1 João 4 - Biblia Tetun Dili

Kuidadu para ema la bele bosok imi

¹ Maluk doben sira, se ema ruma mai dehan, nia iha Nai Maromak nia Espiritu, keta tuir lai. Imi tenki koko uluk para hatene, espiritu nebee sira iha nee mai duni hosi Nai Maromak ka lae. Tanba iha mundu nee iha profeta falsu barak ona.

² Nunee imi tenki koko lai sira. Oinsaa mak imi bele hatene katak Maromak nia Espiritu hela iha sira? Se sira dehan katak Jesus Kristu mai iha mundu nee sai ema, entaun sira nia liafuan mai hosi Maromak nia Espiritu.

³ Maibee se sira dehan Jesus Kristu la sai ema, entaun laos Maromak nia Espiritu mak hela iha sira nia laran. Espiritu nebee hela iha ema nee mai hosi espiritu nebee kontra Kristu. Uluk imi rona tiha ona katak antikristu sei mai, i agora dadauk nia iha ona iha mundu nee.

⁴ Hau nia oan doben sira, imi Nai Maromak nia ema. I imi halakon tiha ona profeta falsu sira, tanba Espiritu nebee hela iha imi nee, forti liu espiritu ida nebee hela iha mundu nee.

⁵ Profeta falsu sira nee, nia huun mai hosi mundu nee deit, nee mak sira sempre koalia tuir mundu nian, i ema mundu nian rona sira.

⁶ Maibee ami Nai Maromak nia ema. I ema nebee konhese ona Nai Maromak, sira rona ami; ema nebee laos Nai Maromak nia ema, sira lakohi rona ami. Hosi nee ita hatene, Espiritu nebee loos no espiritu nebee bosok.

Maromak mak domin

⁷ Maluk doben sira, mai ita hadomi malu, tanba domin nee mai hosi Nai Maromak. Ema nebee hadomi ema seluk, nia Maromak nia oan i nia konhese Maromak.

⁸ Maibee ema nebee la hadomi ema seluk, nia la konhese Maromak, tanba Nai Maromak mak domin.

⁹ Nai Maromak hatudu Nia domin nunee: Nia haruka nia Oan mane mesak mai iha mundu para ita bele hetan moris rohan-laek.

¹⁰ Domin nee mak nee: laos ita mak hadomi Nai Maromak, maibee Maromak mak hadomi ita. Tanba Nia hadomi teb-tebes ita, nee mak Nia haruka Nia Oan mai foo Aan ba mate, atu nunee Maromak bele hamoos ita nia sala.

¹¹ Maluk doben sira, Nai Maromak hadomi teb-tebes ita, nunee ita mos tenki hadomi malu.

¹² La iha ema ida mak haree ona Nai Maromak, maibee se ita hadomi malu, Maromak hela iha ita i Nia domin mos buras iha ita.

¹³ Nai Maromak foo tiha ona Nia Espiritu ba ita, nee mak ita hatene ona katak ita laran ida ho Nai Maromak i Nia mos hela ho ita.

¹⁴ Ami rasik haree ona Maromak nia Oan, i ami foo sasin katak, Nai Maromak haruka Nia Oan mai para salva ema iha mundu nee.

¹⁵ Ema nebee foo sai dehan Jesus mak Maromak nia Oan, Maromak hela iha nia i nia mos laran ida ho Nai Maromak.

¹⁶ Ita hatene Nai Maromak nia domin, i ita laran metin ba Nia domin nee. Maromak nee domin, nunee ema nebee hadomi Nai Maromak i hadomi ema seluk, ema nee laran ida ho Nai Maromak i Nai Maromak mos hela iha nia.

¹⁷ Se ita laran ida ho Maromak ita iha domin loloos. Aban-bainrua, iha loron nebee Nai Maromak tesi ema hotu nia lia, ita sei la tauk, tanba iha mundu nee ita nia moris hanesan Jesus Kristu nian.

¹⁸ Se ita iha domin, ita la tauk ona, tanba domin loloos halakon tauk. Se ema sei tauk, nia senti laran susar, tanba nia tauk atu hetan kastigu. Ida nee hatudu katak ema nee seidauk iha domin loloos.

¹⁹ Ita hadomi Nai Maromak no ema seluk, tanba Nai Maromak hadomi uluk ita.

²⁰ Se ema ruma dehan, “Hau hadomi Nai Maromak,” maibee odi nia maluk, ema nee bosok-teen. Tanba se nia la hadomi nia maluk nebee nia haree, susar liu nia hadomi Nai Maromak nebee nia la haree.

²¹ Entaun Nai Maromak foo Nia ukun fuan mai ita dehan, se o hadomi Nai Maromak, o mos tenki hadomi ema seluk.