1 Korintu 2 - Biblia Tetun Dili

Paulo uza liafuan simples hodi foo sai kona ba Jesus Kristu

¹ Maun-alin sira, uluk hau baa iha imi hodi foo sai Maromak nia planu nebee uluk taka hela. Maibee hau laos uza liafuan aas hodi hatudu aan hanesan ema matenek ida.

² Tanba hau desidi ona katak, durante hau hamutuk ho imi, hau sei husik buat hotu-hotu, hodi hatene deit kona ba Jesus Kristu, nebee mate iha krus.

³ Iha tempu nebaa, bainhira hau hamutuk ho imi, hau senti hau la iha kbiit, hau tauk loos too nakdedar.

⁴ Hau nia liafuan ho hau nia hanorin simples deit. Hau la uza liafuan ema matenek nian atu dada ema, maibee kbiit Espiritu Santu nian mak hatudu ba imi katak liafuan nee loos.

⁵ Nunee Maromak nia kbiit mak halo imi fiar, laos tanba ema nia matenek rasik.

Paulo hanorin tuir matenek loloos nian

⁶ Maski nunee, bainhira ami koalia ho ema nebee abut metin ona iha Kristu, ami uza duni liafuan matenek nian. Maibee laos matenek mundu nian, i laos matenek tuir ukun nain sira iha mundu agora nian, tanba sira sei la iha tiha hotu.

⁷ Matenek nebee mak ami foo sai nee, matenek Maromak nian. Molok mundu iha, Maromak iha ona planu hodi foti aas ita liu hosi Jesus, maibee durante nee Nia planu nee segredu hela.

⁸ Nai Jesus nee makaas teb-tebes. Maibee ukun nain sira iha mundu nee, la iha ida mak komprende Maromak nia planu kona ba Nia. Se sira konhese Nia, sira la brani oho ita nia Nai iha krus.

⁹ Iha Livru Sagradu hakerek kona ba Maromak nia planu nebee uluk segredu hela nee dehan, “Buat nebee ema nia matan la haree, ema nia tilun seidauk rona, ema nia neon seidauk hanoin hetan Maromak prepara tiha ona ba ema nebee hadomi Nia.”

¹⁰ Agora Maromak foo sai tiha ona buat nee mai ita liu hosi Nia Espiritu. Nia Espiritu nee buka hatene buat hotu-hotu too nia huun. Iha Maromak nia hanoin nebee klean mos, Nia Espiritu buka tuir hotu.

¹¹ Ema ida la bele hatene loloos ema seluk nia hanoin, so ema nee rasik mak bele hatene. Maromak mos nunee. So Maromak nia Espiritu mak bele hatene Maromak nia hanoin.

¹² Ita simu ona Maromak nia Espiritu, laos espiritu mundu nian. Nunee ita bele komprende bensaun boot nebee Maromak foo ona mai ita.

¹³ Buat sira nee mak ami hatete sai ba ema. Ami laos uza liafuan nebee ema matenek hanorin mai ami, maibee ami uza liafuan nebee mak Maromak nia Espiritu foo. Nunee ami uza Espiritu nia liafuan hodi esplika buat nebee mak Espiritu nee foo sai mai ami.

¹⁴ Maibee se Maromak nia Espiritu la hela iha ema ida nia laran, ema nee sei la simu saida mak Maromak nia Espiritu koalia. Nia la bele komprende, nia hanoin liafuan nee buat beik ida, tanba so ho Espiritu nia tulun mak ema bele komprende.

¹⁵ Maibee se Maromak nia Espiritu hela iha ema ida, ema nee bele tetu buat hotu-hotu hodi hatene saida mak loos, saida mak sala. Maibee ema seluk la bele tetu fali nia.

¹⁶ Iha Livru Sagradu hakerek dehan, “See mak bele komprende Nai Maromak nia hanoin? See mak bele foo hanoin fali Nia?” Maibee ita nebee Maromak nia Espiritu domina ona nee, nia hanoin hanesan Kristu.