1 Korintu 16 - Biblia Tetun Dili

Foo ajuda ba sarani sira iha Jerusalém

¹ Agora hau hakarak hakerek kona ba osan nebee imi tau hamutuk atu ajuda Maromak nia povu iha Jerusalém. Hau foo hatene uluk ona ba sarani sira iha provinsia Galasia, oinsaa atu tau osan hamutuk. Diak liu imi mos halo tuir dalan nee.

² Domingu-Domingu, imi ida-idak rai osan balu hosi osan hira nebee imi simu iha semana ida nia laran. Rai kedas osan nee, la bele hein too hau baa mak foin imi komesa tau osan hamutuk.

³ Depois, bainhira hau too iha imi, hau sei hakerek surat hodi foo konhese ema sira nebee imi foo fiar, para sira bele lori osan ho surat nee ba iha Jerusalém.

⁴ Se ita senti dehan diak liu hau mos baa, entaun sira baa hamutuk ho hau.

Paulo nia planu

⁵ Hau sei baa uluk provinsia Masedónia. Hau vizita fatin balu iha nebaa mak foin hau baa haree imi.

⁶ Dala ruma hau hela ho imi kleur ituan, karik durante tempu malirin tomak. Depois imi bele ajuda hau baa iha fatin seluk tan.

⁷ Hau la baa vizita imi agora tanba hau lakohi vizita lalais deit. Maibee se Maromak hakarak, hau hakarak atu hela kleur ituan ho imi.

⁸ Agora dadauk hau iha sidade Efezu, hau sei hela iha nee too loron Pentakosta.

⁹ Tanba odamatan nakloke mai hau atu halao Maromak nia serbisu iha nee ho diak, maski ema barak kontra hau.

¹⁰ Bainhira Timóteo baa iha imi, simu nia ho diak atu nia la bele senti tauk iha imi nia klaran, tanba nia serbisu ba ita nia Nai Jesus, hanesan mos hau.

¹¹ Nee duni keta husik ema ida la konsidera nia. Ajuda nia atu fila mai hau ho diak, tanba hau ho maluk sarani sira seluk hein hela nia iha nee.

¹² Iha tan buat ida. Hau husu fila-fila ona ba ita nia irmaun Apolo atu nia baa vizita imi hamutuk ho maluk sarani sira seluk. Maibee nia lakohi baa agora. Bainhira nia iha oportunidade mak nia baa.

Lia menon ikus

¹³ Imi tenki matan moris neon nain, kaer metin imi nia fiar, brani baa, i forsa nafatin.

¹⁴ Halao o nia serbisu hotu ho domin.

¹⁵ Maun-alin sira, imi hatene katak Estéfanas ho nia uma laran sai ema primeiru nebee fiar ba Kristu iha provinsia Akaia, i sira foo aan tomak atu serbii sarani sira seluk. Nunee hau husu ho laran

¹⁶ atu imi rona ema hanesan nee, rona mos ema seluk nebee foo aan hanesan sira hodi serbii sarani sira.

¹⁷ Bainhira Estéfanas, Fortunato ho Akaiku too iha nee, hau nia laran haksolok. Tanba oferta nebee imi la bele foo ba hau, sira mak foo hodi imi nia naran.

¹⁸ Sira hametin hau nia laran, hanesan mos sira hametin imi nia laran. Imi tenki respeita ema sira hanesan nee.

Paulo taka nia surat

¹⁹ Sarani sira iha provinsia Ázia hatoo kumprimentus ba imi. Akila ho Priscila foo hakuak boot ba imi hodi Nai Jesus nia naran. Sarani sira nebee baibain halibur hamutuk iha sira nia uma mos foo hakuak boot.

²⁰ Maluk sarani sira hotu iha nee foo kumprimentus ba imi. Rei malu hanesan maun-alin iha Kristu.

²¹ Hau, Paulo mak hakerek liafuan nee ho hau nia liman rasik: kumprimentus hosi hau, Paulo.

²² See mak la hadomi Nai Jesus, nia sei hetan malisan. Maranata! Jesus, mai ona baa!

²³ Ami harohan para Nai Jesus hatudu Nia grasa ba imi.

²⁴ Hau hadomi imi hotu nebee laran ida ho Kristu Jesus. Amen.