1 João 1 - Biblia Tetun Dili

Jesus mak Maromak nia Liafuan nebee foo Moris Rohan-Laek

¹ Surat nee koalia kona ba Liafuan nebee foo Moris. Liafuan nebee foo Moris nee, Nia iha hori uluk kedas, molok Nai Maromak halo mundu nee. Ami rona ona Nia lian, ami haree Nia ho ami nia matan rasik, ami akompanha Nia, ami mos kaer rasik ho liman.

² Bainhira Ida nebee foo Moris nee mosu iha ami nia leet, ami haree Nia. Nee mak ami foo sasin kona ba Nia, i ami foo sai ba imi katak, Nia mak foo moris rohan-laek. Nia hamutuk ho Nia Aman Maromak hori uluk kedas, maibee agora Nia hatudu ona Nia Aan ba ami.

³ Saida mak ami haree i rona rasik, ida nee mak ami foo sai ba imi, para imi bele sai laran ida ho ami, i nunee ita hotu hamutuk laran ida ho Aman Maromak no ho Nia Oan Jesus Kristu.

⁴ Ami hakerek buat sira nee ba imi para ita hotu bele haksolok liu tan.

Kristaun sira tenki moris iha naroman laran

⁵ Liafuan tuir mai ami rona hosi Jesus Kristu i foo tutan fali ba imi: Maromak nee naroman, nakukun ida mos la iha.

⁶ Se ita dehan ita laran ida ho Nia, maibee ita sei moris iha nakukun laran, ita bosok ita nia aan i ita la moris iha lia loos.

⁷ Maibee se ita moris iha naroman laran, hanesan mos Nai Maromak, entaun ita nia relasaun ho ema fiar sira sai metin, i Nia Oan Jesus nia raan sei hamoos ita nia sala tomak.

⁸ Se ita dehan ita nunka halo sala, ita bosok ita nia aan rasik i ita la hatene lia loos.

⁹ Maibee se ita foo sai ita nia sala ba Nai Maromak, Nia fiel no justu. Nia sei foo perdaun ba ita nia sala i sei hamoos ita nia hahalok aat hotu. Tanba Nai Maromak kumpri Nia promesa, i Nia sempre halo buat nebee loos.

¹⁰ Se ita dehan ita nunka halo sala, entaun ita dehan fali Maromak nee bosok, i Nia Liafuan la iha ita.