1 Korintu 12 - Biblia Tetun Dili

Espiritu Santu foo kbiit oi-oin mai ita hodi serbii

¹ Maun-alin sira, hau hakarak atu imi komprende kbiit nebee Espiritu Santu foo ba ita ida-idak hodi halao Maromak nia serbisu.

² Imi hatene katak, uluk imi seidauk fiar ba Maromak, imi tuir buat nebee lori imi ba adora fali lulik, maski lulik sira nee monok.

³ Tanba nee hau foo hanoin ba imi nunee: ema nebee Maromak nia Espiritu domina mak foin bele dehan, “Jesus hau nia Nai.” Ema nee nunka bele foo malisan ba Jesus, tanba Espiritu Santu domina hela nia.

⁴ Ita simu kbiit oi-oin, maibee Espiritu ida deit.

⁵ Ita simu serbisu oi-oin, maibee ita serbii Nai ida deit.

⁶ Ita simu knaar oi-oin, maibee Maromak ida deit mak tulun ita atu halo knaar nee.

⁷ Maromak hatudu sai Nia Espiritu liu hosi ita ida-idak nia moris atu ita bele tulun ema seluk.

⁸ Ema balu, Maromak nia Espiritu foo kbiit hodi foo sai liafuan matenek hosi Maromak . Iha ema seluk, Espiritu nee foo kbiit hodi hatene foo sai kona ba Maromak.

⁹ Iha ema balu, Espiritu foo kbiit atu fiar metin ba Jesus Kristu. Iha tan balu Espiritu nee foo kbiit atu kura ema moras.

¹⁰ Ema balu simu kbiit hodi halo milagre oi-oin. Ema balu simu kbiit hodi foo tutan Maromak nia lia menon. Ema balu simu kbiit hodi bele hatene tuir Espiritu nebee Maromak nian no espiritu nebee laos. Iha tan ema balu simu kbiit hodi koalia lian oi-oin nebee sira nunka aprende, i ema seluk tan simu kbiit hodi sai durbasa ba liafuan sira nee.

¹¹ Buat sira nee hotu, Espiritu ida deit mak halo. Nia foo kbiit ba ema ida-idak tuir Nia hakarak rasik.

Sarani sira hanesan isin lolon ida ho parte oi-oin

¹² Hau foo ezemplu ida hosi ema nia isin lolon. Isin lolon ida iha parte oi-oin. Maski iha barak, maibee parte sira nee hamutuk isin lolon ida deit. Nunee mos Kristu nia povu.

¹³ Ita hotu Maromak kesi metin ho Espiritu ida. Nee mak bainhira ita sarani, ita sai povu ida deit. Atu ita ema Judeu ka gregu, ema atan ka ema livre, Maromak foo Espiritu ida deit mai ita hotu. Nee hanesan ita hotu hemu bee nebee lori moris hosi bee matan nebee hanesan.

¹⁴ Loos duni, ita nia isin lolon laos parte ida deit, maibee iha parte barak.

¹⁵ Se karik ita nia ain dehan, “Hau nee laos liman. Nunee hau la halo parte o nia isin lolon.” Maski nia koalia nunee, maibee nia atu hamriik mesak la bele.

¹⁶ Se karik ita nia tilun dehan, “Hau nee laos matan. Nunee hau la halo parte o nia isin.” Maski nia koalia nunee, maibee nia atu hamriik mesak la bele.

¹⁷ Hanoin took baa! Se karik ita nia isin lolon tomak matan deit, oinsaa mak bele rona? Se ita nia isin lolon tomak tilun deit, oinsaa mak bele horon buat ruma?

¹⁸ Maibee Maromak halo parte ida-idak tau iha nia fatin, tuir Maromak nia hakarak rasik.

¹⁹ Se iha parte ida deit, entaun laos isin lolon ona!

²⁰ Iha parte barak, maibee isin lolon ida deit.

²¹ Ita nia matan la bele hatete ba ita nia liman, “Hau la presiza o.” I ita nia ulun la bele hatete fali ba ita nia ain, “Hau la presiza o.”

²² Iha ita nia isin lolon, iha parte balu mak ita konsidera fraku, afinal parte sira nee mak importante liu.

²³ Iha parte balu mak ita moe hodi hatudu, maibee parte hirak nee mak ita kuidadu liu. Iha parte balu mak ita haree ba laduun furak, parte hirak nee mak ita proteje liu.

²⁴ Maibee parte nebee ita haree la hatudu moe, laduun presiza atu ita tau matan. Entaun Maromak tau parte ida-idak tuir nia fatin, i Nia foo folin liu ba parte nebee ema konsidera laduun iha folin.

²⁵ Nia halo nunee atu parte hotu-hotu iha ita nia isin lolon bele haree malu diak, i tau matan ba malu.

²⁶ Se parte ida hetan terus, hotu-hotu hetan terus hamutuk. Se parte ida simu respeitu, hotu-hotu kontenti.

²⁷ Nunee mos imi. Imi hotu hanesan Kristu nia isin lolon, imi ida-idak halo parte iha Nia isin nee.

²⁸ Hosi ita sarani sira, Maromak foti ema atu halo serbisu oi-oin. Primeiru apostolu, segundu profeta, terseiru mestri. Iha ema balu simu kbiit hodi halo milagre oi-oin, balu tan simu kbiit hodi kura ema nia moras, balu hodi ajuda ema, balu iha kbiit hodi lidera ema seluk, i balu bele koalia lian oi-oin nebee sira nunka aprende.

²⁹ Ema hotu sai apostolu ka? Ema hotu sai profeta ka? Ema hotu sai mestri ka? Ema hotu halo milagre ka?

³⁰ Ema hotu simu kbiit hodi kura ema moras ka? Ema hotu hatene koalia lian oi-oin nebee ita nunka aprende ka? Ema hotu bele sai durbasa ba liafuan sira nee ka? Lae!

³¹ Entaun, imi tenki husu ho laran tomak ba Maromak atu imi simu kbiit nebee folin boot liu. Agora hau hakarak hatudu ba imi dalan nebee diak liu tan.