1 João 5 - Biblia Tetun Dili

Fiar ba Jesus halakon buat aat mundu nian

¹ Ema see deit mak fiar katak Jesus mak Kristu, ema nee Nai Maromak nia oan. Se ita hadomi ema ida nebee sai hanesan aman, ita mos hadomi ema nee nia oan.

² Nunee mos, se ita hadomi Nai Maromak i halo tuir Nia ukun fuan, nee hatudu katak ita mos hadomi Nai Maromak nia oan sira.

³ Tanba se ita halo tuir Nai Maromak nia ukun fuan, nee dehan katak, ita hadomi Nai Maromak. I Nia ukun fuan la todan ida,

⁴ tanba ema nebee sai Nai Maromak nia oan, nia la halo tuir tan buat aat mundu nian. Nia manaan ona mundu tanba nia fiar ba Jesus .

⁵ See mak bele manaan buat aat mundu nian? So ema nebee mak fiar katak Jesus Maromak nia Oan.

Foo sai kona ba Jesus Kristu

⁶ Naran katak imi hatene: Jesus nee laos ema baibain deit, Nia mos Kristu. Bainhira Nia atu hahuu Nia ministeriu, João sarani Nia ho bee. Tuir mai, Nia raan fakar too mate. Nunee, ida nebee importante laos João sarani Nia ho bee, maibee Nia raan fakar nee mak importante. Tanba Nai Maromak nia Espiritu rasik mak foo sasin nunee, i Espiritu Santu nee nunka bosok.

⁷ Iha buat tolu mak foo sasin iha mundu nee:

⁸ Maromak nia Espiritu, bee ho Jesus nia raan. Sira tolu nee foo sasin hanesan deit kona ba Jesus.

⁹ Baibain ita fiar sasin nebee ema foo. Maibee sasin nebee Nai Maromak foo nee forti liu fali ita ema nia sasin hotu. Tanba Nia mak Maromak, i Nia foo sasin kona ba Nia Oan rasik.

¹⁰ Tanba nee, ema nebee fiar Maromak nia Oan, nia hatene momoos katak saida mak Nai Maromak koalia kona ba Nia Oan nee loos. Maibee ema nebee la fiar Nai Maromak nia sasin nee, nia dehan Maromak bosok, tanba nia la fiar saida mak Nai Maromak koalia kona ba Nia Oan.

¹¹ Buat nebee Nai Maromak dehan mak nee: Nai Maromak loke ona dalan para ita moris tinan ba tinan hamutuk ho Nia, i moris rohan-laek nee ita hetan tanba ita fiar ba Nia Oan.

¹² Nunee, ema nebee iha Maromak nia Oan hetan moris rohan-laek. Maibee ema nebee la iha Maromak nia Oan sei la hetan moris rohan-laek.

Korajen hodi halo orasaun

¹³ Hau hakerek surat nee ba imi nebee fiar ba Maromak nia Oan, para imi bele hatene katak, imi sei moris hamutuk ho Nai Maromak tinan ba tinan nafatin.

¹⁴ Tanba nee mak ita iha korajen atu harohan ba Nai Maromak, tanba ita laran metin katak ita husu buat ruma tuir Nia hakarak, Nia sempre rona.

¹⁵ I nunee, ita mos hatene katak Nia sei foo buat nebee mak ita husu, tuir Nia hakarak.

¹⁶ Se karik imi haree imi nia maluk sarani ida halo sala, maibee laos sala ida nebee bele lori nia ba mate, entaun imi tenki harohan ba Maromak para salva nia, i Nai Maromak sei foo moris ba nia. Hau haruka imi harohan ba ema nebee nia sala la lori nia ba mate. Iha mos sala balu nebee lori ema ba mate tinan ba tinan. Se imi nia maluk sarani ruma halo sala hanesan nee, hau la haruka imi harohan ba nia.

¹⁷ Hahalok aat hotu-hotu sala, maibee laos sala hotu-hotu mak lori ema ba mate.

Adora mak Nai Maromak mesak deit

¹⁸ Ita hatene katak ema nebee sai ona Nai Maromak nia oan, nia la moris ona iha sala, tanba Maromak nia Oan tau matan ba nia. Nunee aat nain la bele halo aat ba nia.

¹⁹ Ita hatene katak, ita sai ona Maromak nia ema, maski ema iha mundu nee aat nain mak domina.

²⁰ Ita hatene katak Maromak nia Oan mai ona, i Nia loke ona ita nia neon para ita bele konhese Ida nebee mak loos. Ita laran ida ona ho Ida nebee mak loos, ita mos laran ida ho Nia Oan Jesus Kristu. Nia mak Maromak loloos, i Nia mak moris rohan-laek.

²¹ Nunee, oan doben sira, kuidadu didiak imi nia aan para la bele adora fali maromak falsu no buat seluk nebee la loos.