1 Korintu 11 - Biblia Tetun Dili

¹ Imi halo tuir hau nia ezemplu, hanesan hau mos halo tuir Kristu.

Regra ba ema nebee halo orasaun iha publiku

² Hau gaba imi tanba imi sempre hanoin hau i sempre halo tuir hanorin nebee hau foo tutan ona ba imi.

³ Agora hau hakarak atu imi komprende buat nebee tuir mai nee: Mane sira nia ulun mak Kristu, feen sira nia ulun mak sira nia laen, i Kristu nia ulun mak Nai Maromak.

⁴ Se mane ida halo orasaun ka foo tutan Maromak nia lia menon, nia la bele taka ulun. Se lae nia la hatudu respeitu ba Kristu nudar nia ulun.

⁵ Maibee bainhira feto halo orasaun ka foo tutan Maromak nia lia menon, nia tenki taka nia ulun. Se lae, nia la hatudu respeitu ba nia laen nudar nia ulun. Nia hanesan fali feto nebee mak ema koi tiha ona nia ulun.

⁶ Se iha feto ida lakohi taka nia ulun para hatudu respeitu ba nia laen, diak liu nia koi tiha nia fuuk. Maibee se nia senti nia ulun nebee koi tiha ona nee halo moe nia, diak liu nia taka nia ulun.

⁷ Mane la presiza taka nia ulun, tanba Maromak halo mane hanesan Nia Aan, i mane hatudu sai Maromak nia kbiit naroman nabilan. Maibee feto hatudu sai mane nia kbiit.

⁸ Bainhira Maromak halo mundu nee, Nia la halo mane hosi feto, maibee Nia halo feto hosi mane.

⁹ I Nia la halo mane foo ba feto, maibee Nia halo feto hodi foo ba mane.

¹⁰ Tanba nee, no mos tanba anju sira haree, feto tenki taka nia ulun hanesan sinal katak nia iha nia laen nia autoridade nia okos.

¹¹ Maibee ba ita nebee laran ida ho Nai Jesus, feto la ketak hosi mane no mane mos la ketak hosi feto.

¹² Tanba uluk liu, Maromak halo feto hosi mane, maibee hosi tempu nebaa too agora, mane hotu-hotu mai hosi feto. I buat hotu-hotu mai hosi Maromak.

¹³ Imi rasik tenki tetu didiak: Se feto la taka nia ulun bainhira nia halo orasaun ba Maromak, nee diak ka lae?

¹⁴ Iha mundu nee ita baibain haree, se mane nia fuuk naruk hanesan feto, nee moe boot ida.

¹⁵ Maibee se feto nia fuuk naruk, nee furak loos, tanba Maromak foo fuuk naruk hodi taka nia ulun.

¹⁶ Se ema ruma hakarak haksesuk malu kona ba buat nee, ami ho mos Maromak nia povu sira iha fatin-fatin baibain halo hanesan nee.

Bainhira simu Seia Santa, la bele hadau malu

¹⁷ Agora hau hakarak hatete tan buat ida. Bainhira imi sarani sira halibur hamutuk, hau la gaba imi. Tanba imi la hatudu buat diak, maibee hatudu fali buat aat.

¹⁸ Primeiru, hau rona katak, bainhira imi halibur hamutuk, imi halo grupu keta-ketak. Hau hanoin informasaun nee balu loos,

¹⁹ tanba hanoin la hanesan sempre iha. Hosi nee mak ema bele haree, see mak halo tuir Maromak nia hakarak, i see mak la halo tuir.

²⁰ Maibee bainhira imi haan hamutuk atu selebra Nai Jesus nia mate, buat nebee imi halo nee imi la halo hodi hanoin ita nia Nai.

²¹ Tanba imi haan, la hein malu. Nunee balu la hetan hahaan too hamlaha, i balu haan bosu i hemu too lanu.

²² Imi halo saida mak nee? Imi la iha uma rasik atu haan-hemu ka? Keta halo be imi hakarak estraga sarani sira nia naran ka imi hakarak halo moe ema kiak. Hau atu dehan tan saida? Hau atu gaba imi nia hahalok nee ka? Lae liu!

Haan paun ho hemu tua hodi selebra Nai Jesus nia mate

²³ Hanorin tuir mai hau simu hosi Nai Jesus rasik, i hau mos foo tutan tiha ona ba imi. Iha kalan ikus, molok ema atu faan Nai Jesus ba Nia inimigu, Nia foti paun

²⁴ hodi agradese ba Maromak. Nia silu paun nee hodi hatete, “Nee Hau nia isin, Hau foo hodi salva imi. Halo hanesan nee nafatin hodi hanoin Hau.”

²⁵ Nunee mos bainhira sira haan hotu ona, Nia foti tan tua kalis ida hodi dehan, “Tua nee hatudu Maromak nia promesa foun nebee Nia halo liu hosi Hau nia raan. Bainhira imi hemu tua hanesan nee, imi tenki hanoin Hau.”

²⁶ Entaun bainhira imi haan paun ho hemu tua hanesan nee, imi foo sai ita nia Nai nia mate. Imi halo nunee nafatin too loron nebee Nia fila fali mai hosi lalehan.

Ema nebee la konsidera Nai Jesus nia mate, la bele simu Seia Santa

²⁷ Nee duni, ema nebee haan paun no hemu tua Jesus nian, maibee nia moris la loos, ema nee halo sala hasoru Nai Jesus nia isin ho raan.

²⁸ Tanba nee, ema ida-idak tenki analiza nia aan lai mak foin nia haan paun no hemu tua iha kalis nee.

²⁹ Tanba ema nebee haan no hemu, maibee la respeitu Nai Jesus nia isin, nia rasik husu kastigu ba nia aan.

³⁰ Nee mak ema barak iha imi nia klaran moras ho fraku, i balu mos mate tiha ona.

³¹ Maibee se ita rasik hatene ona ita nia aan, entaun ita la hetan kastigu.

³² Se ita nia Nai kastigu ita agora, nee para hanorin ita, atu nunee iha loron ikus ita la bele hetan kastigu hamutuk ho ema aat sira iha mundu nee.

³³ Tanba nee, maun-alin sira, bainhira imi halibur hamutuk atu haan hodi selebra Nai Jesus nia mate, imi tenki hein malu.

³⁴ Se imi balu hamlaha karik, haan lai buat ruma iha uma, atu nunee, bainhira imi halibur, la lori Maromak nia kastigu ba imi. Hau nia lia menon seluk, hau too iha nebaa mak hau hatoo.