1 Korintu 15 - Biblia Tetun Dili

Nai Jesus Kristu moris fali hosi mate

¹ Maun-alin sira, agora hau hakarak foo hanoin fila fali ba imi kona ba Novidade Diak. Uluk hau foo sai tiha ona ba imi, imi mos simu ho diak, i imi hamriik metin nafatin too agora.

² Liu hosi Novidade Diak nee, imi hetan salvasaun, naran katak imi fiar metin. Se lae, imi nia fiar saugati deit.

³ Hanorin nebee hau simu, hau foo tutan ona ba imi. Hanorin nee nia huun mak nee: Kristu mate tanba ita nia sala, tuir hakerek nanis ona iha Livru Sagradu.

⁴ Ema hakoi Nia, depois iha loron tolu Maromak halo Nia moris fali, tuir hakerek ona iha Livru Sagradu.

⁵ Bainhira Nia moris fali, Kristu hatudu Aan ba Pedro, depois ba Nia eskolanti sanulu resin rua.

⁶ Tuir mai iha loron ida Nia hatudu Aan ba sarani atus lima resin. Hosi sira nee, iha barak mak sei moris, ituan deit mak mate tiha ona.

⁷ Depois Nia hatudu Aan fali ba Tiago, foin ba apostolu sira hotu.

⁸ Ikus liu Nia hatudu Aan mos ba hau. Hau hanesan oan ikun nebee moris iha ikus liu.

⁹ Hau mak kiik liu hosi apostolu sira hotu. Tuir loloos, hau la serve atu ema bolu hau apostolu, tanba uluk hau halo terus Maromak nia povu.

¹⁰ Maibee Maromak hatudu Nia grasa mai hau, nee mak hau nia moris sai hanesan agora. I Nia grasa mai hau la saugati, tanba durante nee hau serbisu makaas liu fali hau nia maluk apostolu sira seluk. Maibee laos hau mak serbisu, Maromak nia grasa iha hau mak halo serbisu nee.

¹¹ Entaun, atu hau mak foo sai Novidade Diak ba imi ka, apostolu sira seluk mak foo sai, ami hotu hanorin buat nebee hanesan, i hanorin nee mak imi fiar.

Ema mate sei moris fila fali

¹² Ami sempre foo sai dehan, Maromak halo Kristu moris fali hosi mate. Entaun nusaa mak imi balu dehan, ema mate sei la moris fali?

¹³ Se karik ema mate la moris fali, nee dehan katak Kristu mos la moris fali.

¹⁴ I se Kristu la moris fali, saida mak ami foo sai ba ema, la iha folin, i imi nia fiar ba Nia mos saugati deit.

¹⁵ Laos nee deit. Se ema mate la moris fali, entaun ami nee mos foo sasin falsu kona ba Maromak. Tanba ami foo sasin katak, Maromak halo Kristu moris fila fali. Maibee se ema mate la moris fali, nee dehan katak Maromak nunka halo moris fali Kristu.

¹⁶ Tanba se ema mate la moris fali, entaun Kristu mos la moris fila fali.

¹⁷ Se Kristu la moris fila fali, imi nia fiar la vale buat ida, i imi sei moris iha sala nia laran.

¹⁸ Laos ida nee deit, se Kristu la moris fila fali hosi mate, ema sira nebee uluk hamutuk ho Kristu, bainhira sira mate, sira mos haketak aan hosi Maromak.

¹⁹ Se ita laran metin ba Kristu atu tulun ita durante ita moris deit iha mundu nee, entaun, hosi ema hotu-hotu ita mak susar liu.

Saida mak sei akontese bainhira Kristu moris fila fali

²⁰ Maibee laos nunee! Kristu mak ema primeiru nebee Maromak halo moris fali hosi mate. Hosi ida nee mak ita bele hatene momoos katak, ema seluk nebee mate mos sei moris fila fali.

²¹ Mate tama iha mundu liu hosi ema ida. Ema nee mak Adão. Nunee mos ita hotu sei moris fila fali hosi mate liu hosi Ema ida seluk. Ema nee mak Kristu.

²² Nudar Adão nia jerasaun, ita hotu mate. Maibee see-see deit mak laran ida ho Kristu sei moris fila fali.

²³ Maibee ida-idak tuir nia tempu. Kristu mak Ema primeiru nebee Maromak halo moris fali hosi mate. Bainhira Kristu fila fali mai hosi lalehan foin Nia ema sira mos moris fila fali hosi mate.

²⁴ Depois mak mundu nee remata. Iha tempu nee, Kristu sei halakon nai ulun sira, autoridade sira ho espiritu boboot sira hotu nebee kontra Maromak. Hotu tiha Nia sei entrega fila fali Nia direitu tomak nudar liurai ba Nia Aman Maromak.

²⁵ Tanba Kristu tenki ukun nafatin too Nia hamonu Nia inimigu sira iha Nia ain okos.

²⁶ Inimigu ikus liu nebee Nia halakon mak mate.

²⁷ Iha Livru Sagradu hakerek dehan, “Maromak halo ona buat hotu-hotu hakruuk iha Kristu nia ain okos.” Bainhira dehan Maromak halo buat hotu-hotu hakruuk ona ba Kristu, la signifika Maromak mos hakruuk ba Kristu. Nee klaru! Tanba Maromak mak halo buat hotu-hotu hakruuk ba Kristu.

²⁸ Hotu tiha, bainhira buat hotu-hotu hakruuk ona ba Kristu, maka Kristu, nudar Maromak Nia Oan, mos sei hakruuk ba Nia Aman Maromak, Ida nebee mak halo buat hotu-hotu hakruuk ba Nia Oan. Too ikus Maromak ukun buat hotu-hotu iha fatin-fatin.

Se ema mate la moris fali, oinsaa?

²⁹ Iha ema balu hakarak simu batizmu hodi reprezenta ema mate nebee seidauk batizmu. Maibee se ema mate la moris fali, nusaa mak sira hakarak reprezenta fali ema mate nee? Se nunee, la iha folin.

³⁰ Se ema mate la moris fali, nusaa mak ami prontu foo aan ba mate iha tempu saida deit?

³¹ Maun-alin sira, loro-loron hau hasoru perigu ba mate. Iha buat seluk tan: Hau orgulhu tanba imi fiar ba ita nia Nai Kristu Jesus.

³² Se hau nia moris mak iha mundu nee deit, entaun, bainhira hau luta hasoru ema siak-teen sira nebee hanesan animal siak iha sidade Efezu, hau manaan saida? Se ema mate la moris fila fali, diak liu ita halo tuir ema nebee baibain dehan, “Mai ita haan-hemu rame-rame, tanba aban ita mate ona.”

³³ Keta husik ema bosok imi. “Se o ranxu ho ema aat, o sei estraga o nia kostumi diak.”

³⁴ Imi tenki hanoin fila fali ba buat nebee loos, i la bele halo sala tan! Tuir loloos imi tenki moe, tanba imi balu matan tomak hela kona ba Maromak.

Ita sei moris fila fali ho isin lolon foun

³⁵ Karik ema ruma husu, “Oinsaa mak ema mate moris fila fali? Sira moris fali ho isin lolon modelu oinsaa?”

³⁶ Imi beik duni! Bainhira imi kuda fini, fini nee tenki sai dodok iha rai mak foin bele moris sae.

³⁷ Fini nebee imi kuda nee, laos isin, so musan deit, karik trigu musan ka musan seluk ruma. Maibee bainhira moris sae, nia modelu oin seluk fali,

³⁸ Fini nee moris tuir isin nebee Maromak foo, fini ida-idak moris mai iha nia isin rasik, tuir Maromak nia hakarak.

³⁹ Nunee mos buat nebee iha iis, nia modelu mos oi-oin. Ema nia isin lolon oin ida, animal nia isin lolon oin seluk, manu fuik ho ikan mos isin lolon la hanesan.

⁴⁰ Laos nee deit. Isin lolon lalehan nian ho isin lolon rai nian, iha nia furak hotu, maibee la hanesan.

⁴¹ Loro matan nia naronan oin ida, fulan nia naroman oin seluk, fitun oin seluk fali. Too fitun ida-idak mos naroman la hanesan.

⁴² Nunee mos bainhira ema mate moris fila fali. Mate isin nebee ema hakoi, sei dodok, maibee ita moris fila fali ho isin lolon nebee la dodok tan ona.

⁴³ Isin lolon nebee ema hakoi, ita haree ba aat loos, maibee ita moris fila fali ho isin lolon nebee furak. Isin lolon nebee ema hakoi, la iha kbiit, maibee ita moris fila fali ho isin lolon nebee forti.

⁴⁴ Isin lolon nebee ema hakoi nee, mundu nian, maibee bainhira ita moris fali, Maromak nia Espiritu sei foo fali isin lolon lalehan nian. Hanesan isin lolon mundu nian iha, entaun isin lolon lalehan nian mos iha.

⁴⁵ Iha Livru Sagradu hakerek dehan, “Ema primeiru nebee Maromak foo iis mak Adão. Ikus mai iha tan Adão seluk, nee mak Kristu. Adão ida ikus nee Ema lalehan nian, i Nia mak huun ba moris rohan-laek.”

⁴⁶ Maski nunee, maibee isin lolon mundu nian mak iha uluk, foin isin lolon lalehan nian iha.

⁴⁷ Adão ida primeiru hosi rai rahun, Adão ida segundu hosi lalehan.

⁴⁸ Ema iha mundu nee, sira nia isin lolon hanesan Adão ida primeiru nebee mai hosi rai. Ema nebee lalehan nian, sira nia isin lolon hanesan Adão ida segundu nebee mai hosi lalehan.

⁴⁹ Agora dadauk ita nia imajen hanesan ema ida nebee hosi rai. Nunee mos aban-bainrua ita nia imajen sei sai hanesan Ema ida nebee mai hosi lalehan.

⁵⁰ Maun-alin sira, nunee, hau hakarak hatete ba imi, isin ho raan la bele tama iha reinu lalehan. Ita nia isin nebee sei dodok, la bele tama ba iha fatin moris rohan-laek nian.

⁵¹ Rona didiak! Hau hakarak loke segredu ida nee ba imi. Hosi ita sira nee, balu deit mak sei mate. Maibee too loron ikus Maromak sei troka ita hotu nia isin lolon sai foun.

⁵² Nee sei akontese derepenti deit, lalais liu fali ema taka matan no loke matan, bainhira korneta ikus lian. Iha tempu nee, ema mate sei moris fila fali ho isin lolon nebee la dodok tan. I ita nebee mak sei moris, Maromak sei troka ita hotu nia isin lolon sai foun.

⁵³ Tanba ita nia isin lolon nebee sei dodok nee, tenki troka ho isin lolon ida nebee nunka dodok. Ita nia isin lolon nebee sei mate nee, tenki troka ho isin lolon ida nebee nunka mate.

⁵⁴ Buat nee sei akontese tuir saida mak hakerek ona iha Livru Sagradu dehan, “Maromak halakon tiha mate nia kbiit, i manaan tiha ona.”

⁵⁵ “Hei, mate! O lakon tiha ona! Hei, mate! O la iha veneno tan hodi oho ami!”

⁵⁶ Veneno nebee lori ema ba mate mak sala. I buat nebee hatudu sai ema nia sala mak Maromak nia lei.

⁵⁷ Maibee ita foo agradese ba Maromak! Tanba liu hosi ita nia Nai Jesus Kristu, Nia halo ita manaan.

⁵⁸ Nunee, maun-alin doben sira, hamriik metin nafatin. La bele nakdoko. Halao nafatin Nai Jesus nia serbisu ho laran tomak. Tanba imi hatene katak, imi nia serbisu makaas ba ita nia Nai la saugati.