1 Korintu 10 - Biblia Tetun Dili

La bele adora lulik

¹ Maun-alin sira, keta haluha ita nia bei-ala sira nia istoria. Uluk sira iha rai fuik maran, sira hotu lao iha kalohan ida nia okos, i sira hotu hakur tasi.

² Hodi sai ema nebee tuir Moisés, sira hotu simu ona batizmu liu hosi kalohan no tasi.

³ Sira hotu haan hahaan espiritual nebee hanesan.

⁴ Sira hotu hemu bee espiritual nebee hanesan. Bee nee sai hosi fatuk lolon boot ida nebee akompanha sira. Fatuk nee mak Kristu.

⁵ Maski nunee, Maromak la haksolok ho sira lubuk ida, nee mak sira barak mate namkarai iha rai fuik maran.

⁶ Buat nebee akontese ba ita nia bei-ala sira nee sai hanesan ezemplu ida hodi foo hanoin mai ita atu la bele kaan halo buat aat hanesan sira halo ona.

⁷ La bele adora lulik hanesan sira balu. Iha Livru Sagradu hakerek dehan, “Sira halo festa haan-hemu, depois komesa bidu, tebe hodi adora sira nia lulik.”

⁸ Ita la bele halo relasaun seksual nebee la loos hanesan sira balu. Tanba sira nia hahalok nee mak halo ema rihun rua-nulu resin tolu mate iha loron ida deit.

⁹ Ita la bele koko Kristu hanesan sira balu koko. Tanba sira nia hahalok nee mak samea tata mate tiha sira.

¹⁰ Ita mos la bele murmura hela deit hanesan sira balu halo. Tanba sira nia hahalok nee mak Maromak haruka Nia anju ida nebee lori kastigu mai oho sira.

¹¹ Buat nebee akontese ba sira nee hanesan ezemplu ida mai ita atu la bele halo tuir sira. I ema hakerek para foo hanoin mai ita nebee moris iha tempu ikus.

¹² Entaun se imi hanoin dehan imi hamriik metin, kuidadu atu imi la bele monu.

¹³ Tentasaun sira nebee imi hasoru, nee hanesan tentasaun baibain nebee ema seluk hasoru ona. Maromak mos sempre kumpri Nia liafuan. Nia sei la husik imi atu hasoru tentasaun nebee liu fali imi nia forsa. Maibee bainhira imi hasoru tentasaun, Nia sei foo dalan ba imi, atu imi bele hamriik metin nafatin.

¹⁴ Nee duni maluk doben sira, halai sees tiha hosi adora lulik sira nee.

¹⁵ Hau koalia ba imi ema nebee matenek. Entaun imi rasik mak tetu hau nia liafuan nee.

¹⁶ Bainhira ita halibur hamutuk hodi selebra Kristu nia mate, ita foo agradese ba tua iha kalis, depois hemu. Nee hatudu katak, ita hola parte iha Kristu nia raan. Nunee mos bainhira ita silu paun ba haan, ita hola parte iha Kristu nia isin.

¹⁷ Ita hotu haan hosi paun fuan ida. Nunee, maski ita barak, maibee ita hotu sai hanesan isin lolon ida deit, tanba paun nebee ita haan nee ida deit.

¹⁸ Hanoin took. Ema Israel baibain oho animal halo sakrifisiu ba Maromak iha meza sakrifisiu. Bainhira sira haan naan nee, sira hotu sai laran ida ho Maromak.

¹⁹ Hau koalia nunee, keta halo be imi hanoin sakrifisiu nebee ema foo ba estatua lulik iha folin ruma ka iha kbiit ruma.

²⁰ Lae! Maibee saida mak sira foo ba iha lulik nee, sira foo ba espiritu aat sira, laos foo ba Maromak. I hau lakohi atu imi hola parte ho espiritu aat sira nee.

²¹ Imi nebee hemu tiha ona tua hosi Nai Jesus nia kalis, la bele hemu tan tua hosi espiritu aat sira nian. Imi nebee haan tiha ona iha Nai Jesus nia meza, la bele haan tan iha espiritu aat sira nian.

²² Ita brani halo Nai Jesus nia laran moras ka? Sera ke ita iha kbiit liu Nia ka?

Kona ba hahaan nebee mak ema hamulak tiha ona ba lulik

²³ Ema balu dehan, “Ita iha direitu atu halo saida deit.” Maibee nee laos dehan katak, buat sira nee hotu lori diak ba ita. I laos buat sira nee hotu haburas ita nia fiar.

²⁴ La bele buka diak ba o nia aan rasik, maibee buka diak ba ema seluk.

²⁵ O bele haan naan saida deit nebee faan iha merkadu. Lalika husu naan nee hamulak tiha ona ba lulik ka lae.

²⁶ Tanba iha Livru Sagradu hakerek dehan, “Mundu ho buat hotu-hotu iha mundu nee, Nai Maromak ninian.”

²⁷ Se iha ema ruma nebee la fiar konvida imi baa haan iha nia uma, i imi hakarak baa, entaun baa deit. Haan saida deit mak sira foo ba imi, lalika husu, naan nee hamulak tiha ona ba lulik ka lae.

²⁸ Maibee karik ema ida mai foo hatene uluk dehan, “Naan nee ema hamulak tiha ona ba lulik.” Se nunee, diak liu lalika haan, tanba tuir ema nee nia hanoin, sarani sira la bele haan naan hanesan nee.

²⁹ Maski imi rasik hanoin haan naan nee la sala, maibee halo tuir deit ema nee nia hanoin baa. Se hau livre atu haan saida deit, nusaa mak hau tenki tuir fali ema seluk nia hanoin?

³⁰ Se hau halo orasaun hodi agradese ba Maromak molok atu haan, nusaa mak bainhira hau haan, ema foo sala fali hau?

³¹ Entaun, atu imi haan ka hemu ka halo saida deit, imi halo buat sira nee hotu hodi foti aas Maromak nia naran.

³² La bele halo ema seluk monu ba sala. Atu ema Judeu, ka ema gregu, ka Maromak nia povu, la bele sai fatuk sidi ba sira.

³³ Maibee halo hanesan hau. Hau koko atu halo haksolok ema hotu nia laran iha buat hotu. Hau laos buka diak ba hau nia aan, maibee buka diak ba ema barak, atu sira mos hetan salvasaun.