1 Korintu 3 - Biblia Tetun Dili

Sarani sira iha Korintu haksesuk malu

¹ Maun-alin sira, uluk hau hamutuk ho imi, hau la koalia ba imi hanesan ema nebee iha maturidade espiritual, maibee hau koalia ba imi hanesan ema nebee moris tuir mundu nia hakarak, nebee sei matak iha Kristu.

² Iha tempu nebaa, hau tenki hanorin imi buat kamaan deit. Imi seidauk bele simu buat todan, tanba imi hanesan bebee nebee sei hemu hela susubeen, seidauk bele haan hahaan toos. Too agora mos imi seidauk bele simu.

³ Imi sei hanoin hanesan fali ema mundu nian. Imi laran moras ba malu, i haksesuk to fahe malu. Nee hatudu katak imi tuir nafatin mundu nia hakarak. Nunee imi nia hahalok hanesan fali ema mundu nian.

⁴ Imi balu dehan, “Hau tuir Paulo.” Balu dehan, “Hau tuir Apolo.” Hahalok nee hatudu katak imi nafatin hanesan ema mundu nian.

⁵ Apolo nee see? I hau, Paulo nee see? Ami nee hanesan atan deit. Ami hatudu dalan ba imi atu imi bele fiar ba Kristu. Ami ida-idak halao knaar nebee ita nia Nai foo tiha ona ba ami.

⁶ Hau mak kuda Novidade Diak iha imi, Apolo mak rega, maibee Maromak mak halo buras.

⁷ Entaun ema nebee kuda fini ho mos ida nebee rega, rua-rua la importante hotu. Importante mak Maromak, tanba Nia mak halo fini nee moris too sai buras.

⁸ Ema nebee kuda no ema nebee rega, iha objetivu hanesan, i Maromak sei selu ida-idak nia kolen.

^9a Ami nain rua hamutuk halao Maromak nia serbisu. I imi nee hanesan Maromak nia toos no Maromak nia uma.

Paulo hahuu Maromak nia serbisu iha Korintu, ema seluk kontinua

^9b Imi mos hanesan uma ida nebee Maromak harii dadauk.

¹⁰ Maromak hatudu ona Nia grasa mai hau hodi halo hau sai ema primeiru nebee hanorin imi kona ba Kristu. Hau hanesan badaen mestre ida nebee hada fatuk para sai uma nia aliserse. Agora ema seluk hanorin tan imi. Sira nee hanesan badaen nebee harii uma iha aliserse nee nia leten. Maibee badaen ida-idak tenki haree didiak, oinsaa mak nia halo uma nee.

¹¹ Tanba Maromak tau tiha ona uma nee nia aliserse, nee mak Jesus Kristu. Ita la bele tau tan aliserse seluk.

¹² Badaen sira harii uma iha aliserse nee nia leten, uza buat folin oi-oin, hanesan osan mean, osan mutin, fatuk murak, ai, duut manlain ho duut sel-seluk.

¹³ Maibee iha loron ikus bainhira Maromak tesi ema hotu-hotu nia lia, Nia sei tau ahi hodi koko badaen sira nia serbisu. Ahi nee sei hatudu momoos, badaen ida-idak nia serbisu diak ka lae.

¹⁴ Se uma nee forte nafatin, entaun Maromak sei selu badaen nee nia kolen.

¹⁵ Se uma nee naksobu tiha, entaun badaen nee lakon leet deit. Nia rasik hetan salvasaun, maibee iha ikus nia besik motuk sal-sala.

Sarani sira mak Maromak nia uma kreda

¹⁶ Imi la hatene katak, imi Maromak nia uma kreda, i Maromak nia Espiritu hela iha imi?

¹⁷ Se ema ruma sobu rahun Maromak nia uma, Maromak mos sei harahun nia. Tanba Maromak nia uma nee santu, i Nia uma mak imi sira nee.

¹⁸ Keta bosok imi nia aan. Se iha ema ruma iha imi nia klaran hanoin dehan nia matenek tuir mundu nian, entaun diak liu nia sai beik tiha, atu nia bele sai matenek iha Maromak nia oin.

¹⁹ Tanba Maromak konsidera matenek mundu nian hanesan buat beik ida. Nee hanesan hakerek tiha ona iha Livru Sagradu dehan, “Maromak sei hamonu matenek nain sira ho sira nia matenek rasik.”

²⁰ Iha Livru Sagradu hakerek mos dehan, “Nai Maromak hatene katak, ema matenek sira nia hanoin la iha folin.”

²¹ Nee duni, la bele foti aan tan dehan imi tuir ema ida nee ka ema ida nebaa, tanba buat sira nee hotu imi nian ona.

²² Atu hau Paulo, ka Apolo, ka Pedro, atu mundu nee, ka atu moris, ka mate, atu buat nebee agora iha ka buat nebee sei mai, buat sira nee imi nian hotu.

²³ Imi nee Kristu nian. I Kristu nee Maromak ninian.