oan rasik, nia mos ema ida nebee foo laran ba ita nia Nai. Timóteo sei foo hanoin ba imi kona ba hau nia lalaok moris nudar ema nebee tuir Kristu Jesus. Iha hau nia moris nee, hau sempre halo tuir buat nebee mak hau hanorin ba sarani sira iha fatin ba fatin.

¹⁸ Iha imi balu foti aan dehan hau la baa vizita imi.

¹⁹ Maibee se ita nia Nai hakarak, la kleur tan hau baa iha nebaa. Depois hau sei haree, ema sira nebee foti aan nee koalia ibun boot deit ka sira iha duni kbiit.

²⁰ Tanba Maromak nia ukun laos hosi ema nia liafuan deit, maibee hosi kbiit nebee Maromak foo.

²¹ Agora imi mak hili. Imi hakarak hau baa ho rota hodi koriji imi ka, imi hakarak hau baa hatudu domin ho laran maus?