1 João 2 - Biblia Tetun Dili

¹ Hau nia oan doben sira, hau hakerek buat sira nee ba imi, para imi la bele halo sala. Maibee se ita halo sala, iha ona Advogadu ida hodi defendi ita iha Aman Maromak para Nia simu ita nafatin. Ema nee mak Jesus Kristu, Ida nebee sempre moris loos.

² Nia foo Aan ba mate atu nunee Maromak bele hamoos ita nia sala, i laos deit ita nia sala maibee ema hotu iha mundo nee.

Ita tenki halo tuir Nai Maromak nia liafuan

³ Oinsaa mak ita bele hatene loloos katak ita konhese Nai Maromak? Ita hatene tanba ita halo tuir Nia ukun-fuan.

⁴ Se karik ema ruma dehan, “Hau konhese Nai Maromak,” maibee la halo tuir Maromak ukun-fuan, ema nee bosok-teen, i lia loos la iha nia.

⁵ Maibee ema nebee moris tuir Nai Maromak nia liafuan hatudu katak nia hadomi duni Nai Maromak, i nunee ita hatene katak ita laran ida ho Maromak.

⁶ Ema nebee dehan nia laran ida ho Kristu, nia tenki moris hanesan ho Kristu nia moris.

⁷ Maluk doben sira, hau foo hanoin ba imi laos kona ba ukun fuan foun, maibee ukun fuan nebee iha ona imi hosi hahuu kedas. Ukun-fuan tuan nee mak liafuan nebee imi rona tiha ona.

⁸ Maski nunee, iha buat foun nebee hau hakarak hakerek kona ba Maromak nia ukun fuan nee. Ukun-fuan nee Jesus halao ona iha nia moris no ita mos halao iha ita nia moris. Tanba iha ita nia fuan nakukun komesa lakon i naroman mosu ona.

⁹ Ema nebee dehan nia moris iha naroman laran maibee sei odi ema ida nebee fiar ba Kristu, ema nee sei moris nafatin iha nakukun laran.

¹⁰ Maibee ema nebee hadomi nia maun-alin nebee fiar ba Kristu, nia moris iha naroman laran, i la halo ema seluk monu ba sala.

¹¹ Ema nebee sei odi nia maun-alin ida nebee fiar ba Kristu, nia moris nafatin iha nakukun laran. Nia la hatene atu baa loos nebee, tanba nakukun taka metin nia matan.

Ema nebee moris iha naroman la moris tuir mundu nia hakarak

¹² Hau nia oan doben sira, hau hakerek liafuan nee ba imi tanba Nai Maromak hamoos tiha ona imi nia sala liu hosi Jesus Kristu nia mate.

¹³ Inan-aman sira, hau hakerek ba imi tanba imi konhese ona Ema ida nebee iha hori uluk kedas. Joven sira, hau hakerek ba imi tanba imi halakon ona aat nain.

¹⁴ Hau nia oan doben sira, hau hakerek ba imi tanba imi konhese ita nia Aman Maromak. Inan-aman sira, hau hakerek ba imi tanba imi konhese ona Ema ida nebee iha hori uluk kedas. Joven sira, hau hakerek ba imi tanba imi forti no moris tuir Nai Maromak nia liafuan, i halakon tiha aat nain.

La bele hadomi buat mundu nian

¹⁵ La bele hadomi mundu nee no buat nebee iha mundu nee iha. See mak hadomi mundu nee, nia la hadomi Aman Maromak.

¹⁶ Tanba buat hotu iha mundu nee, mak hanesan nee: hakarak buat aat, hanoin aat, kaan sasaan oi-oin no foti aan. Buat sira nee hotu laos mai hosi Aman Maromak maibee mai hosi mundu.

¹⁷ Mundu ho buat hotu-hotu nebee ema buka iha loron ida sei nabeen. Maibee ema nebee tuir Nai Maromak nia hakarak, nia sei moris tinan ba tinan nafatin.

Kuidadu ho Antikristu

¹⁸ Oan doben sira, mundu nee besik remata ona. Uluk ami hatete tiha ona ba imi katak ema ida sei mai kontra Kristu, i agora dadauk ema barak mosu tiha ona hodi kontra Kristu. Tanba nee mak ita hatene katak mundu besik remata ona.

¹⁹ Ema sira nebee kontra Kristu nee uluk hamutuk ho ita, maibee agora sees ona hosi ita. Maski sira uluk iha ita nia klaran, sira laos ema nebee fiar duni ba Kristu, nee mak sira lakohi hamutuk ona ho ita. Sira husik tiha ita, nee hatudu katak, sira nee la halo parte ho ita.

²⁰ Maibee imi la hanesan ho sira. Jesus Kristu haraik ona Nia Espiritu Santu ba imi, i nunee imi hotu hatene ona lia loos.

²¹ Entaun hau hakerek surat nee ba imi laos tanba imi la hatene lia loos. Maibee imi hatene duni i imi mos hatene katak, Maromak nia liafuan nee lia loos nebee nunka bosok.

²² Entaun see mak bosok? Ida nebee hatete katak Jesus laos Kristu, nee dehan katak Jesus laos Ema ida nebee Maromak promete ona hori uluk atu haruka mai salva ema. See mak koalia nunee, nia kontra Kristu. Nia nega Maromak nia Oan i nega mos Aman Maromak.

²³ Ema nebee nega Maromak nia Oan, nia la bele sai laran ida ho Aman Maromak. Maibee ema nebee rekonhese Maromak nia Oan, nia sai laran ida ho Nia Aman.

²⁴ Tanba nee, kaer metin nafatin lia loos nebee imi rona ona hori uluk. Se imi halo nunee, imi neon ida laran ida nafatin ho Aman Maromak ho mos nia Oan.

²⁵ I Maromak promete ba ita katak ita sei hetan moris rohan-laek.

²⁶ Hau hakerek buat sira nee para foo hanoin ba imi kona ba ema nebee hakarak bosok imi.

²⁷ Maibee imi simu ona Nai Maromak nia Espiritu, i Nia Espiritu hela nafatin ho imi. Nunee imi la presiza mestri seluk atu hanorin imi, tanba Nia Espiritu rasik mak hanorin imi kona ba buat hotu-hotu, i saida mak Nia hanorin nee loos hotu, ida mos la sala. Entaun imi tenki moris laran ida nafatin ho Jesus Kristu tuir Nia Espiritu hanorin ona ba imi.

²⁸ Nee duni, oan doben sira, imi tenki moris laran ida ho Jesus Kristu nafatin, para aban-bainrua Jesus fila fali mai hosi lalehan, ita la tauk i la moe hamriik iha Nia oin.

²⁹ Imi hatene ona katak Jesus Kristu sempre halo buat nebee mak loos. Nunee bainhira ema halo bebeik buat nebee mak loos, imi konhese katak, ema nee Nai Maromak nia oan.