1 Korintu 13 - Biblia Tetun Dili

Domin mak boot liu

¹ Se karik hau bele koalia lian oi-oin, atu ema nia lian ka anju nia lian, maibee hau la iha domin, hau nia liafuan mamuk deit, hanesan tambor nebee tarutu ka sinu nebee lian.

² Se karik hau iha kbiit hodi foo tutan Maromak nia lia menon, hau komprende Nia segredu hotu, hau hatene buat hotu-hotu, i hau fiar makaas too hau bele muda foho, maibee hau la iha domin, hau la iha folin ida.

³ Se karik hau fahe hau nia rikusoin tomak ba ema kiak, ka entrega hau nia aan ba ema sunu motuk, maibee hau la iha domin, hau la iha folin ida.

⁴ Domin nee pasiensia, domin nee laran diak, domin la laran moras ba ema, domin la gaba aan, domin la foti aan.

⁵ Domin la trata aat ema, domin la buka manaan mesak, domin la hirus lalais, domin la hatene rai odi.

⁶ Domin la haksolok ho buat nebee la loos, maibee haksolok ho lia loos.

⁷ Domin prontu terus nafatin, fiar nafatin, hein ho laran metin nafatin, i aguenta nafatin.

⁸ Domin la iha rohan. Profeta sira nebee hatutan Maromak nia lia menon sei remata. Ema sira nebee simu kbiit hodi koalia lian oi-oin sei remata, i buat nebee matenek nain sira hatene, sei la iha folin tan.

⁹ Tanba agora ita hatene parte balu deit, i profeta nebee foo tutan Maromak nia lia menon mos foo parte balu deit.

¹⁰ Maibee too loron ida, Maromak sei halo buat hotu-hotu kompletu. Iha loron nee, buat nebee la kompletu, sei lakon.

¹¹ Uluk hau sei kiik, hau koalia hanesan labarik, komprende hanesan labarik, hanoin hanesan labarik. Maibee bainhira hau boot ona, hau husik tiha hahalok labarik nian.

¹² Saida mak ita haree dadauk nee la moos, hanesan ema nebee haree nia lalatak iha lalenok. Maibee too loron ida ita sei haree momoos, oin ho oin. Agora hau hatene buat balu deit, maibee aban-bainrua hau sei hatene momoos, hanesan mos Maromak agora hatene momoos hau.

¹³ Entaun, buat tolu mak sei iha nafatin: fiar, esperansa no domin. Hosi buat tolu nee, ida nebee boot liu mak domin.