1 João 3 - Biblia Tetun Dili

Nudar Maromak nia oan tenki moris loos

¹ Ita nia Aman Maromak nia domin mai ita boot teb-tebes, ita sukat la too! Nia hadomi ita too Nia foti ita sai Nia oan. Ita Nai Maromak nia oan duni. Maibee ema nebee moris tuir mundu nia hakarak, sira la komprende ita nia maneira moris, tanba sira la konhese Maromak.

² Maluk doben sira, ita sai ona Maromak nia oan. Maibee Maromak seidauk foo sai ba ita, aban-bainrua ita sei sai oinsaa. Maski nunee ita sei hatene, bainhira Jesus Kristu fila fali mai hosi lalehan, ita sei sai hanesan Nia, tanba ita sei haree Nia momoos.

³ Tanba nee, ema hotu-hotu nebee hein ho laran metin atu sai hanesan Nia, sira sempre kuidadu sira nia aan para moris loos, hanesan Jesus Kristu mos moris loos.

⁴ Ema nebee halo sala, nia kontra Nai Maromak nia ukun fuan. Tanba sala katak lakohi halo tuir Nia ukun fuan.

⁵ Imi hatene katak Jesus Kristu mai para hamoos ita ema nia sala, i Nia rasik la iha sala ida.

⁶ Tanba nee, ema nebee sai ona laran ida ho Kristu sei la moris iha sala nia laran. Se ema halo sala nafatin, nee hatudu katak nia seidauk konhese Jesus Kristu i seidauk komprende Jesus nee see.

⁷ Oan doben sira, la bele tuir ema nebee mak hakarak lori imi lao sala dalan. See mak halo buat nebee mak loos, nia ema ida ke moris loos, hanesan Jesus Kristu.

⁸ Maibee see mak halo sala bebeik, ema nee diabu nia oan, tanba diabu halo sala dezde uluk kedas. Maromak nia Oan mai iha mundu para harahun tiha diabu nia serbisu.

⁹ Nunee ema nebee sai ona Nai Maromak nia oan, nia sei la moris tan iha sala nia laran, tanba Kristu laran ida ona ho nia. Nia la bele moris nafatin iha sala laran, tanba nia sai ona Maromak nia oan.

¹⁰ Imi bele hatene ida nebee mak Maromak nia oan, i ida nebee mak diabu nia oan, hanesan nee: see mak la halo buat nebee loos no la hadomi nia maun-alin iha Kristu, ema nee laos Maromak nia oan.

Nai Maromak nia oan sira tenki hadomi malu

¹¹ Hori uluk kedas imi simu lia menon ida nee: ita ema nebee fiar ona ba Jesus tenki hadomi malu.

¹² La bele sai hanesan Kaín. Nia hanesan fali diabu nia oan, too nia oho nia alin rasik. Tansaa mak Kaín oho nia alin? Tanba nia halo buat aat, maibee nia alin halo buat loos iha Maromak nia oin.

¹³ Maun-alin sira, se ema nebee moris tuir mundu nia hakarak odi imi, lalika hakfodak.

¹⁴ Ita hatene katak, uluk ita hanesan mate tiha ona tanba ita haketak aan hosi Maromak, maibee agora ita simu ona moris rohan-laek. Oinsaa ita bele hatene katak ita hetan ona moris rohan-laek? Tanba ita hadomi ita nia maluk nebee iha Kristu. Maibee see mak la hadomi ema seluk, nia hanesan ema mate nafatin.

¹⁵ See mak odi ema seluk, nia hanesan fali ema oho-dor. I imi hatene ona katak, ema oho-dor la hetan moris rohan-laek.

¹⁶ Domin loloos mak saida? Liu hosi Jesus Kristu mak ita bele hatene. Nia hadomi ita too foo Aan ba mate. Nunee ita mos tenki entrega ita nia aan ba mate ba ita nia maun-alin sira nebee iha Kristu.

¹⁷ Se ema ida iha hahaan ka hena, maibee la foo ba nia maluk nebee moris iha susar nia laran, oinsaa nia bele dehan nia hadomi Nai Maromak?!

¹⁸ Oan doben sira, ita la bele hadomi ita nia maluk sira ho ibun deit, maibee ita tenki hatudu ita nia domin loloos liu hosi ita nia hahalok no moris loos.

¹⁹ Se ita hadomi duni ema seluk, nee hatudu katak ita moris tuir lia loos. Nunee ita nia laran bele hakmatek iha Maromak nia oin.

²⁰ Maski ita nia fuan-laran akuza ita kona ba buat la diak nebee ita halo ona, ita lalika tauk. Tanba Nai Maromak nia domin boot liu ita nia hanoin i Nia hatene buat hotu-hotu kona ba ita.

²¹ Maluk doben sira, se ita nia fuan-laran la akuza ita maka ita bele iha brani fiar hodi hakbesik aan ba Nai Maromak.

²² Nunee ita husu saida deit, Nia sei foo, tanba ita moris tuir Nia ukun fuan i halo haksolok Nia laran.

²³ I Maromak nia ukun fuan mak nee: ita tenki fiar ba Nia Oan Jesus Kristu i tenki hadomi malu tuir Jesus Kristu hanorin.

²⁴ Ema hotu-hotu nebee tuir Nai Maromak nia ukun fuan, sira laran ida ho Maromak i Nia mos hela ho sira. Oinsaa mak ita hatene katak Maromak hela ho ita? Tanba Nia foo ona Nia Espiritu hela iha ita nia laran.